20 июны Хуссар Ирыстоны мысынц, 1920 азы Гуырдзыстон цы геноцид сарӕзта ирон адӕмӕн, уыдоны амӕттӕгты нӕмттӕ. Национ бындурыл уыцы ӕнӕадӕймагон фыдракӕндты амӕттӕгтӕ 100 азы дӕргъы баисты мингай ирӕттӕ, уыдоны нымæцы сылгоймӕгтӕ, зӕрӕдтӕ, сывӕллӕттӕ.
Гуырдзиаг меньшевикты къухæй 103 азы размæ цы 13 коммунары æрцыд мард, уыдоны ном арыны цытæн 20 июны Згъудеры уæлмæрдмæ сæ обелискы размæ æрбацыдысты бæстæйы сæргълæууæг, Гаглойты Алан, Хицауады Сæрдар Джуссойты Константин, Парламенты Сӕрдар Ӕлборты Алан, министрадтæ æмæ уагдæтты сæргълæуджытæ, æхсæнадон минæвæрттæ.
Мадзалы хайадисджытæ дидинджытæ сæвæрдтой 13 коммунары номыл обелискы раз.
Ирон адæмы геноциды амæттæгты ном арынæн уыцы бон автотранспорты шофыртæ æмæ фистæгæй цæуджытæ 13 сахатыл æрурæдтой се змæлд. Иу уысм æмырæй алæугæйæ, ссардтой геонциды амæттæгты ном. Уыцы бон æруагътой Паддзахадон тырысатæ.
Мады Майрæмы æмæ Сыгъдæг Æртиуон аргъуанты уагъд æрцыдысты Хуыцаумæ бакуывдтытæ ирон адæмы геноциды амæттæгты фæдыл.
Æртындæс цæхæрцæст коммунар-хæстоны Уалыты Данел æмæ Никъала, Цхуырбаты Кышыл, Котолиты Никъала, Джиоты Андри, Ходты Пашка, Гобозты Соскъо, Тедеты Иван, Цхуырбаты Тотыр, Дзеранты Буту, Джиголаты Резо æмæ Сашæ, Куымæридтаты Гигойы 1920 азы 20 июны фехстой гуырдзиаг æфхæрджытæ. Зарæджы ныхæсты куыд фыст ис, афтæмæй ацы æртындæс лæппуйы нæ амонд æмæ нæ царды сæраппонд сæ сæртæ æрхастой нывондæн.
КЪӔБУЛТЫ Маринæ
