Хуссар Ирыстоны делегаци Æнæниздзинад хъахъхъæнын æмæ социалон рæзты министр Плиты Агуындæйы сæргълæудæй хайад исы дунеон зонадон-практикон конференци «Междисциплинарные вопросы детского и женского здоровья»-йы.
Конференци уагъд цæуы РЦИ-Аланийы горæт Дзæуджыхъæуы Сывæллæтты республикон клиникон рынчындоны фæзуаты.
Конференцийы хайадисджытæн раарфæ кодтой Республикæ Цæгат Ирыстон-Аланийы Æнæниздзинад хъахъхъæныны министр Тебиты Сослан, неонаталоги æмæ педиатрийы институты директор, медицинон зонæдты доктор Виктор Зубков æмæ РХИ-йы Æнæниздзинад хъахъхъæнын æмæ социалон рæзты министр Плиты Агуындæ. Плиты чызг йæ раныхасы банысан кодта уагъдцæуæг конференцийы ахсджиагдзинад, йæ хайадисджытæн æй бафæндыд æнтыстджын куыст æмæ бузныг загъта, кæй сæ фæхуыдтой, уый тыххæй.
Конференцийы хайадисджытæ докладтæ бакæсдзысты педиатри, сылгоймаджы æнæниздзинад æмæ неонатологийы къабазы. «Республикæ Хуссар Ирыстоны акушерон-гинекологон æххуыс организаци кæныны» фæдыл доклад бакæсдзæн медицинон зонæдты кандидат, уæлдæр категорийы дохтыр акушер-гинеколог Санахъоты Тамилæ.
Хуссарирыстойнаг делегацийы сконды ма конференцийы куысты хайад исынц уæлдæр категорийы дохтыртæ: Гуырæн хæдзары фæдыл республикон бирæпрофилон медицинон центры директоры хæдивæг, дохтыр акушер-гинеколог Плиты Мельс, Сывæллæтты рынчындоны филиалы медицинон хайы хистæр, дохтыр-педиатр Туаты Инессæ, афтæ ма ацы филиалы дохтыр неонатолог Плиты Аленæ.
Хуссарирыстойнаг делегацийы æмрæнхъ ма конференцийы куысты хайад исынц: Уæрæсейы Федерацийы Æнæниздзинад хъахъхъæныны «Академик В. Кулаковы номыл гинекологи æмæ перинатологийы национ медицинон иртасæн центр», Цæцæн, Кæсæг-Балхъары, Хъæрæсе-Черкесси, Дагъыстан, Мæхъæл, Таджикистаны Республикæты Æнæниздзинад хъахъхъæныны министрадты минæвæрттæ.
Comments are closed, but trackbacks and pingbacks are open.