Коронавирусы ныхмæ тохы сæраппонд æрæджы не скъолаты ахуыр кæнын райдыдтой дистанцион методæй. Ахуыргæнджытæ æмæ ахуыргæнинæгтæ ахæм ахуыртыл куыд цайдагъ кæнынц, уый тыххæй нæ уацхæссæг ныхас кодта нæ республикæйы ахуырадон уагдæттæй сæ иу, 12-æм астæуккаг скъолайы директор Æрсойты Геннадиимæ.
– Цахæм цæстæнгасæй кæсыс, не сколаты ахуыртæ дистанцион методмæ гæсгæ уагъд цæуой, уымæ?
– Ахуыртæ ахæм методæй уадзын у уавæры домæнтæм гæсгæ. О, фæлæ не сколайы ахуыргæнджытæ 2019-2020 ахуыры азы райдианæй дæр пайда кодтой ахæм методæй. Ахæм методтæй пайда кæныны фæндон бахастой скъоладзауты ныййарджытæ. Уымæн æмæ сæ фæндыд, цæмæй сæ ахуыргæнинæгтæ æрмæст чиныгæй ма пайда кæной, фæлæ зоной нырыккон электроифтонггæрзтимæ архайын дæр. Кæй сæм байхъуыстам, сæ домæн сын кæй сæххæст кодтам, уый махæн фæпайда. Уымæн æмæ коронавирусы фæзынды фæстæ, не скъолатæ дистанцион ахуырадмæ куы рахызтысты, уæд нæ ахуыргæнджытæ æмæ ахуыргæнинæгтæ уæлдай зындзинæд-тæ нал банкъардтой.
Абоны ахуыртæ дæр уагъд цæуынц, ахуыр-гæнинæгтæ нырмæ цы расписанимæ гæсгæ ахуыр кодтой, уый бындуртæм гæсгæ. Интернеты фæрцы ахуыргæнæг хæс адæтты ахуыргæнинæгтæм. Уый йæ райсы, саразы йæ æмæ ахуыргæнæгмæ æрбарвиты дзуапп. Ахæм куыстытæн фæстиуджытæ арæзт æрцæуы къуыри иу хатт.
– Цæмæй ахæм методæй ахуыртæ уагъд цæуой æнтысгæйæ, уый тыххæй ахуыргæнæг ифтонг цæмæйты хъуамæ уа?
– Ахуыргæнæг хъуамæ рæхса нырыккон электронон ифтонггæрзтæй пайда кæнынмæ. Ацы хъуыддаджы хуыздæр æнтыстытæ ис æрыгондæр ахуыргæнджытæн, ахæм системæ кæй цымыдис кодта æмæ компьютерон скъолатæ каст чи фæцис, уыдонæн. Хистæр кары ахуыргæнджытæй кæмæдæрты ахуыртæ ахæм методæй уадзын зын кæсы, фæлæ семæ кусынц æвзонгдæр ахуыргæнджытæ æмæ уыдон дæр фæцайдагъ уыдзысты ахæм методæй кусыныл.
– Куыд хъуыды кæныс, ахуыргæнинæгтæ разыйæ сæмбæлдысты ахæм методæй ахуыр кæныныл?
– Ахуыргæнинæгтæ ахæм методæй ахуыр кæнын уарзынц æви нæ, дзырд ууыл нæ цæуы. Мах хъомыл кæнæм сомбоны фæлтæр, паддзахады разамонджытæ, инженертæ, ахуыргæндтæ, адæмæн стыр ныфс чи уа, ахæм фæлтæр æмæ цæмæй уыцы домæнтæ æххæст цæуой, уый тыххæй æххæст кæнын хъæуы ахуыргæнæг æмæ ахуыргæнинаджы раз цы хæстæ ис, уыдон. Цард, уæлдайдæр та фæстаг цалдæр дæс азы, размæ сарæзта стыр къахдзæфтæ. Кæй зæгъын æй хъæуы, нырæй фæстæмæ дæр тырндзыстæм ноджы стырдæр æнтыстытæм æмæ нæ адæм уыцы ногдзинæдты фæстейæ ма хъуамæ баззайой, хъуамæ æмдзу кæнæм рæстæгимæ.
Ахуыртæ ахæм методмæ гæсгæ уадзынмæ куы хызтыстæм, уый размæ фембæлдыстæм алы ахуыргæнинаджы ныййарæгимæ дæр. Бамбарын кодтам æппæт дæр æмæ сын сдзуапп кодтам, цы фарстатæ сæм фæзынд, уыдонæн. Ныййарджытæ растыл банымадтой нæ фæндон æмæ уыдон та, ахæм æмбарынгæнæн куыст бакодтой сæ сывæллæттимæ. Банысан кæнын ма хъæуы уый дæр æмæ ахуыргæнинæгтæй сæ иу хаймæ ахæм методæй ахуыр кæнын кæй равзæрын кодта стыр цымыдис. Нырмæ йæ уроктæ саразынмæ уæлæнгай цæстæй чи каст, уыдон дæр сцымыдис сты æмæ сæ рæстæг дзæгъæлы уыйбæрц нал хардз кæнынц.
– Ныр та мæ фæнды бафæрсын, скъоладзау та ифтонг цæмæй хъуамæ уа?
– Сæйраджыдæр, ахуыргæнинæгтæ кæм ис, уыцы хæдзæртты хъуамæ уа интернет. Ахуыргæнинагæн куынæ уа компьютер, телефон, уæд ын ахуыргæнæг цы хæстæ ратта, уыдон базоныны тыххæй, йе ‘мкъласонтыл куы зила, уæд ахæм ахуыр хорз фæстиуæг нæ ратдзæнис.
– Ахуыртæ дистанцион методæй уадзгæйæ ахуыргæнинæгтæм зындæр ахуыргæнæн цы предметтæ кæсынц?
– Ахуыргæнинагмæ тырнындзинад куы уа, уæд ын уæлдай зындзинæдтæ никæцы предмет хæсдзæнис. Нырмæ дæр ахуыргæнинæгты хсæн уыд, иу кæнæ иннæ предмет фылдæр чи уарзта, ахæмтæ. Ахæмтæ уыдзæнис нырæй фæстæмæ дæр.
Гæззаты Иван
Comments are closed, but trackbacks and pingbacks are open.