Республикæ Хуссар Ирыстоны Президент Гаглойты Алан 6-æм апрелы горæты администрацийы кусджыты базонгæ кодта сæ ног сæргълæууæг Хуыгаты Ромеоимæ, кæцы раздæр æххæст кодта хъæууон хæдзарады министры хæдивæджы хæстæ. Президент йæ ныхасы райдианы бузныджы ныхæстæ загъта, администрацийы раздæры сæргълæууæг Къадзты Генойæн йæ бакæнгæ куысты тыххæй.
«Хуыгаты Ромео тынг бæрнон ахаст дары йæ куыстмæ. Абоны бонæй кусын райдайдзæн ног коллективы ‘хсæн æмæ мæн фæнды, цæмæй сымах иууылдæр йæ фарсмæ балæууат æмæ нæ республикæйы хæрзиуæгæн, кæрæдзи æмбаргæйæ уæ куыст æххæст кæнат. Тынг бирæ проблемæтæ ис, уыдон иу бонмæ скъуыддзаг не ‘рцæудзысты, фæлæ хъуамæ æппæт дæр саразæм, цæмæй цадæггай скъуыддзаг цæуой», – загъта Гаглойты Алан.
Банысан ма кодта республикæйы къухдариуæгад кæдфæнды дæр цæттæ кæй у æххуысы къух фæдаргъ кæнынмæ.
Йæ рады Хуыгаты Ромео бузныг загъта президентæн йе ууæнчы тыххæй æмæ банысан кодта æппæт дæр кæй араздзæн, цæмæй проблемæтæ скъуыддзаг цæуой. «Ныфс мæ ис коллективимæ иумæ, кæрæдзи æмбаргæйæ, кæй æххæст кæндзыстæм нæ куыст. Уымæн æмæ иунæгæй æппæт проблемæтæн аскъуыддзаг гæнæн нæй, уымæ гæсгæ мæн ныфс ис, коллективимæ иумæ нын нæ куысты кæй уыдзæн æмбаргæ ахаст», – загъта Хуыгаты Ромео. Уый ма банысан кодта, горæты инфраструктурæ хуыздæр кæныны фæдыл куыстмæ цæттæ кæй у.
Къадзты Гено йæ рады бузныджы ныхæстæ загъта президент æмæ администрацийы коллективæн сæ иумиаг куысты тыххæй æмæ ног сæргълæууæгæн та загъта æнтыстытæ.
***
Президент Гаглойты Алан нæ республикæйы Арæзтад, архи-тектурæ æмæ цæрæнуатон-комуналон хæдзарады министрады коллективæн базонгæ кодта сæ ног министр Елдзарты Константины. «Елдзарты Константин сымахæн ног адæймаг нæу, уымæ гæсгæ уымæн æнцон уыдзæн йæ хæстæ æххæст кæнын. Министрады коллектив у æвзонг æмæ куыстхъом, æмæ мæ уырны ног сæргълæууæгимæ кæй кусдзыстут æмæ скъуыддзаг кæндзыстут уæ разы æрæвæргæ хæстæ. Уымæ гæсгæ хæс æвæрын министрады ног сæргълæууæджы раз, цæмæй Инвестицион программæ æххæст æрцæуа æмгъуыдæй раздæр, фæлæ куыстытæ æххæст хъуамæ æрцæуой гъæджынæй», – загъта Гаглойты Алан. Президент бузныджы ныхæстæ загъта, министрады раздæры министр Зæгъойты Эдуардæн йæ бакæнгæ куысты тыххæй.
***
Республикæйы Президент Гаглойты Аланы барамындмæ гæсгæ Финансты министрæй нысан æрцыд Цæрикъаты Хъазбег. Президент куыд банысан кодта, афтæмæй Цæрикъаты Хъазбегæн ис куысты стыр стаж, у йæ куысты стыр профессионал. «Кæй зæгъынæй хъæуы фæлтæрддзинадæн йæхи бынат ис, фæлæ махæн сæйраг у коллективы æнгомдзинад, æмбарындзинад. Ацы коллективы æз зонын цалдæр азы æмæ ныртæккæ коллективы ‘хсæн цы хорз æмæ хъарм ахаст ис кæрæдзиимæ, уый дарддæр дæр хъуамæ хъахъхъæд цæуа», – загъта паддзахады сæргълæууæг. Цæрикъаты Хъазбегмæ стыр фæлтæрдзинад ис финансон архайды фадыджы æмæ йæ раныхасы банысан кодта, цæттæ кæй у йæ разы æрæвæргæ хæстæ æххæст кæнынмæ. «Куысты мидæг пайда кæндзынæн мæ профессионалон фæлтæрддзинадæй æмæ кусдзынæн Хуссар Ирыстоны рæзт æмæ размæцыдыл», – загъта Цæрикъаты Хъазбег.
ТАНДЕЛАТЫ Виленæ
