Фæстиуæгджын куыст

Адӕмон сфӕлдыстады республикон центр (директор РХИ-йы культурӕйы сгуыхт архайӕг Гуыцмӕзты Елизаветӕ) 2019 азы бакодта хӕрзиуӕгон куыст. Сӕйраг мадзӕлтты план ӕххӕст ӕрцыд кӕронмӕ ӕмӕ банысангонд ӕмгъуыдтӕм. Азы райдианы бакуыст ӕрцыд ӕртӕ фестиваль-конкурсы уагӕвӕрд: эстрадон зарджытӕ «Ирыстоны хъӕлӕстӕ», фыццаг ирон национ зарджыты конкурс «Айзӕлд», театруарзджыты коллективты ӕртыккаг фестиваль-конкурс «Ӕппӕт дуне – театр» ӕмӕ республикон фӕндзӕм фотоконкурс «Хуссар Ирыстон-2019 аз».   Ацы уагӕвӕрдтӕ се ‘ппӕт дӕр ӕрвыст ӕрцыдысты горӕты скъолатӕ, Культурӕйы хӕдзӕрттӕ ӕмӕ клубтӕм. Афтӕ ма мадзӕлттӕ ауадзыны тыххӕй фыст ӕрцыдысты сценаритӕ, бацӕттӕ кодтой мадзӕлттӕ ауадзыны фӕдыл ӕнӕмӕнгхъӕуӕг документтӕ. Центры коллектив ӕнгом ӕмгуыстад кӕны республикӕйы дзыллон хабархӕссӕг фӕрӕзты кусджытимӕ.

 2019 азы 16 августы Анахарсисы номыл республикон библиотекӕйы кӕсӕн залы уагъд ӕрцыд республикон нывты фӕндзӕм конкурс «Хуссар Ирыстон-2019 аз». Уымӕн йӕ нысан уыд республикӕйы цӕрджыты ӕнцой балӕууын ӕмӕ сфӕлдыстадон активондзинады рӕзт. Фотоконкурс уагъд ӕрцыд ахӕм номинациты: Хуссар Ирыстон ӕмбӕстӕгты цӕстӕнгасӕй, Хуссар Ирыстоны зӕрдылдарӕн бынӕттӕ,  рагон цыртдзӕвӕнтӕ ӕмӕ Цхинвал абон. Ацы фотоконкурсы хайад райстой ӕндӕр ӕмӕ ӕндӕр кары 16 адӕймаджы ӕмӕ ӕдӕппӕт бавдыстой 86 нывы, уыцы нымӕцы «Хуссар Ирыстоны зӕрдылдарӕн бынӕттӕ ӕмӕ рагон цыртдзӕвӕнтӕ»-43, «Цхинвал абон»-ы тыххӕй-16 ӕмӕ «Хуссар Ирыстон ӕмбӕстӕгты цӕстӕнгасӕй»-27. Ацы конкурсы фӕстиуджытӕм гӕсгӕ 26 августы Къостайыхъӕуы уыд нывты равдыст, кӕцы уыд Республикӕ Хуссар Ирыстоны Хӕдбардзинады акт банымайыны бӕрӕгбоны цытӕн. Уым ма уыд конкурсы хайадисджыты хорзӕхджын кӕныны церемони дӕр. Йӕ хайадисджытӕ се ‘ппӕт дӕр хорзӕхджын ӕрцыдысты дипломтӕй, уӕлахиздзаутӕ ӕмӕ призон бынӕтӕ бацахсджытӕ та хорзӕхджын ӕрцыдысты Кады грамотӕтӕ ӕмӕ ӕхцайы призтӕй. 19-ӕм майы Киноконцертон зал «Чермен»-ы уыд ирон национ зарӕг «Айзӕлд»-ы республикон фыццаг фестиваль-конкурс ӕмӕ дзы уыдысты хицӕн ӕххӕстгӕнджытӕ, вокалон къорд (дуэт,трио, квартет ӕмӕ ӕндӕртӕ), вокалон-инструменталон ансамбль. Фестивалы нысан ӕмӕ хӕстӕ уыдысты: республикӕйы фӕсивӕды адӕмон сфӕлдыстадмӕ ӕрбаввахс кӕнын, се ‘нцой балӕууын ӕмӕ сын уавӕртӕ сифтонг кӕнын, кӕрӕдзийы фӕлтӕрддзинадӕй пайда кӕнын, ирон национ зарӕг ӕххӕстгӕнджыты раргом кӕнын.

Ацы фестиваль-конкурсы ӕдӕппӕт хайад райстой 22 адӕймаджы ӕмӕ уыдысты куыд горӕтӕй, афтӕ республикӕйы ӕртӕ районӕй дӕр. Се ‘хсӕн уыдысты хицӕн ӕххӕстгӕнджытӕ, вокалон-инструменталон ансамбль ӕмӕ иу та вокалон къорд. Жюрийы уынаффӕмӕ гӕсгӕ фестивалы уӕлахиздзаутӕ систы: Дзауы районы Культурӕйы хайады нӕлгоймӕгты хор ацы районы Хуыцъейы хъӕуы ансамбль «Нартӕ», Знауыры поселокӕй Тхелидзе Алекси ӕмӕ горӕт Цхинвалӕй та Гӕбӕраты Сослан. Дыккаг призон бынат бацахста Цхинвалы районы Тъбеты хъӕуы минӕвар Джусойты Кристинӕ, ӕртыккаг призон бынӕттӕ та бацахстой Знауыры районы Гъаристауы минӕвар Сиукъаты Анзор ӕмӕ Дзауы районы Кировы хъӕуӕй Джиоты Къоста. Ацы фестиваль-конкурсы цыппӕрӕм бынат рамбылдтой Ӕлборты Оксанӕ ӕмӕ Бӕззаты Ульянӕ. Уӕлахиздзаутӕ хорзӕхджын ӕрцыдысты Кады грамотӕтӕ ӕмӕ ӕхцайы призтӕй, ӕппӕт хайадисджытӕ та – дипломтӕй.

19 майы киноконцертон зал «Чермен»-ы ауагъдӕуыд бинонты ӕртыккаг республикон фестиваль-конкурс ахӕм номимӕ «Бинонтӕ – курдиӕтты стъалыгуыппар». Уым хайад райстой 9 бинонтӕ, ӕдӕппӕт 20 адӕймаджы, хайад дзы райстой горӕты иумиагахуырадон скъола, афтӕ ма республикӕйы ӕртӕ районы минӕвӕрттӕ дӕр. Ацы конкурсы хӕстӕ ӕмӕ нысӕнттӕ та уыдысты: курдиатджын бинонты ӕвзыгъддзинад раргом кӕнын ӕмӕ сын баххуыс кӕнын, ахӕм бинонты ӕхсӕнад ӕмӕ культурӕйы архайдмӕ ӕрбахонын ӕмӕ ӕндӕртӕ.

Жюрийы хатдзӕгтӕм гӕсгӕ фыццаг бынӕттӕ бацахстой Цхинвалы районы Дменисы хъӕуӕй Дудайты бинонтӕ, Цхинвалы горӕтӕй Тыджыты бинонтӕ, Къуайсайы горӕтӕй – Зассеты бинонтӕ ӕмӕ Дзауы поселокӕй та Кокойты бинонтӕ. Дыккаг призон бынат радтой Кировы хъӕуӕй Джиоты Къоста ӕмӕ Танделаты Луизӕйӕн ӕмӕ Цхинвалы фыццаг астӕуккаг скъолайӕ – Гӕбӕраты Сослан ӕмӕ Зӕгъойты Дианӕйӕн. Ӕртыккаг призон бынат рамбылдтой Кокойты Иван ӕмӕ Кокойты Амандӕ, Цхинвалы районы Тъбеты хъӕуӕй. Цыппӕрӕм бынӕтты хицӕуттӕ систы Знауыры районы Гъаристауы хъӕуӕй Сиукъаты Анзор йӕ бинонтимӕ ӕмӕ  3-ӕм астӕуккаг  скъолайӕ – Гобозты бинонтӕ.

24-25-ӕм ноябры та ауагъдӕуыд республикон ӕртыккаг фестиваль-конкурс, театралон аивад чи уарзы, уыцы коллективтӕн ахӕм номимӕ «Ӕппӕт дуне – театр». Уый уагъд цыд театралон къуырийы фӕлгӕтты фӕсивӕды монон-удварны хъомылады программӕмӕ гӕсгӕ. Йӕ нысан ӕмӕ хӕстӕ уыдысты, цӕмӕй рӕза хӕдархайгӕ театралон аивад, кӕрӕдзийы фӕлтӕрддзинадӕн уавӕртӕ ссарын, Нарты эпос ӕмӕ Хетӕгкаты Къостайы сфӕлдыстад парахат кӕнын, фыдыбӕстӕйы культурӕйы ӕргъадтӕм бафтауын ӕмӕ ӕнд. Ацы фестивалы хайад райстой горӕт ӕмӕ районтӕй 5 хӕдархайгӕ коллективы, номхуындӕй та 9-ӕм скъола, Хуыцъейы хъӕууон Культурӕйы хӕдзар ӕмӕ Знауыры районы Культурӕйы хӕдзары минӕвӕрттӕ. Фестивалы уыдысты ахӕм номинацитӕ, куыд «Хуыздӕр спектакль», «Хуыздӕр режиссерон куыст», «Хуыздӕр актерон куыст». «Хуыздӕр режиссерон куыст»-ы номинацийы фыццаг бынат лӕвӕрд ӕрцыд 9-ӕм скъолайы драмкъордӕн, уыдон бацӕттӕ кодтой ӕмӕ сценӕмӕкӕсджыты размӕ рахастой инсценировкӕ «Сидзӕртӕ». Инсценировкӕйы автор ӕмӕ режиссер-ӕвӕрӕг у Хуссар Ирыстоны сгуыхт артист Битеты Миленӕ. «Хуыздӕр актер»-ы куысты номинацийӕ та фыццаг бынат бацахста Кировы хъӕууон Культурӕйы хӕдзар, сӕвӕрдтой Санахъоты Георгийы иуактон пьесӕ «Гацыры хабӕрттӕ», йӕ разамонӕг Танделаты Луизӕ. Ацы номинацийы дыккаг бынат бацахста Хуыцъейы хъӕууон Культурӕйы хӕдзар. Уыдон равдыстой Хетӕгкаты Къостайы «Фатимӕ»-мӕ гӕсгӕ спектакль, инсценировкӕйы автор у Кокайты Тотрадз. Ӕртыккаг бынат саккаг кодтой Дменисы хъӕууон клубӕн, равдыстой Хетӕгкаты Къостайы «Си-дзӕргӕс»-ӕй скъуыддзаг ӕмӕ Знауыры районы Культурӕйы Хӕдзар, равдыстой Саулохты Мухтары пьесӕ «Знауыр». «Хуыздӕр спектакль»-ы номинацийы фыццаг бынат бацахста Хуыцъейы Культурӕйы хӕдзары коллектив Къостайы поэмӕ «Фатимӕ»-мӕ гӕсгӕ ӕвӕрд спектаклӕй, дыккаг та уыд Дменисы хъӕуы коллектив. Уӕлахиздзаутӕ хорзӕхджын ӕрцыдысты грамотӕтӕ ӕмӕ ӕхцайы призтӕй, ӕппӕт хайадисджытӕ та дипломтӕ ӕмӕ зӕрдылдарӕн лӕвӕрттӕй.

ХУЫБИАТЫ Никъала