Ацы цайуадзæн фирмæйы аразæг у не ‘мбæстаг чызг, зынгæ, курдиатджын музыкант, композитор, адæмон инструменталон оркестр «Айзæлд»-ы аивадон къухдариуæггæнæг æмæ дирижер Уалыты Нинæ.
Уалыты Нинæ ацы хъуыддагыл ныллæууыд æрæджы йæ мадимæ. Уыдон райдианы кæрдæджытæ æмбырд кодтой æрмæстдæр сæхицæн. Лæвæрдтой дзы сæ зонгæтæ æмæ сыхæгтæн дæр. Нинæйы мад кæрдæджыты хосгæнæн аууæлтæм рагæй цымыдис кодта. Раздæр Хуссар Ирыстоны алкæцы комы дæр уыд ахæм адæймæгтæ, кæцытæ-иу хос кодтой кæрдæджытæй. Нинæйы мады хъæуы дæр уыд ахæм хосгæнæг, кæцы æххуыс кодта канд йæ хъæуккæгтæн нæ, фæлæ ма комы цæрджытæн дæр. Йæ зонындзинæдты фæрцы хос кодта алыгъуызон низтæн. Алы низæн дæр ын уыд хицæн кæрдæджыты æмбырдгонд. Фæлæ нуазын кæй хъуыд, куыд цай, афтæ, уыдонæн та уыд хицæн æмбырдгонд. Нинæйы мад бахъуыды кодта йæ дада иу цайæн цы кæрдæджытæ æмбырд кодта, уыдоны. Акодта-иу æй йемæ дæр æмæ-иу ын дзырдта, кæцы афон сæ хуыздæр у æмбырд кæнын, цæ-мæй адæймаджы æнæниздзинадæн ахъаз уой. Хосгæнæн кæрдæджыты рецепттæй бирæ нæ бахъуыды кодта, фæлæ цайы кæрдæджыты æмбырдгонд хорз лæууы йæ зæрдыл. Йе сконды ис тыфхъæд, битна, сусхъæды дидинæг, дыргътæ, уарди, хъæддаг хъæлæрдзы æмæ мæнæргъыйы сыфтæ. Уыдоны сконды æнæмæнг хъуамæ уа Иван-цай. «Нæ ирон цай арæзт цæуы сæрмагондæй Иванцайы бындурыл. Уымæн æмæ ацы цайы хорздзинæдтæй иу у йæ экологион сыгъдæгдзинад. «Nina tea» цæуы 18 хуызы – сау, цъæх æмæ алыгъуызон дыргъти-мæ», – зæгъы Уалыты Нинæ. Кæрдæджытæ æрæмбырд кæнынц мад æмæ чызг иумæ. Раздæр-иу фылдæр кæрдæджы хуызтæ æрæмбырд кодтой, фæлæ ныр уыцы кæр-дæджыты иуæй-иу хуызтæ фесæфтысты. «Чизоны уыцы кæрдæджыты хуызтæ сты æндæр комы, хæхтыл. Фæлæ, гæнæн ис, æмæ хæхтыл дæр уыцы кæрдæджытæ ссарæн мауал уа, уымæн æмæ нæ климат дæр фæивта».
«Nina tea»-йы цайæн кæрдæджытæ æмбырд кæнынц июлы æмбисæй августы æмбисы онг. Уый фæстæ сæ бахус кæнынц аууон бынаты. Уымæн бахъæуы 15 боны бæрц. Лыстæг та йæ кæнынц армæй. Пайдахæссæг зайæгойтæм бафтауынц алыгъуызон хус дыргътæ. Мад æмæ чызг, сæйраджыдæр, кæрдæджытæ æмбырд кæнынц Зары хъæуы алывæрсты æмæ хъæдты. Дыргътæ та балхæнынц адæмæй, фæлæ уыдон дæр æнæмæнг хъуамæ уой экологон æгъдауæй сыгъдæг. Ныртæккæ уыдон сæ продукци реализаци кæнынц нæ горæты, фæлæ фæстæдæр сæ зæрды ис Цæгат Ирыстоны магазинты дæр æй реализаци кæнын. Уалыты Нинæ куыд зæгъы, афтæмæй сын сæ цай зæрдиагæй æлхæнынц фæлхасгæнджытæ, йæ рауадзыны гуырахст нырма чысыл у, уадзынц æй ставдсыфы хуызы, фæлæ йæ хъуыдыйы ис пакетты йæ рауадзын дæр. Æвзонг амалиуæггæнæг куыд зæгъы, афтæмæй цайы кæрдæг кæны ферментаци, хус та йæ кæны сæрмагонд хусгæнæнты. Ницы араматизатортæ сæм æфтауы. «Ныр музыкæйы æмрæнхъ ацы хъуыддаг ссис мæ хобби, æмæ дыууæ куыст дæр зынаргъ сты мæ зæрдæйæн. Кæд мæ хъуыддаг зæрдæйы фæндиаг ацæуа, уæд æз хъавын цайы рæсугъд къоппыты уадзын, цæмæй-иу нæ бæстæмæ уазæгуаты чи æр-цæуа, уыдонæн дæр-иу сæ балæвар кæ-нæм.
Нæ уацх.
Comments are closed, but trackbacks and pingbacks are open.