3 июлы Фæндагон змæлды æдасдзинады инспекцийы кусджытæ цытджын æгъдауæй банысан кодтой сæ профессионалон бæрæгбон – управленийы сырæзтыл сæххæст 85 азы. Фæндагон инспекцийы кæрты уагъд æрцыд цытджын ралæуд рæнхъон скондæн æмæ ардæм фæуазæг сты мидхъуыддæгты министры хæдивæг Дзабиты Æхсар, криминалон милицийы хистæры хæдивæг Пухаты Инал æмæ ма ведомствойы æндæр бæрнон кусджытæ.
Дзабиты Æхсар управленийы рæнхъон скондæн зæрдиаг арфæйы ныхæстæ загъта йæхи номæй дæр æмæ ма бæстæйы Президент Бибылты Анатоли æмæ мидхъуыддæгты министр Пухаты Мерабы номæй дæр.
«Фæндагон змæлды æдасдзинады инспекторты архайд кæд цæсты тынг нæ ахады, уæддæр æй мах зонæм, кæй у уæззау æмæ æнæмæнгхъæуæг куыст. Сымахæн уæ разы æвæрд ис бирæ бæрнон хæстæ – хъахъхъæнут алыгъуызон фыдбылызтæй не ‘мбæстæгты, æмæ уын мæ зæрдæ зæгъы ноджы фылдæр æнтыстытæ. Кæд æмæ абоны бон нæ Президент Бибылты Анатолийы ардæм æрбацæуынмæ нæ равдæлд, уæддæр дзы рох нæ баззадыстут», – загъта Дзабиты Æхсар.
Йæ дæлбар æмкусджытæн ма раарфæ кодта управленийы сæргълæууæг Джиоты Алан дæр, кæцы банысан кодта, зæгъгæ, инспектортæ æмбæлон куыст куы нæ кодтаиккой, уæд нæм аваритæ бирæ фылдæр æрцыдаид.
Цытджын мадзалы ма хорзæхджын æрцыдысты цалдæр инспекторы, кæцытæн ис хорз æнтыстытæ сæ куысты. Уымæй уæлдай ма хорзæхтæ радтой æрыгон кусджытæн дæр, кæцытæ ныридæгæн сæ разы лæууæг хæстæ æххæст кæнынц цæсгомджынæй. Рох нæ баззадысты ацы управленийы ветерантæ дæр, – цалдæры дзы схорзæхджын кодтой майдан «Ветеран МВД»-йæ.
Джиоты Александр
Comments are closed, but trackbacks and pingbacks are open.