ГОРÆТЫ АДМИНИСТРАЦИЙЫ КУСДЖЫТÆ БАЗОНГÆ СТЫ НОГ СÆРГЪЛÆУУÆГИМÆ

РХИ-йы Президенты барамындæй Цхинвалы горæты администрацийы сæргълæууæгæй нысан æрцыд Къадзты Гено. Знон, 15-æм июлы, горæты администрацийы æмбырдгæнæн залы уый администрацийы кусджытæн базонгæ кодта Президент Гаглойты Алан.

Администрацийы кусджытæн ног æвзæрст сæргълæууæджы зонгæ кæнгæйæ, Президент загъта, зæгъгæ, уыдзæнис ивындзинæдтæ администрацийы, куысты ног формæтæ биноныг цæудзысты администрацийы, уымæ гæсгæ йæ хъусдард аздæхта коллективмæ, цæмæй йæ фарсмæ балæууой. «Мæн фæнды, цæмæй ног сæргълæууæгимæ иумæйаг æвзаг ссарат, уæ куыст размæ ацæуа æмæ нæм цы адæм æнхъæлмæ кæсы, уыдоны æмæ Ирыстоны хæрзæбонæн куыст размæ акæнæм. Ныфс мæ ис, раст фæндтæ æмæ хъуыдыимæ кæй арахайдзæнис, уымæй. Афтæ кæй уыдзæнис, ууыл та дызæрдыг мачи кæнæд. Коллективæй бирæ аразгæ у, уымæ гæсгæ мæ ныфс ис, кæрæдзийы æнцой кæй балæудзыстут æмæ уæ куыст, уæ архайд адæмы хæрзæбонæн кæй  араздзыстут. Æз дæр уæ фарсмæ уыдзынæн æмæ иууыл иумæ куы уæм, уæд мæ ныфс ис, æппæт зындзинæдтыл дæр кæй фæтых уыдзыстæм», – загъта Президент.

Президент ноджыдæр раарфæ кодта Къадзты Генойæн æмæ йын йæ цæст бауарзта, цæмæй коллективимæ ссара иумæйаг æвзаг æмæ сын бантыса æнтыстджын къахдзæфтæ акæнын нæ адæмы хæрзæбонæн.

Йæ рады Къадзты Гено бузныджы ныхæстæ загъта Президентæн, йе ‘ууæнк ыл кæй бафтыдта, уый тыххæй. Йæхи тыххæй дзургæйæ, уый банысан кодта, зæгъгæ, кæд гуыргæ Дзæуджыхъæуы ракодтон, уæддæр мæ царды рæсугъддæр азтæ арвыстон ам, нæ адæмимæ цæргæйæ.

«Ахуыр кодтон ам, профтехахуыргæнæндоны, музыкалон скъолайы, нывгæнæн ахуыргæнæндоны, стæй Хуссар Ирыстоны Паддзахадон университеты. Нæ адæмимæ иумæ бавзæрстон зындзинад, мæгуырдзинад. Мæн ныфс ис, кæрæдзийы æмбаргæйæ кæй кæндзыстæм нæ куыст. Нæ куыст та араздзыстæм, закъон куыд дома, уымæ гæсгæ, рæстагæй. Адæммæ нын хъуамæ уа æмбæлон ахаст, аудæм не ‘мбæстæгтыл», – загъта администрацийы ног сæргълæууæг.

БЕСТАУТЫ Валентинæ