РХИ-йы Мидхъуыддæгты министрады делегаци министры хæдивæг Тадтаты Петры сæргълæудæй уыдысты кусæгон балцы Цæгат Ирыстон-Аланийы, цыран фембæлдысты сæ коллегæтимæ æмæ æрдзырдтой иумæйаг ахсджиаг фарстатыл. Делегацийы сконды ма уыдысты Фæндагон змæлды æдасдзинады управленийы сæргълæууæг Джиоты Алан, криминалон милицийы хистæры хæдивæг Пухаты Инал, Информацион-координацион центры директор Болататы Алан æмæ Барадон ифтонгад æмæ æхсæнадæмон æмгуысткæнынады управленийы сæргълæууæг Сиукъаты Артур.
Цæгат Ирыстоны фарсæрдыгæй та фембæлды хайад райстой сæ Михъуыддæгты министр Михаил Скоков, Фæндагон змæлды æдасдзинады управленийы сæргълæууæг Моурауты Таймураз æмæ æндæр бæрнон кусджытæ.
Ӕмбырды райдианы Михаил Скоков йæ раныхасы банысан кодта, зæгъгæ, кæд æмæ дыууæ æфсымæрон республикæйы ‘хсæн æвæрд ис паддзахадон арæн, уæддæр нæ проблемæтæ иу сты.
«Мах хъуамæ æппæт амæлттæй дæр архайæм, цæмæй нæ республикæты цæрджыты бахизæм фæткхалæн цаутæй, хъахъхъæнæм сын сæ сабырад, æмæ нæ уый тыххæй та хъæуы æнгомдæр кусын, максималонæй хъуамæ баиу кæнæм нæ ресурстæ фыдгæнджытимæ тохы», – загъта Михаил Скоков.
Ӕмбырды хайадисджытæ лæмбынæг æрдзырдтой дыууæ республикæйы барадхъахъхъæнæг органты куысты приоритетондæр хæстыл, уæлдайдæр та, фыдгæнджытæй чи рамбæхс-бамбæхс кæны, уыдоны рабæрæг кæныны хъуыддагыл. Уыдоны ‘хсæн ис ахæмтæ, кæцытæ æнæзакъонæй уæй кæнынц æхсæнгæрзтæ, наркотикон буарадтæ æмæ ма аразынц æндæр бархалæн цаутæ.
Дзырдтой ма автотранспорты тыххæй дæр, кæцытæ сты Хуссар Ирыстоны территорийыл регистрацигонд æмæ сæ хицæутты фылдæр хаймæ та ис хуссарирыстойнаг машинæ скъæрыны бары гæххæттытæ. Ацы проблемæ ныридæгæн ссис актуалон, уымæн æмæ ацы машинæты хицæуттæ арæх фехалынц фæндагон фæткойтæ, бахауынц авариты æмæ дзы, хъыгагæн, уды зиæнттæ дæр æрцæуы. Уый тыххæй бадзырдтой, цæмæй дыууæ министрад ацы автотранспортæн саразой иумæйаг электронон базæ æмæ уый фæрцы фæтхалджытæ æнцондæр ахсæн уой.
РЦИ-Аланийы Фæндагон змæлды æдасдзинады управленийы сæргълæууæг МоураутыТаймураз йæ раныхасы бæстонæй æрдзырдта сæвзæргæ уавæры тыххæй.
«Ныридæгæн Хуссар Ирыстонæй Уæрæсейы Федерацимæ æрбахызтис 3 500 автомашинæйы бæрц, кæцыты хицæутты тыххæй махмæ ницы информаци ис. Уыдонæн сæ фылдæр хай эксплуатаци кæнынц Цæгат Ирыстоны æмæ статистикæ куыд æвдисы, афтæмæй арæх халынц фæндагон фæткойтæ. Азы райдианæй фæстæмæ Цæгат Ирыстоны территорийыл цы аваритæ æрцыдис, уыдонæн сæ 10% проценты хайадисджытæ уыдысты хуссарирыстойнаг машинæтæ. Ацы авариты фæмард 4 адæймаджы æмæ дзы 27 та бахаудтой рынчындонмæ. Махмæ ацы автотранспорты хицæутты тыххæй информаци кæй нæй, уый фæдыл сæ закъоны фæлгæтты нæ бон нæу бæрндзинадмæ æркæнын. Афтæмæй ацы автомашинæты шофыртæ хатынц сæхи сæрибарæй æмæ арæх халынц фæндагон фæткойтæ, уымæн æмæ æфхæрд не ‘ййафынц. Иумиаг электронон базæ саразынæн йæ хорздзинад уый мидæг ис, æмæ ахæм фæткхалджытæ бæрндзинадмæ конд хъуамæ цæуиккой, стæй ма сæ агурыныл дæр къаддæр рæстæг хардз кæниккам. Хорз уаид æмæ цалынмæ электронон базæ арæзт цæуа, уæдмæ уал, телефоны бастдзинадæй пайда кæнгæйæ, кæрæдзимæ куы дæттиккам информаци», – банысан кодта Моурауты Таймураз.
Фембæлды хайадисджытæ иууылдæр сразы сты, цæмæй дарддæр дæр æмгуыст кæной, алыварсонæй архайой эффективондзинадыл æмæ зындзинæдты сæрты та хизой иумиаг тыхтæй.
Фембæлды фæстæ нæ делегацийæн ауагътой экскурситæ Ӕфсæддон-историон мемориалон комплекс «Барбашово поле»-йы, мидхъуыддæгты министрады фæмардуæвæг кусджыты мемориалон комплексы æмæ ма Цæгат Ирыстоны мидхъуыддæгты хайады историон музейы.
ДЖИОТЫ Александр
Comments are closed, but trackbacks and pingbacks are open.