Хуссар Ирыстоны Юстицийы министрады сырæзтыл 27 азы сæххæсты цытæн нæ Республикæмæ цытджын делегаци æрцыд Донецкы Адæмон Республикæйæ Юстицийы министры хæстæ æххæстгæнæг Яков Ходосы сæргълæудæй. Делегацийы сконды ма уыдысты Донецкы Республикæйы Дунеон барад æмæ æхсæнадон бастдзинæдтимæ департаменты директор Никита Нарыжный, Информацион технологиты департаменты директор Виталий Беляев æмæ министрады пресс-службæйы хайады къухдариуæггæнæг Татьяна Болотина.
Донецкы Юстицийы министрады делегацийы уæнгты йæхимæ райста Хуссар Ирыстоны юстицийы министр Лалыты Залинæ. Куыд банысан кодта, уымæ гæсгæ хуссарирыстойнаг æхсæнад лæмбынæг хъусдард здахы Донецкы Республикæйы æрцæугæ цаутæм. Дæргъвæтин рæстæджы хæстон цаутæ, экономикон блокадæ – æппæт уыдæттæ бавзæрстой Хуссар Ирыстоны адæм дæр, уыдон махæй рох не сты, зæгъгæ.
«Хуссар Ирыстон сæрибардзинадмæ тырнындзинады хъуыддаджы сты Донбассы фарсмæ. Уымæн æмæ Донбассы адæм цæ-уынц сæ бæллиццаг нысанмæ – хæдбар демократон, социалон нысанмæ здæхт паддзахад аразынмæ. Хуссар Ирыстоны адæммæ Донецкы Адæмон Республикæйы Уæлдæр Советы сидты фæстæ, нæ бæстæйы Президент дунеон æппæт нормæтæ хынцгæйæ, йæ барамындæй банымадта Донецк æмæ Луганскы Адæмон Республикæты паддзахадон хæдбардзинад», – дзырдта Лалыты Залинæ.
Йæ ныхасы ма уый банысан кодта, зæгъгæ, Хуссар Ирыстон æмæ Донецкы Республикæимæ рæхджы цы Сразыдзинадыл æрфыстæуыд къухтæ, уый фæлгæтты ма бафыст æрцæудзæн æхсæнведомствæйон барадон документтæ дæр.
«Нæ уагдæтты ‘хсæн æмахастытæ дарддæр дæр рæздзысты. Донецк æмæ Хуссар Ирыстоны Юстициты министрадты ‘хсæн барадон æмгуыстады фæндæтты фæдыл Меморандумыл къухтæ æрфыссыны инициативæ дæр Донецкы фарсæрдыгæй цæуы. Ныридæгæн арæзт æрцыд кусæгон къорд æмæ куыст цæуы нормативон-барадон акттæ æмæ бадзырдтытыл», – банысан кодта министр.
Донецкы Республикæйы юстицийы министры хæстæ æххæстгæнæг Яков Ходосы ныхæстæм гæсгæ нæ адæмтæ сты æфсы-мæрон адæм, Донецкæн уæззау рæстæджы æрмæстдæр ирæттæ, зæгъгæ, махæн бакодтой фыццаг æххуыс. Куыд банысан кодта, уымæ гæсгæ закъондæттынадон æмвæзадыл æмгуыстад биноныг цæудзæн министрадты ‘хсæн, бафысгæ фыццаг акты бындурыл æмгуыстад цæудзæн бæрæг здæхтыты.
Хуссарирыстойнаг фарсæрдыгæй фембæлды хайад райстой Юстицийы министрады Закъондæттынады фæдыл управленийы къухдариуæггæнæг Чысиаты Олеся, Æфхæрдтæ æххæст кæныны управленийы къухдариуæггæнæг Мæргъиты Отар, Паддзахадон регистраци, кадастр æмæ картографийы службæйы сæргълæууæг Коцты Аленæ æмæ Сæйраг тæрхондонон пристав Дзæгъиаты Вадим.
Нæ уацх.
Comments are closed, but trackbacks and pingbacks are open.