Къостайыхъæуы нывгæнæн скъола-студийы бакондыл нырма æххæст дæс азы дæр нæма рацыд, фæлæ сын ныридæгæн ис зæрдæрухсгæнæн æнтыстытæ, аивады дунемæ кæнынц уæндон къахдзæфтæ æмæ сæ райгонд сты сæ ахуыргæнджытæ дæр.
Цхинвалы районы Къостайыхъæуы нывгæнæн скъола-студийы ахуыргæнинæгтæй бирæтæн сæ къухы æфты стыр æнтыстдзинæдтæ, æнцонæй æххæст кæнынц нывкæнынады домæнтæ. Ныридæгæн сæ алкæмæн дæр ис йæхи чысыл коллекци æмæ сæ сты сæрыстыр. Нывкæнынады аивадæн табугæнджытæ æнæрахатгæ нæ вæййынц уыдонæн сæ сыгъдæг удты сфæлдыстад. Æрыгон нывгæнджытæ сæ куыстытæ арæх рахæссынц адæмы рæгъмæ, уыдон фенæн вæййы алыгъуызон равдыстыты, куыд нæ республикæйы, афтæ Уæрæсе æмæ фæсарæнты дæр.
Сывæллоны цæстæнгасæй Ирыстоны кæмттæ æмæ йæ алæмæттаг æрдз афтæ цымыдисонæй равдисынц æмæ адæймаджы дисы бафтауынц. Скъола-студийы хъомылгæнинæгтæн зынаргъ сты горæт Лазаревскы пейзажтæ, уыдон сыл бакуыстой цалдæр азы размæ пленэрты рæстæджы, Сау денджызы былыл сын ахуыртæ куы уагътой, уæд. Ахæм практикон ахуыртæ стыр ахъаз сты, фидæны нывгæнджыты курдиат хуыздæр раргом кæнынæн æмæ профессионалон æгъдауæй рæзынæн.
Æрæджы Къостайыхъæуы скъола-студийы ахуыргæнинæгтæн ныр та пленэртæ уыдис Цæгат Ирыстоны рæсугъддæр æмæ фенддагдæр бынæттæй сæ иу – Дзинагъайы хъæуы. Ацы комы диссаджы нывтæ зæрдæйы ныххизынц сæ гармонийы рæсугъддзинадæй æмæ уæд æнцондæртæй райгуырынц пейзажтæ.
Ам æрвылаз дæр æрыгон нывгæнджытæн уагъд фæцæуынц практикон ахуыртæ, уыимæ иумæ сорганизаци кæнынц, бынаты кæуыл бакусынц, уыцы æрмæджытæн равдыстытæ дæр.
Къостайыхъæуы скъола-студийы разамонæг, Республикæ Хуссар Ирыстоны адæмон нывгæнæг, УФ-йы Нывгæнджыты цæдисы уæнг, Гæбæраты Барис нын куыд радзырдта, афтæмæй йæ хъомылгæнинæгтимæ цыппар боны дæргъы сфæлдыстадон ахуыртæ истой Дыгургомы хæххон зонæйы. Æрбынат кодтой турбазæйы æмæ афтæмæй ныв кодтой, сæ алыварс цы уыдтой, уыдæттæ. «Фыццаджыдæр мæ фæнды арфæ ракæнын нæ паддзахады сæргълæууæг Гаглойты Аланæн, нæ балцæн нын финансон æххуыс кæй бакодта, уый тыххæй. Мах ацы диссаджы бынаты, сатæг уæлдæфмæ рацыдыстæм сæрдыгон практикæ. Пленэрты рæстæджы нæ сывæллæттæ базонгæ сты цæгатирыстойнаг æрыгон нывгæнджытимæ, æппæты кæстæртæ нæм чи ис, уыдон сæхи цæстæй федтой, цы у пленэр æмæ цæмæн у æрдзы хъæбысы ныв кæнын цымыдисондæр æмæ хуыздæр, уый. Уымæй дарддæр ма нæ ахуыргæнинæгтæн лекцитæ кастыстæм зындгонд нывгæнджыты цард æмæ сфæлдыстады тыххæй, амыдтам сын нывкæнынады сусæгдзинæдтæ. Программæйы фæлгæтты цыдыстæм экскурситы дæр. Нæ хъомылгæнинæгтæн фенын кодтам Задалескы Нанайы уаз бынат æмæ сын уый фæстæ радзырдтам йæ историйы тыххæй. Цæгат Ирыстоны нывгæнæн ахуыргæнæндæтты минæвæрттæй Дзинагъайы пленэрон ахуырты хайад райстой цалдæрæй, уыдон нымæцы Айларты Виктор, Асаты Аллæ æмæ æндæртæ. Ацы ахуырты фæзуат иттæг хорз уыдис цæгаттаг коллегæтимæ дарддæр æмгуыстад кæнынæн», – загъта Гæбæраты Барис.
Ирон аивадон культурæйы традициты рæзтыл архайгæйæ, ахуыргæнджытæ хæххон бынаты сфæнд кодтой сæ хъомылгæнинæгты куыстыты иумæйаг равдыст саразын. Гæбæраты Барис куыд банысан кодта, афтæмæй уыдон семæ аластой скъола-студийы ахуыргæнинæгты 50 хуыздæр куысты. Хæххон равдысты экспозици рауадис хъæздыг æмæ цымыдисон. Æрыгон нывгæнджыты куыстытæм бацымыдис кодтой æмæ сæм фæуазæг сты зындгонд Ирыстоны сгуыхт нывгæнджытæ, аивадæн табугæнджытæ, афтæ ма улæфджытæ дæр.
Равдысты уæлдай тынгдæр цæсты хаудтой дыккаг къласы ахуыргæнинаг Хъабанты Настяйы нывтæ æмæ йын аккаг аргъ скодтой адæм.
Гæбæраты Барис нын куыд радзырдта, афтæмæй Къостайыхъæуы скъола-студийы ахуыргæнинæгты куыстытæ хайад исынц дунеон равдыст-конкурсы «Дети рисуют мир»-ы. Равдысты фæлгæтты хуссарирыстойнаг æрыгон нывгæнджыты куыстытимæ ныридæгæн базонгæ сты Мæскуыйы горæты, Инди, Египет æмæ æндæр бæстæты. Дунеон равдысты организатортæ куыд фæбæрæг кодтой, афтæмæй ирон нывгæнджыты æрмдзæф æмæ хъуыдытæ тынг фæцыдысты аивадæн табугæнджыты зæрдæмæ æмæ сæ куыстытæ ныр та рæхджы æвæрд æрцæудзысты Хъырымы уæрæх равдысты. Конкурсы фæстиуджытæм гæсгæ октябры мæйы хорзæхджын цæудзысты аккагдæртæ æмæ се ‘хсæн æнæмæнг уыдзысты Къостайыхъæуы нывгæнæн скъола-студийы ахуыргæнинæгтæ дæр.
ЦХУЫРБАТЫ Ларисæ
