Бонæй-бонмæ арфдæр æмæ мидисджындæр кæнынц Уæрæсейы Федераци æмæ Республикæ Хуссар Ирыстоны ‘хсæн цы хæлардзинад æмæ æмгуыстады бастдзинæдтæ ис, уыдон. Кæд ныры уæззау дуджы уæз нæ республикæ дæр йæхиуыл бавзæрста æмæ æвзары, уæддæр, алыгъуызон цæлхдуртæм æнæкæсгæйæ, республикæйы цард иу ран нæ лæууы, бонæй бонмæ фылдæр кæнынц алыгъуызон  ногарæзт объекттæ, хуыздæрæрдæм ивы æппæт структурæты куыст æмæ архайд, раздæры  азтимæ абаргæйæ, зæрдæ рухс кæны, Хуссар Ирыстоны æндидзынадæн ахъазгæнæг Инвестицион программæ куыд æххæст цæуы, уымæй.

Уымæй   уæлдай  куыст  цæуы ног, социалон-экономикон программæтæ аразын  æмæ  сæ  царды ауадзыныл. Уыдæтты фæдыл нæм арæх æрцæуынц нæ уæрæсейаг коллегæтæ дæр, æппæт фарстатæ дæр бынаты æнцондæр скъуыдздзаггæнæн кæй сты, уый хынцгæйæ. Ацы бонты дæр та нæм фæуазæг сæрмагонд, официалон делегаци.

Хуссар Ирыстонмæ кусæгон балцы æрцæуæг делегацийы сконды уыдысты Уæрæсейы Федерацийы Æдасдзинады советы Секретары хæдивæг Рашид Нургалиев, Уæрæсейы Федерацийы Президенты Администрацийы Фæсарæйнаг бæстæтимæ æхсæнрегионалон æмæ культурон бастдзинæдты фæдыл Управленийы хистæр Игорь Маслов æмæ æндæр официалон адæймæгтæ.

Республикæмæ официалон балцы æрцæуæг делегацийы  уæнгтимæ фембæлд Президент Бибылты Анатоли. Кусæгон æмбырды ма хайад райстой Уæрæсейы Федерацийы Уæлвæткон æмæ Æххæстбарджын Минæвар Республикæ Хуссар Ирыстоны Марат Кулахметов, Республикæ Хуссар Ирыстоны Хицауады Сæрдар Бекъойты Геннади, Республикæ Хуссар Ирыстоны Президенты Администрацийы Къухдариуæггæнæг Козаты Игорь, Æдасдзинады советы секретарь Уалыты Валери, Архитектурæ æмæ коммуналон хæдзарады министр Зæгъойты Эдуард.

Æмбырды райдианы Бибылты Анатоли уазджытæн загъта бузныджы æмæ арфæйы ныхæстæ се ‘рцыды тыххæй, сæ иумæйаг куыст нысанмæздæхт æмæ хæрзиуæгон кæй уыдзæн, уымæй ныфс бавæргæйæ.

– Нæ паддзахадты ‘хсæн æмгуыстады фæлгæтты цы процесстæ цæуы, уыдон тынг ахсджиаг сты. Уыдонмæ хауы Инвестицион программæ дæр, кæцы ныртæккæ ис йæ реализацийы кæронбæттæн этапыл, – загъта Бибылты Анатоли.

Республикæ Хуссар Ирыстоны Президент уæлдай хъусдард аздæхта  фактон æгъдауæй æххæстæрцæуæг дыууæ программæмæ: республикæйы энергоæдасдзинады ифтонгад æмæ экономикон рæзты программæтæм.

– Нæ республикæйæн стратегион æгъдауæй тынг ахсджиаг у энергоæдасдзинад. Дыууæ боны фæстæ баиу кæндзыстæм уыцы хахх. Республикæ-иу стыр проблемæтыл арæх сæмбæлд, электроэнерги-иу куы ахицæн, уæд-иу  адæм баззадысты æнæ рухсæй, æмæ уый та, æмткæй сисгæйæ, негативонæй æндæвта Хуссар Ирыстоны цардыл.

Дыккаг ахсджиаг проект та у, ныртæккæ Уæрæсейы Федерацийы профилон министрадты æмразыдзинады стадийыл чи ис, уый – экономикон рæзты программæ, кæцы махæн ратдзæн ахадæн фадæттæ размæцыды хъуыддаджы, Уæрæсейы æрдыгæй цы дотаци исæм, уый æмвæзад, иумиагæй сисгæйæ, фæныллæгдæр кæнгæйæ, куысты бынæттæ фæфылдæр кæнынæй райдайгæйæ, кæцы хуыздæрырдæм фæзындзæн Хуссар Ирыстоны цæрæг адæмы царды æмвæзад фæбæрзонддæр кæныныл, – загъта республикæйы Президент.

Бибылты Анатоли стыр бузныджы ныхæстæ загъта Уæрæсейы Федерацийы уæлдæр къухдæриуæгады адресыл, афтæ ма чидæриддæр хайадисæг у  Хуссар Ирыстонæн æххуыс кæнын æмæ фарсхæцынады хъуыддаджы, уыдонæн се ‘ппæтæн дæр.

Рашид Нургалиев дæр йæхи рады банысан кодта, Хуссар Ирыстонмæ йæ кусæгон балцы фæлгæтты кæй фæнд кæны республикæйы регионалон æдасдзинады фарстатимæ, æмæ коронавирусон инфекцийы ныхмæ тох кæныны куыстимæ базонгæ уæвын. Уый загъта, ныфс æй кæй ис йæ хуссарирыстойнаг коллегæтимæ иумæ ахадæн, нысанмæздæхт куыст бакæнынæй.

Официалон делегацийы уæнг Игорь Маслов æмбырды хайадисджыты хъусдард аздæхта 2022-2025 азтæн Республикæ Хуссар Ирыстоны социалон-экономикон рæзтæн ахъаз кæныны программæйы ахсджиагдзинадмæ:

Уый у тынг нысаниуæгджын документ, æмæ у республикæйы Президент æмæ Хицауады æнгом куысты фæстиуæг. Мах хъуамæ æнæмæнг æмразыдзинадмæ æркæнæм фæстаг позициты æхсæнведомствойон æмвæзадыл, æмæ хъуамæ хаст æрцæуа республикæйы æхсæнад æмæ Парламентмæ, æруынаффæ йыл кæнынмæ æмæ йæ сфидар кæнынмæ. Ацы азты æххæст цæудзæн нысанмæздæхт æмæ æнгом куыст, кæцы здæхт уыдзæн уымæ, цæмæй 2025 азы  Хуссар Ирыстон равдиса Цæгат Кавказы федералон зылды социалон-экономикон рæзты фæстиуджытæ: экономикæ æмæ æппæт социалон гарантиты рæзтæй райдайгæйæ, суанг куыстмызд фæфылдæр кæныны онг, – загъта уый.

Игорь Маслов дæр ныфс бавæрдта, республикæйы размæцыды хъуыддаджы цыфæнды ныхдуртæ ма уа, уæддæр иуварс кæй цæудзысты иумæйаг тыхтæ æмæ архайды фæрцы.

 

 

Comments are closed, but trackbacks and pingbacks are open.