Музыкæйы диссаджы аивады æвзонг фæлтæрæн бауарзын кæнынмæ здæхт у Тедеты Георгийы номыл Цхинвалы фыццæгæм музыкалон скъолайы педагогон коллективы архайд. Сæ хъуыддагыл иузæрдион ахуыргæнджытæ тырнынц, цæмæй суа æппынæдзухдæр сæ хъомылгæнинæгты æдзухон æмбæлццон. Æрвылаз дæр уыдон хорзæй сæхи равдисынц алыгъуызон бæрæгбонон мадзæлтты. Уый тыххæй сæ райгондæй баззайынц куыд ахуыргæнджытæ, афтæ ма аивадæн табугæнджытæ дæр.
Аивгъуыйгæ ахуыры азы дæр ам ауагътой цалдæр бæрæгбонон мадзалы. Сæ планы ноджыдæр уыд ирон музыкæйы концерт ауадзын, фæлæ сын нæ бантыст, æххæстгæнджытæй бирæтæ рынчын кæй уыдысты, уый аххосæй. Фæлæ сын уæддæр бынтыст дыууæ академион концерты ауадзын.
Сæрмагондæй зæгъын æмбæлы, Сылгоймæгты æхсæнадæмон бон – 8-æм марты цытæн цы концерт бацæттæ кодтой, уый тыххæй. Уымæ сæхи бацæттæ кодтой хорз, алчи дæр сæ йæхи равдыста активонæй. Скъолайы директор, Хуссар Ирыстоны сгуыхт архайæг, нæ республикæйы адæмон ахуыргæнæг Тедеты Маринæ куыд зæгъы, уымæ гæсгæ фыццаджыдæр банысан кæнын хъæуы РХИ-йы сгуыхт ахуыргæнджытæ Пухаты А., Коцты И., Зенашвили И., Козаты Г., Макарян Л., Тедеты О., адæмон ахуырады сгуыхт архайæг Куымæридтаты Т., афтæ ма ахуыргæнджытæ Гобозты О., Медойты А., Харебаты К., Гæбæраты Л. æмæ æндæрты æвæллайгæ куыст. Концерты уыдысты ахæм номыртæ, куыд «Хонæм уæ нæ Ирмæ», «Мæ уарзон Ирыстон», «Хорошо рядом с мамой», «Голубой вагон», «Попурритæ ирон мелодитыл», «Пусть всегда будет солнце», «Неополитанский танец», «Æхсæв æмæ райсом», «Прелюд» æмæ æн-дæртæ – æдæппæт 32 номыры. Сæхи активонæй равдыстой æвзонг æххæстгæнджытæ – хотæ Хуыгаты Ева æмæ Мария, Тедеты Анастасия, Цоциты Тамарæ, Сиукъаты Виктория, Хъотайты Марк, Гæззаты Арсæм, Цхуырбаты Валерия, Коцты Елизаветæ æмæ æндæртæ.
ХУЫБИАТЫ Никъала
