Мæскуыйы Æппæтдунеон базарады центры уагъд æрцыд экстремистон идеологи парахат кæныны проблемæты фæдыл III Æхсæнадæмон конференци. Мадзалы инициатор уыд Уæрæсейы мидхъуыддæгты министрад. Хайад дзы райстой УФ-йы Мидхъуыддæгты министрады къухдариуæгад министры хæдивæг Андрей Храповы сæргълæудæй, УФ-йы Президенты управленийы æхсæнадон проектты эксперттæ, УФ-йы Фæсарæйнаг хъуыддæгты министрады æмæ Роскомнадзоры минæвæрттæ, УФ-йы Национ антитеррористон комитет, ахуырадон организациты кусджытæ æмæ фæсарæйнаг уазджытæ 40 бæстæйæ фылдæрæй.
Конференцийы хайад райста хуссарирыстойнаг делегаци дæр криминалон милицийы хистæр Мамиты Эриславы сæргълæудæй.
Андрей Храпов йæ раныхасы банысан кодта, зæгъгæ ныры дуджы экстремизмы идеологийы апарахаты темæ у иууыл тæссагдæр æмæ актуалондæр.
«Мах арæх æвдисæн вæййæм, æнæхъæн паддзахадтæ куыд стыр зиæнттæ баййафынц, экстремисттæ куы фæпайда кæнынц нырыккон информацион технологитæй. Сæ нысан вæййы, цæмæй паддзахады социалон къабазы, йæ экономикæйы æмæ политикон царды сæвзæра æндыгъд уавæр, æмæ уый фæстиуæгæн, алыгъуызон чъизи методтæй пайда кæнгæйæ, фæивой бæстæйы консти-туцион уагæвæрд, кæнæ саразой хуызджын революци. Уæрæсейы мидхъуыддæгты органтæ бирæ азты дæргъы райстой фæлтæрддзинад ахæм хуызы фæзындтимæ тох кæныны хъуыддаджы, ома, развæлгъау бæлвырд кæнынц экстремисттимæ баст гой-мæгты æмæ сæ фыдракæндтæ саразын нæ бауадзынц. Æгæрыстæмæй ма алыгъуызон æнæзакъонон санкциты рæстæджы дæр æнтыстджынæй тох кæнæм сæ ныхмæ æмæ адæмы сабырад хъахъхъæнæм», – зæгъы УФ-йы министры хæдивæг.
Андрей Храповы ныхæстæм гæсгæ рагæй фæстæмæ кæцыдæр бæстæтæ Уæрæсемæ дарынц æвзæр зæрдæ æмæ уый фæстиуæгæн барæй парахат кæнынц нацизм, Уæрæсейы истори сæхирдыгонау ивынц, сепаратистты разæнгард кæнынц растадтæм æмæ мидæггагон хæстмæ.
Экстремизмы ныхмæ цахæм методтæй пайда кæнынц, уый фæдыл бæстон æрдзырдта УФ-йы мидхъуыддæгты министрады экстремизмы ныхмæ тохы фæдыл сæйраг управленийы хистæр Олег Ильиных. Æрæмбырдуæвджытæн радзырдта, зæгъгæ Украинæйы цæуæг сæрмагонд æфсæддон операцийы фæстиуæгæн экстремизм ноджы фæкарздæр æмæ йæ ныхмæ архайын хъæуы дывæр тыхтимæ.
«Экстремизмон змæлдмæ сайын райдыдтой уæрæсейаг æмбæстæгты æмæ лигъдæтты нырыккон технологитæй пайда кæнгæйæ.
Æрмæст ацы аз уæрæсейаг интернет-тыгъдады фæзындис 250 минæй фылдæр экстремистон мидисимæ æрмæджытæ æмæ бонæй-бонмæ ноджы фылдæр кæнынц. Уымæ гæсгæ федералон службæты бахъуыдис ноджы æнгомдæр архайын фыдгæнджыты ныхмæ, арæхдæр уадзæм æнтыстджын профилактикон мадзæлттæ цæрджытимæ, уæлдайдæр та æрыгон фæлтæримæ», – банысан кодта Олег Ильиных.
Мадзалы ма раныхас кодтой Абхазы, Вьетнамы, Китайы, Хъыргъыстаны, Серби-йы, Мьянмайы, Сирийы, Суданы, Таджикистаны минæвæрттæ æмæ ма æндæр уаз-джытæ. Уыдон дæр бæстон æрдзырдтой сæ бæстæты ныры уавæрыл, куыд тох кæнынц экстремистон фæзындтимæ æмæ цахæм зындзинæдтыл æмбæлынц. Æрæмбырдуæвджытæ иууылдæр банысан кодтой, ны-рыккон информацион-коммуникацион технологитæ стыр ахъаз кæй сты адæмы хъуыдыкæнынады экстремистон идеологи ныффидар кæнынæн. Уæлдай тæссагдæр фæзындыл та банымадтой, нацистон фыдгæнджытæй хъайтартæ аразын кæй райдыдтой, уый. Стæй ма алыгъуызон фыдгæнджытæй, экстремисттæй, нацисттæй «ацаразынц» политиктæ æмæ уæд барадхъахъхъæнæг органтæн дæр зындæр вæййы сæ ныхмæ архайын, Интерполы фæлгæтты æмгуысткæнынад фæкъуылымпы вæййы.
Мамиты Эрислав йæ раныхасы банысан кодта Уæрæсейы Федераци æмæ Республикæ Хуссар Ирыстоны барадхъахъхъæнæг органтæ информацион-координацион центры фæрцы æнгом æмгуыстад кæй кæнынц, бандитизм æмæ экстремизмы ныхмæ тохы сæ тыхтæ кæй баиу кодтой.
Конференцийы æрæмбырдуæвджытæ бадзырдтой, цæмæй дарддæр дæр æмбæлой ахæм фæзуæтты æмæ сæ архайд координаци кæной. Афтæмæй алкæй къухты дæр æфтдзæнис фылдæр æнтыст, се ‘мбæстæгты сабырдзинад бахъахъхъæнын сын æнцондæр уыдзæнис.
ДЖИОТЫ Алыксандр
