Республикæйы ветеринарон службæтæ ацы бонты æрæвналдзысты Хуссар Ирыстоны районты фосæн вакцинæтæ аразынмæ. Куыд адæм, афтæ фос дæр хызт нæ вæййынц алыгъуызон хæцгæ низтæй. Уыдонæй иутæ дзæбæх кæнынц æнцонтæй, афтæ тæссаг сын нæ вæййы, сæ хицау сæм рæстæгыл йæ хъус куы æрдара, хостæй сæм куы фæкæса, уæд. Фæлæ фосы низтæй ис ахæмтæ, зынтæй чи дзæбæх кæны, уыдоны нымæцмæ хауы фадниз, бруцеллез æмæ æндæртæ. Афтæ кæй у, уымæ гæсгæ фосæн вакцинаци уагъд æрцæудзæн æгас республикæйы. Стуртæн судзинтæ араздзысты бынæттон ветфельдшертæ. Республикæйы сæйраг ветеринар Тедеты Ацæмæз куыд зæгъы, афтæмæй, кæд уавæр нырма сабыр у, уæддæр уалдзæджы æрбалæудимæ низтæ райхъал вæййынц æмæ тæссаг у уыдон апарахат кæнынæй. Фæлæ планон вакцинаци ауагъд куы æрцæуы, уæд уый ахъаз вæййы, цæмæй низ мацы тæссагдзинад æрхæсса. Хæдзарон цæрæгойты тæссаг низтæй бахъахъхъæныныл кæй архайынц ветеринарон службæтæ, уымæй, фыццаджыдæр, хъахъ-хъæнынц адæймаджы цард æмæ æнæниздзинад.
Фосмæ низы нысæнттæ бафиппайгæйæ, фосдарджытæ æвæстиатæй хъуамæ фехъусын кæной ветслужбæйæн. Уæд ветеринартæ райсдзысты æппæт мадзæлттæ дæр, цæмæй низ дарддæр мауал апарахат уа.
Алы низмæ дæр бацæуын хъæуы индивидуалонæй. Хуытæ, стуртæ, хæдзарон мæргътæ хъуамæ конд уой хицæнæй, уæгъдибарæй ма рацу-бацу кæной æмæ ма иу кæной æндæр цæрæн пунктты хæдзарон фосимæ. Уымæн æмæ арæнгæрон хъæуты, кæд арæнтæ телæхгæд сты, уæддæр æрбаирвæзынц цæрæгойтæ æмæ уый фæстиуæгæн æрбахæссынц алыгъуызон хæцгæ низтæ. Уымæн мах æвдисæн уыдыстæм 2007, 2010 æмæ 2011 азты. Африкæйаг емынæ уæд Хуссар Ирыстоны районты апарахат Гуырдзыстонæй, фермертæ-иу сæ фос арæх хызтой арæнгæрæтты, цыран уый размæ хызтысты сыхаг гуырдзиаг хъæуты фос. Ацы низтæ сты вирусон хæцгæнизтæ æмæ æхсæнадæмон классификацимæ гæсгæ хауынц уæлдай тæссагдæр низтæм. Африкæйаг емынæйæн схосгæнæн нæй æмæ вакцинæ куы саразай, уæд дæр ыл нæ тых кæны. Низ цæмæй ма апарахат уа, уый тыххæй хъæуы цæхгæр карантинон мадзæлттæ исын æрмæстдæр.
Хъæууон хæдзарады министрады куыд зæгъынц, афтæмæй вакцинæ арæзт цæудзæнис ахæм низты ныхмæ, куыд пастереллез, сыбыраг хæлмагниз, фадниз, пироплазмоз æмæ джыбыты ныхмæ. Ивгъуыд аз тынг арæх уыдысты дерматит æмæ джыбыты низ. Фос дерматитæй куы фæрынчын вæййы, уæд йæ буар байдзаг вæййы бызычъитæй. Ацы низ тæссаг у адæймагæн дæр. Уымæ гæсгæ йæ хъæуы скуынæг кæнын. Уый та ветеринарты къухы бафтдзæн вакцинæйы фæрцы.
Фосы æнæниздзинадыл æнæмæг хъæуы аудын, уымæн æмæ фыдызгъæлæй адæм хъуамæ æдæрсгæйæ пайда кæной, ма тæрсой, дзидзайы продукттæ хæргæйæ сыл исты низ кæй бахæцдзæнис, уымæй.
УАЗÆГТЫ Марфа
Comments are closed, but trackbacks and pingbacks are open.