Приднестровьейы фæсарæйнаг хъуыддæгты министр Витали Игнатьев æмæ Приднестроваг-Молдаваг Республикæйы Хуссар Ирыстоны официалон минæварады сæргълæууæг Виталий Янковский уынаффæ кодтой дыууæфарсон æмгуысткæнынады актуалон фарстатыл æмæ ацы азæн развæлгъау хатдзæгтæ сарæзтой
Приднестроваг-Молдаваг Республикæйы Фæсарæйнаг хъуыддæгты министрады пресс-службæ куыд хъусын кæны, афтæмæй фембæлд уыд æртыццæджы, 8 ноябры, Приднестроваг-Молдаваг Республикæйы æддагполитикон ведомствойы.
Уазджытæн «гас цу» зæгъгæйæ, Виталий Игнатьев банысан кодта, зæгъгæ, приднестроваг-ирыстойнаг æмахастытæ, уыцы нымæцы, æддагполитикон ведомствойы хаххыл æмæ официалон минæвары дæр, дарддæр кæнынц динамикон æмæ конструктивонæй.
«Фембæлды хайадисджытæ уынаффæ кодтой дыууæфарсон æмгуысткæнынады актуалон фарстатыл æмæ хатдзæгтæ сарæзтой азæн. Ахæм контексты Приднестроваг-Молдаваг Республикæйы Фæсарæйнаг хъуыддæгты министрады сæргълæууæг сæрмагондæй банысан кодта Хуссар Ирыстонмæ Приднестровьейы делегацийы официалон балц, Уæрæсейы Федерацийы æрдыгæй республикæйы хæдбардзинады банымадыл 15 азы сæххæсты цытæн бæрæгбонон мадзæлтты хайад райсыны тыххæй, афтæ ма балцы фæлгæтты бæстæйы разамынадимæ приднестроваг дипломатты фембæлд», – дзырдæуы пресс-службæйы хъусынгæнинаджы.
Дискуссийы рæстæджы кæрæдзийæн сæ хъуыдытæ загътой æввахс рæстæджы иумæйаг куысты-пълæнтты фæдыл, культурон-гуманитарон фадыджы проектты реализаци дæр сæм бафтаугæйæ. Дипломаттæ хъусдард аздæхтой Приднестровьейы алыварс æхсæндунеон уавæрмæ дæр. Дзырдтой официалон минæварады архайдимæ баст иуæй-иу организацион аспекттыл дæр.
Фембæлды кæрон дыууæ фарсы бадзырдтой, кæрæдзийæн цымыдисон фарстаты фæдыл регулярон кусæгон фембæлдтытæ адарддæр кæныны тыххæй.
