Республикæ Хуссар Ирыстоны Гарзджын тыхты Сæйраг къамандагæнæг Гаглойты Алан хайад райста Паддзахадон æдасдзинады комитеты брифингы, кæцы баст уыд Хуссар Ирыстоны диверситы ныхмæ иумæйаг ахуырты сæраппонд.
Æдасдзинады паддзахадон комитеты сæрдар Олег Ширан æрæмбырдуæвджыты раз ныхас кæнгæйæ, банысан кодта ахуырты сæйраг нысæнттæ æмæ хæстæ.
Президент йæ раныхасы банысан кодта, зæгъгæ, диверситы ныхмæ иумæйаг ахуыртæ уадзыны нысаниуæг у бæрзонд, дунейы геополитикон уавæр тагъд кæй ивы, афтæ ма Украинæйы сæрмагонд æфсæддон операци уагъд кæй цæуы, уый хынцгæйæ.
«Хуссар Ирыстоны плангонд ахуыртæ уагъд цæуынц фыццаг хатт æмæ здæхт сты диверситы алыгъуызон хуызтæ иуварс кæнынмæ, кæцытæ, æнæдызæрдыгæй, абон æвзæрын кæнынц æдасдзинады серьезон тæссагдзинад.
Кусджыты раз цы сæйраг хæс лæууы, уыдонæй сæ иу у нæ паддзахады территорийыл диверсион-террористон акцитæ ма æруадзын. Мах хъуамæ цæттæ уæм не ‘мбæстæгты ныхмæ цыфæнды характеры архайд æмæ агресси аиуварс кæнынмæ», – загъта Гаглойты Алан.
Паддзахады сæргълæууæг банысан кодта, зæгъгæ, иумæйаг ахуыртæ фадат дæттынц алыгъуызон ведомствоты ‘хсæн æмархайд æрбæстон кæнынæн, кусджытæн æххуыс кæнынц сæ зонындзинæдтæ баххæст кæнынæн, профессионалон фæлтæрддзинад рæзын кæнынæн, кæцы æнæмæнгхъæуæг у паддзахады æдасдзинад сифтонг кæнынæн.
Кæронбæттæны Гаглойты Алан бузныг загъта, службæйы мадзæлтты хайад чи райста, æппæт уыдонæн æмæ сын йæ зæрдæ загъта ахуыртæ æнтыстджынæй ауадзын.
