Дарддæр кæны йæ хæрзиуæгон архайд

Сырх Дзуары Дунеон Комитет дарддæр дæр кæны йæ хæрзиуæгон архайд Хуссар Ирыстоны, куыд горæтты, афтæ хъæууон бынæтты дæр, йе ххуысы хай бакæны цæрджыты иууыл тыхстдæр категорийæн. Комитеты архайды сæйрагдæртæй иу у, 1989-1992-æм азты æмæ 2008 азы августы хæсты рæстæджы æбæрæгæй чи фесæфт, уыдон бинонты æнцой балæууын. 2016 азы февралы мæйы æбæрæгæй сæфт æмбæстæгты фарсты фæдыл Æртæфарсон координацион механизм сног кодта йæ куыст. Уагъд æрцыд механизмты фæлгæтты фарастæм фембæлд, цыран Сырх Дзуары Дунеон Комитет ралæууыд куыд сæрдары хуызы æмæ кæны къахдзæфтæ æбæрæгæй фесæфæг æмбæстæгты хъысмæт базоныны тыххæй гуырдзиаг, хуссарирыстойнаг æмæ Уæрæсейы фарсы хайадисджыты æрдыгæй.

2016 азы апрелы мæйы Хуссар Ирыстон æмæ Уæрæсейы Хицауадты иумæйаг куысты руаджы сбæрæг чындæуыд Тедеты Маирбеджы марды буар æмæ йæ сæмбæлын кодтой йæ бинонтыл. Бавæрдтой йæ йæ райгуырæн Знауыры районы Малдайы хъæуы. Маирбег фесæфт 2008 азы августы хæстон архайдтыты рæс-тæджы. Комитет йæ бинонты æнцой балæууыд цалдæр азы. 2016 азы 24 февралы Комитет хицауадмæ балæвæрдта, 2008 азы чи фесæфтысты, уыдон тыххæй зонæнтæ сæ царды æрцæугæ цаутæй. 2008 азы æбæрæгæй фесæфæг æмбæстæгты тыххæй уыцы зонæнтæ сæ бинонтæй æрæм-бырд кæныны фæрцы Комитеты куыст фæахъаз уыдзæн хæстæджыты хъысмæт базонынæн. Адæй-маджы бартæ бахъахъхъæныны Хуссар Ирыстоны комитетмæ æдæппæт байдзаггонд анкетæтæ радтой 9. Комитет дарддæр дæр æмбырд кæндзæн, 90-æм азты конфликты æбæрæгæй чи фесæфтысты, уыдоны царды цаутæй зонæнтæ. Конфликты рæстæджы йæ бинонтæй чи фæиппæрд, уыдонæн тынг зын вæййы сæ хæстæджытимæ ногæй бастдзинад скæнын. Ахæм бинонтæн баххуыс кæныны нысанæн уал афæдзы фыццаг æмбисмæ Сырх Дзуары Дунеон Комитет æрæмбырд кодта 5 æмæ сæ адæтта Сырх Дзуары Минæварадмæ. Уымæй дарддæр ма бацархайдта ссæдзæй фылдæр телефонон бастдзинад сорганизаци кæнын, стæй ма ахъаз кæны фæхицæнуæвæг бинонты уæнгты баиу кæныны дæр. Уый фæстиуæгæн ацы рæстæджы се ‘ввахс адæймæгтимæ баиу сты фондзæй. Ацы азы æмбисмæ Комитет фæхæццæ кодта хæстæджыты æрвитæггæгтæ, Хуссар Ирыстонæй Гуырдзыстоны ахæстæтты чи бадынц, уыцы æмбæстæгтæм. Уый йедтæмæ ма Сырх Дзуары Дунеон Комитет организаци кодта бинонты фембæлдтытæ дыууæ фарсы æрдыгæй дæр. Ахæм фембæлдтытæ уыд 8 хатты хуссарирыстойнаг ахæсттæй цыппарæн, кæцытæ сты Гуырдзыстоны ахæстæтты.

Комитет стыр æххуыс кæны æвæрæз æмбæстæгтæн хæлцадон æмæ æндæр товартæй. Ахæм æххуыс бакодтой бирæсывæллонджын æвæрæз бинонтæн, иунæгæй чи цæры, ахæм зæрæдтæ æмæ æндæртæн. Январы мæйæ июны мæймæ ахæм æххуыс банкъардтой Хуссар Ирыстоны цыппар районæй 293 бинонтæ, æдæппæт та 816 адæймаджы. Комитетæн æдзухон бастдзинад ис хъæууон æмæ районты администрацитимæ æмæ Хуссар Ирыстонæн бакæны, фыццаградон æххуыс кæмæн фæхъæуы, ахæмтæн. Зæгъæм, ахæм куыст æнгом бастдзинады руаджы кæны Хъæууон хæдзарады министрадимæ æмæ скъуыддзаг æрцæуынц сæ фарстатæ фермертæ æмæ æндæртæн бынаты. Хъæу-уонхæдзарадон куыстытæ чи æххæст кæндзæн, ахæмтæн лæвары хуызы лæвæрд æрцыдысты хицæн хуызты ифтонггæрзтæ хъæууон администрацитæн 2016 азы майы мæйы. Микроэкономикон программæ 2016 азы йæ куыст фæци æмæ уымæ гæсгæ Комитет дарддæр нæ фæнд кæны уый Хуссар Ирыстоны сног кæнын.

Куы бахъæуы, уæд Комитет бакæ-ны ортопедион лæггæдтæ дæр. Уымæй дарддæр ма Комитет æххуыс кæны рынчын æмбæстæгты æвæс-тиатæй рынчындæттæм фæхæццæ кæныны. Зæгъæм, ахæм æххуыс афæдзы фыццаг æмбисы бакодтой 5 адæймагæн, уыдон бахатыдысты Комитетмæ æмæ райстой инвалидон коляскæтæ, дыууæ адæймагæн та баххуыс кодта къахы протезтæ саразын. Банысангонд рæстæджы тагъд медицинон æххуысы тыххæй, уæззау рынчын пациентты Цхинвалæй фæхæццæ кодтой республикæйæн æддейæ медицинон уагдæттæм. Ахæм лæггæдты тыххæй ацыдысты 117 хатты æмæ балæггад кодтой уал æмбæстагæн. Уымæй дарддæр ма Комитеты кусджытæ æдзухдæр цыдысты 7 ацæргæ адæймæгты хæ-дзæрттæм Цхинвал æмæ районтæм æмæ сын медицинон æххуыс кодтой.

Хуыбиаты Н.