Фӕндӕгты арӕзтады дӕсны

   Адӕм хуыз ӕмӕ кондӕй куыд алыгъуызӕттӕ сты, афтӕ ӕндӕр ӕмӕ ӕндӕр вӕййы сӕ ахаст дӕсныйад райсынмӕ дӕр. Уый фауинаг миниуӕг нӕу, уымӕн ӕмӕ не рвылбонон царды фембӕлӕм цымыдисон аскъуыддзаггӕнинаг фарстатыл, бакӕнинаг ӕнӕмӕнгхъӕуӕг куыстытӕ ӕххӕст кӕныныл. Раст у, уыдонӕй сӕ иутӕ ӕнцондӕр ӕххӕстгӕнӕн вӕййынц, иннӕтӕ та – зындӕр. Ӕниу, ӕнцонтӕй кӕй ахицӕн кӕнӕм, уымӕ дӕр арӕхстджын ӕмӕ аудгӕ ахаст равдисын фӕхъӕуы. Афтӕ нӕ бакодтай, ахӕм цӕстуарзон ӕмӕ йӕ алыварсонӕй дӕр нӕ сӕххӕст кодтай, уӕд хъуыддагӕй ницы рацӕудзӕн, бакӕнгӕ куыст ӕмӕ зынаргъ рӕстӕг ӕнӕхъуаджы фӕуыдзысты.

   Ӕввахсдӕр базонгӕ уӕм, ӕдзухдӕр куыстыл лӕуд чи у, йӕ хъуыддаджы чысыл ӕмӕ стыр фӕзилӕнтӕм дӕр иугъуызон аудгӕ цӕстӕнгас чи дары, уыцы адӕймагимӕ. Уый та у Лолоты Захар. Ӕвӕццӕгӕн, нӕ республикӕйы ӕмбӕстӕгтӕй йӕчи нӕ зоны, кӕнӕ та йын йӕ хорзы кой чи нӕ фехъуыста, ахӕм зын ссарӕн у. Ӕниу ӕй лӕгӕй лӕгмӕ дӕр ма зонӕт, фӕлӕ йын йӕ фыдӕбоныл зӕрдиагӕй чи нӕ бацин кӕны, йӕ бакӕнгӕ арӕзт фӕндӕгтыл чи атезгъо кӕны, уыдон ын зӕрдиаг арфӕтӕ куынӕ хъуамӕ ракӕной. Лолойы фырт ӕдзух змӕлды ис, кӕддӕриддӕр куыстмӕ ӕхсайы йӕ зӕрдӕ ӕмӕ йӕм уӕнгрогӕй фӕтагъд кӕны. Афтӕ у йӕ ахуыр, йӕ зондахаст ӕмӕ дзы нӕ хицӕн ӕмӕ иппӕрд кӕны. Уый дысӕсчъилӕй ӕрлӕууы йӕ бакӕнинаг куысты уӕлхъус ӕмӕ йӕ цалынмӕ ахицӕн кӕны, уӕдмӕ йын нӕ вӕййы ӕрӕнцой. Ӕрмӕст зӕгъын хъӕуы, иунӕгӕй нӕ, фӕлӕ коллективы уӕнгтимӕ.

Захары хорздзинад ӕмӕ раппӕлинаг миниуджытӕй иу уый у, ӕмӕ фылдӕр хатт йӕхӕдӕг дӕр фӕархайы хуымӕтӕг кусджытимӕ сӕ хӕс ӕххӕст кӕныныл. Уый уымӕн зӕгъын, ӕмӕ прорабы ном хӕссы, фӕлӕ уӕддӕр физикон куыстӕй йӕхи нӕ тигъ кӕны. Афтӕ йын ӕнцондӕр у, уӕд цыма куыст тагъддӕр ӕмӕ гъӕдджындӕрӕй ахицӕн уыдзӕн, афтӕ йӕм дзуры йӕ зӕрдӕ.

   Лолоты Захар райгуырд Сталиниры районы Годжиты хъӕуы 1948 азы, фӕстӕдӕр ӕрлыгъдысты Дменисмӕ, стӕй та нӕ уӕды областы сӕйраг горӕтмӕ ӕмӕ астӕуккаг ахуырад дӕр райста ам. Хъомылады аттестат куы райста, уӕд йӕ документтӕ бадӕтта Хуссар Ирыстоны паддзахадон пединститутмӕ, фӕлӕ конкурсы нӕ ацыд. 1968 азы йӕм ӕрсидтысты Советон Ӕфсады рӕнхътӕм, Украинӕйы зӕххыл намысджынæй баслужбӕ кӕныны фӕстӕ ӕрыздӕхт йӕ уарзон Ирыстонмӕ. Ӕвӕццӕгӕн, дӕсныйад райсын бынтон ӕнӕхъуаджы нӕ вӕййы. Ӕппӕтӕй ӕххӕст ӕмӕ ифтонг фӕндӕгтӕ кӕуылты не ‘рзилын кӕндзысты адӕймаджы ӕмӕ йын свӕййынц удӕнцой ӕмӕ ныфсы хос. Лолойы фырт йе ‘взонджы бонты фӕндӕгтыл арӕх кӕй цыди, уымӕн ӕввахс айста йӕ зӕрдӕмӕ ацы дӕсныйад ӕмӕ фӕндвидарӕй аскъуыддзаг кодта ацы хаххыл сахуыр кӕнын. 1973 азы сӕххӕст йӕ бӕллиц – ахуыр кӕнын райдыдта Житомиры автофӕндӕгты техникумы ӕмӕ йӕ каст фӕци 1976 азы. Ахуыры рӕстӕджы уыд цӕвиттойнаг, курсы уыд фӕскомцӕдисон организацийы секретарь, ӕхсӕнадон куысты активон хайадисӕг. Йӕ дипломон куыстсæххæст кодта иттӕг хорз бӕрӕггӕнӕнтимӕ ӕмӕ йӕ кусынмӕ арвыстой Киевы фӕндаджы арӕзтады 41-ӕм управленимӕ. Йӕ хӕстӕ ӕххӕст кӕнынмӕ ӕрӕвнӕлдта зӕрдиагӕй ӕмӕ дзы уымӕ гӕсгӕ райгонд уыдысты йӕ хистӕртӕ. Уыцы бынаты бирӕ нӕ афӕстиат, йӕ ныййарӕг мад рынчынтӕ хаста ӕмӕ ратагъд кодта  Ирыстонмӕ. 1977 кусын райдыдта экспедиторӕй Цхинвалы районы фӕндӕгты хайады. Рӕстӕджы цыдимӕ хуыздӕр кодта йӕ дӕсныйад дӕр, сси прораб ӕмӕ абоны бон дӕр йӕ хӕстӕ ӕххӕст кӕны ацы номимӕ. Районы куы куыста, уӕд йӕ хистӕр уыд Харебаты Леонид. Нӕ сабыруарзаг адӕм гуырдзыйы хӕсты рӕстӕджы бирӕ удхайраг бонтӕ фервыстой, Хуссар Ирыстонӕн Зары фӕндаг сси царды фӕндаг. Ацы фӕндаг саразыныл уӕхскуӕзӕй чи бафыдӕбон кодта, уыдон нымӕцмӕ ахӕссын хъӕуы Лолоты Захары дӕр.

   Фӕндаг царды дадзин у, фӕзӕгъынц. Уый зӕрдыл даргӕйӕ, Лолоты Захар райдианӕй фӕстӕмӕ йӕ сӕйраг хӕсыл нымайы, цӕмӕй нӕ фӕндӕгтӕ уой нывыл арӕзт.

Адӕймаг ӕнӕзӕрдӕхудт фӕллой куы фӕкӕны, йӕ саразгӕ хъуыддӕгтӕ ӕнӕзӕрдӕхудтӕй куы феххӕст кӕны, уӕд ахӕм намысджын адӕймаджы кад бӕрзонд ӕвӕрд вӕййы ӕхсӕнады раз. Захары бирӕазон ӕнӕзӕрдӕхудт фӕллойӕн дӕр нӕ республикӕйы разамынад скодта ӕвӕрццаг аргъ ӕмӕ йын лӕвӕрд ӕрцыд Республикӕ Хуссар Ирыстоны сгуыхт инженеры кадджын ном.

Кады фӕндагыл рацыдтӕ, сгуыхт инженер ӕмӕ йӕ дарддӕр дӕр дӕ хӕрзиуӕгон куыстӕй кадимӕ хӕссын фӕраз бирӕ азты.

ХУЫБИАТЫ Никъала