29-æм апрелы Информаци æмæ мыхуыры паддзахадон комитеты пресс-центрмæ хуынд æрцыд екатеринбургаг ирон режиссер Хъараты  Алексей æмæ Галаты Барисы номыл фонды минæвæрттæ Гæбæраты Андрей æмæ йе ‘мкъай Гаглойтэ Лианæ.

Куыд зонæм, афтæмæй анимацион кинойы режиссер сарæзта фильм «Привычка», цыран зындгонд композитор Галаты Барисы музыкæ æмæ ирон адæмы гениалон поэт Хетæгкаты Къостайы сфæлдыстад  æрцыдысты баст кæрæдзимæ. Зындгонд композитортæ бирæ хатт аздæхтой се ‘ргом Къостайы æмдзæв-гæтæм. Фæлæ Галаты Барисы музыкæ уæлдай тынгдæр агайы зæрдæтæ. Фильмы цы музыкалон темæтæ ис, уыдон дих æрцыдысты цалдæр къордыл. Лирикон сценæйы мелоди, трагикон темæ æмæ цардуаджы уавæрты мелоди.

«Привычка» æмæ ма ноджыдæр анимацион режиссер Хъараты Алексейы саразгæ дыууæ фильмы, кæцытæ арæзт æрцыдысты Галаты Барисы музыкæйыл, æвдыст æрцыдысты Мæскуы æмæ Екатеринбурджы, фестиваль «Урал-Кавказ»-ы. Ацы фильмтæн уыд стыр æнтыст. Ацы бонты та уыдон æвдыст æрцыдысты Дзæуджыхъæуы, кæцытæ ацыдысты аншлагимæ. Уырдæм æрбацыдысты æрмæст аивад æмæ культурæйы кусджытæ нæ, фæлæ ма Хъараты мыггаджы минæвæрттæ дæр. Нæ горæты анимацион фильм «Привычка»-йы презентаци ацыд Аивæдты лицейы. Уымæн æмæ 2019 азы екатеринбургаг режиссер уырдæм хуынд æрцыд мастер-класстæ уадзынмæ. Лицейы хистæркъласонтæн уый бацамыдта мультипликацион фильмтæ саразыны методтæ.

Пресс-центрмæ æрбацæуæг журналистты Галаты Барисы номыл фонды хистæр Гаглойтэ Лианæ базонгæ кодта Хъараты Алексейы биографиимæ: «Хъараты Алексей у Екатеринбурджы анимацион кинонывты режиссер, Уралаг университеты архитектурон-нывæфтыд графикæ æмæ анимацийы кафедрæйы профессор. Цæгат Ирыстон-Аланийы Хъæдгæроны хъæуæй рацæугæ, Хъараты мыггаджы минæвар. Тынг бирæ уарзы   ирон адæмы æмæ йæ мыггаджы. Уымæ гæсгæ иттæг хорз зоны йæ фыдæлты æгъдæуттæ æмæ традицитæ. Кæд æмæ гуыргæ дæр æмæ хъомыл дæр Уæрæсейы зæххыл скодта, уæддæр йæ миддуне у ирон æмæ аразы æппæт дæр, цæмæй йæ тыхтæ йæ куыд амонынц, афтæ лæггад кæна йæ адæмæн. Уый стыр хайбавæрд бахаста Уæрæсейы кинематографимæ, цæмæй фестиваль «Урал-Кавказ: связующие нити. Осетинские параллели»-йы фæлгæтты арæзт æрцыдаиккой Хетæгкаты Къостайы поэзи æмæ зынгæ композитор Галаты Барисы музыкалон уацмыс. Музыкалон-поэтикон сфæлдыстад афтæ æнæфæхицæнгæнгæ кæрæдзийыл бабæттын æнцон аразæн нæ уыд. Фæлæ режиссер иронау кæй хъуыды кæны, уымæн æвдисæн стæм мах абон нæхæдæг», – дзырдта Гаглойтэ Лианæ.

Дарддæр режиссер йæхæдæг æрдзырдта йæ цард æмæ архайды тыххæй. «Æз райгуырдтæн Свердловскы, фæлæ хорз хъуыды кæнын, мæ бинонты ‘хсæн куыд хъахъхъæд цыдысты ирон традицитæ. Мæ фыдæлты ‘хсæн уыд ирон, уырыссаг, немыцаг æмæ украинаг нацийы минæвæрттæ. Фæлæ æз мæхи алы хатт дæр æнкъардтон иронæй. Ныртæккæ Уралы архайы ирон диаспорæ, уыдонимæ æз кæнын активон куыст, уымæ гæсгæ цалынмæ мæ анимацион фильм аразынмæ нæ бавнæлдтон, уæдмæ уыдонимæ, ома, ирон диаспорæйы уæнгтимæ уагътон беседæтæ. Къостайы сфæлдыстадимæ иттæг хорз зонгæ дæн, фæлæ уæддæр уæлæмхас зонæнтæ райсын алы хатт дæр пайда вæййы. Ирон диаспорæйы æхсæнад мын стыр æххуыс бакодтой, бирæ ног æмæ цымыдисон хабæрттæ базыдтон, æмæ мын уый хорз ахъаз фæцис фильм аразыны рæстæджы. Къоста уыдис фæндагамонæг стъалыйы хуызæн ирон композитортæн. Йæ поэтикон темæтæ сæрмагондæй баст сты уарзондзинад, пейзажон арæнтæ рауæрæхдæр кæнынимæ. Йæ уацмысты вокалон циклты фæзынд хорз сбадт композитор Галаты Барисы музыкæйыл. Мæ хъуыдымæ гæсгæ алы адæмæн дæр йæ удварны рæзтæн сæйраг ахъазгæнæг вæййы йæ культурæйы æмвæзад. Æндæр адæмтæ йын фæаргъ кæнынц, цы бынтæ сын ис, цы бацис сæ бон бахъахъхъæнын фыдæлтæй, уымæ гæсгæ. Ирон адæмæй ивгъуыд æнусы культурæйы рæзтмæ стыр хайбавæрд чи бахаста æмæ дзы хъæздыг сфæлдыстадон бынтæ чи ныууагъта, уыдонæй уыдысты Къоста дæр æмæ фыццаг ирон композитор, этнолог æмæ фольклорист Галаты Барис дæр. Æз дарддæр дæр цымыдис кæндзынæн ацы дыууæ гениалон адæймæгты сфæлдыстадмæ», – дзырдта режиссер.

Журналисты фарст, ома, хъавыс æви нæ «Нарты эпос»-ыл дæр  анимацион фильм саразынмæ, уый ахæм дзуапп радта, зæгъгæ, цæмæй фильм саразай, уый тыххæй хъæуы стыр фæндондзинад. «Ацы фарст мæ зæрдмæ цæуы, фæлæ æз абон уымæ цæттæ нæма дæн. Мæ миддуне мæм нырма ницы дзуры. Цæмæй Нарты эпосыл фильм саразай, уый тыххæй æппынæдзух хъæуы Ирыстоны цæрын, цæмæй банкъарай алы эпизод дæр. Афтæ никуы вæййы, цæмæй режиссеры æрфæнда æмæ æрмæст фæндонмæ гæсгæ снывæнда киноныв. Зæгъæм, мæн рагæй фæнды мæ бинонтыл фильм саразын, фæлæ абоны онг дæр мæ бон йæ реализаци кæнын нæу, уæлдæр цы аххосæгты кой скодтон, уыдонмæ гæсгæ. Раст зæгъгæйæ мæм æрмæджытæ фагæй фылдæр ис, фæлæ уæддæр… Стыр бузныг зæгъын мæ фæнды Гаглойтэ Лианæйæн, уый мын идейæ радта, цæмæй Къостайы уацмысыл ахъуыды кæнон фильм  аразыны рæстæджы. Сæрæй йын йæ ныхас ницæмæ æр-дардтон, фæлæ гæххæтт мæ къухмæ куы райстон æмæ иу фарс ирон адæмы хорздзинæдтæ куы фыстон, иннæ фарс та, æвзæрæй сæм цы ис, уыцы фæзындтытæ, уæд бамбæрстон, Лианæ мын цы уацмысы кой кæны, сæрмагондæй мæ ахæм сюжет кæй хъуыд. Цыфæнды анимацион фильмы дæр сæйраг бынат ахсы музыкæ. Галаты Барисы музыкæйы раз куыд гæнæн уыд, æндæр композиторыл хъуыды кæнын. Удæгас персонажтæ агурыныл та мын баххуыс кодта Гæбæраты Андрей. Уый систа цалдæр адæймаджы портреты. Уыдоныл хъуыд националон формæ скæнын. Иууыл хуыздæр персонажыл нымад æрцыд Багаты Мурат (Туля). Уыцы къамтæ исгæйæ спайда кодтам сæрмагонд программæйæ. Фильмы цы адæм ист æрцыдысты, уыдон се ‘ппæт дæр сты удæгас адæймæгтæ», –  дзырдта Хъараты Алексей.

Зынгæ режиссер у бирæ æхсæнадæмон фестивалты хорзæхты хицау. Уый сарæзта ахæм мультипликацион фильмтæ, куыд «Лихой капитан», «Кот в колпаке», «Жильцы старого дома», «Добро пожаловать» æмæ æндæртæ.

Уазæгты Марфа

Comments are closed, but trackbacks and pingbacks are open.