Цхуырбаты Гурамы номыл Цхинвалы централон стадионы хæларадон хъазт акодтой Цхинвалы «Спартак» æмæ Дзæуджыхъæуы командæ «Владикавказ», кæцы хъазы Уæрæсейы æртыккаг дивизионы. Фембæлды райдианы хъазт фылдæр цыд хъазæн фæзы æмбисы. Фæлæ таймы кæронмæ æввахсдæр уазджытæн бантыст цхинвайлæгты кулдуары раз цалдæр тæссаг уавæры саразын, фæлæ-иу хорз сарæхст кулдуаргæс Цхуырбаты Станислав.
Фембæлды дыккаг хайы цхинвайлæгтæ фæхуыздæр кодтой сæ хъазт. Райдыдтой пуртийыл фылдæр контроль кæнын. Фæлæ 70-æм минутыл дзæуджыхъæуккæгты контратæкæйы фæстæ хыгъд байгом.
Уымæн цхинвайлæгтæ дзуапп радтой къуымон цæф хорз сыххæстгæнгæйæ. Æрмæст дæр уазджыты клударгæсы хорз арæхстдзинады фæрцы, кæцы цхинвайлæгты размæбырсæджы цæфы фæстæ пурти акъуырдта, хыгъд нæ сæмхуызон. Хъазты кæрон ма дзæуджыхъæуккæгтæн бантыст ноджы иу фæстиуæгджын контратæкæ саразын.
Хъазты фæстæ дыууæ командæйæ иууыл хуыздæр чи ахъазыд, уыдон – Цхуырбаты Сæрмæт æмæ Наниты Роберт призтæ райстой компани «Мегафон – Южная Осетия»-йæ.
Дзæуджыхъæуы «Владикавказ»-ы тренер Цхуырбаты Альберт загъта: «Зонын æй Цхинвалы рагæй кæй нал уыдысты хъæзтытæ. Уымæ гæсгæ мæ бафæндыд ардæм командæ æркæнын. Стæй мæхæдæг дæр дзауаг дæн. Хорз атмосферæйы ацыд хъазт. Бузныг спортуарзджытæн»
Цхинвалы «Спартак»-ы тренер Кæркуысты Роберт: «Тынг хорз хъазт рауад. Ныфс мæ ис æмæ нын дарддæр дæр хъæзтытæ кæй уыдзæнис Цхинвалы».
АЦЫД ОТСТАВКÆЙЫ
Ирон специалист Черчесты Станислав отставкæйы ацыд венгриаг футболон командæ «Ференцварош»-ы сæйраг тренеры бынатæй. Клубы къухдариуæгад ахæм уынаффæ рахаста командæ Чемпионты къорды квалификацийы дыккаг раунды фарерскаг командæ «Клаксвик»-æн 3:0 хыгъдæй куы фæхæрд, уый фæстæ.
Хуриты Батрадз
