Сырх Дзуары Дунеон Комитет у нейтралон ӕмӕ хӕдбар организаци ӕмӕ йӕ нысӕнттӕ ӕмӕ хӕстӕн ис гуманитарон характер, хъахъхъӕны, хӕстон конфликттӕ ӕмӕ ӕндӕр мӕгуырау ситуациты чи бахауд, уыцы адӕймӕгты цард. Ацы Комитет йӕ архайд дарддӕр кӕны Хуссар Ирыстоны горӕттӕ ӕмӕ хъӕууон бынӕтты, комплексон ӕххуысӕй сӕ домӕнтӕ рогдӕр кӕны иууыл тыхстдӕр цӕрджытӕн.
1989-92-ӕм ӕмӕ 2008-ӕм азы августы хӕсты ӕбӕрӕгӕй чи фесӕфт, уыдон хъысмӕт базонын у ацы Комитеты сӕйраг приоритеттӕй сӕ иу. Уымӕн ис ӕдзухон диалог Хицауады ӕппӕт ӕмбӕлон структурӕтӕ ӕмӕ ӕбӕрӕгӕй фесӕфӕг бинонты уӕнгтимӕ, кӕцы здӕхт у уыдонӕн сӕ хъысмӕт сбӕрӕг кӕнынмæ. Комитет уый фӕлгӕтты ауагъта тренинг Хуссар Ирыстоны Хицауады минӕвӕрттӕ ӕмӕ «Память и надежда»-имӕ. 2019 азы январь-июны мӕйтӕм ӕрӕмбырд чындӕуыд 29 контролон биологон хуызӕджы ӕмӕ уымӕ гӕсгӕ ӕрӕмбырдгонд хуызӕгты иумиаг нымӕц у 175. Сырх Дзуары Комитет дарддӕр дӕр ӕмбырд кодта информаци зӕрдӕхсайгӕ бынӕтты, йӕ кусджытӕ ма уӕлӕмхасӕн ауагътой 20 фембӕлды хӕстӕгдӕр хъӕуты цӕрджытимӕ, цӕмӕй райстаиккой информаци ӕмӕ бӕлвырд зонӕнтӕ, зӕрдӕхсайгӕ бынӕтты кӕй ӕн-хъӕлынц, ахӕм адӕймӕгты мӕрдтӕ базоныны тыххӕй. 2019 азы февраль ӕмӕ марты мӕйты Комитеты ӕххуысы фӕрцы уагъд ӕрцыдысты дыууӕ зӕрдылдарӕн мадзалы, чи фесӕфт, уыдон бинонтӕн. Февралы мӕйы хайад райстой Национ театр гом кӕныны церемонийы ӕмӕ бакастысты спектаклмӕ. Марты мӕйы та цалдӕр бинонтӕ ӕрӕмбырд сты Сылгоймӕгты Дунеон бон банысан кӕныны цытӕн. Ацы дыууӕ мадзалы хайад райстой ӕбӕрӕгӕй фесӕфӕг адӕймӕгты бинонтӕй 53.
Комитет Программӕйы фӕлгӕтты агуры амӕлттӕ, цӕмӕй йӕ бинонтимӕ бастдзинад кӕмӕн нал ис, уыдон кӕрӕдзи ссарой, уый тыххӕй сын се ввахс адӕймӕгтӕм ӕрвиты Сырх Дзуары Ныстуан кӕнӕ та сифтонг кӕны телефонон бастдзинад. Ацы азы фыццаг ӕмбисы Комитет ӕрӕмбырд кодта 3 ныстуаны, афтӕ ма йӕ ӕмархайды фӕстиуӕгӕн 20 адӕймагӕн уыд телефонон бастдзинад дӕр. Комитет ма архайы, йӕ бинонтӕй чи фӕиппӕрд, уыдон ссарыныл дӕр ӕмӕ йын уыцы хъуыддаджы дӕр бантыст 5 адӕймаджы сӕ бинонтимӕ ӕрбаввахс кӕнын.
Социалон ӕххуысы Программӕйы фӕлгӕтты Комитет ӕдзухдӕр йе ххуысы хай кӕны хӕлцадон ӕмӕ ӕнӕхӕлцадон товартӕй цӕрджыты иууыл тыхстдӕр ӕмӕ ӕвӕрӕздæр адӕймӕгтӕн. Ахӕм ӕххуыс алы квартал дӕр бакӕны бирӕсывӕллонджын чысылӕфтиагджын бинонтӕн, иунӕг ас адӕмӕн, йе ввахс хиуӕттӕй йӕ уӕлхъус чи нӕй, куыстхъом чи нӕу ӕмӕ ма иунӕгӕй цӕрӕг ныййарджытӕн. 2019 азы фыццаг ӕмбисы Комитет фӕхай кодта 1, 409 хӕлцадон пакеты ӕмӕ 728 та гигиенӕйы тыхтӕттӕ 193 ӕвӕрӕз бинонтӕн Хуссар Ирыстоны цыппар районӕн, ӕдӕппӕт 312 адӕймагӕн. Се ‘нцой афтӕ кӕй балӕууыдысты, уымӕ гӕсгӕ уыдон ифтонг уыдысты бон ӕртӕ хатты хӕлц ӕмӕ хи гигиенӕйы фæрæзтæй.
Организацийы кусджытӕ дарддӕр дӕр цыдысты 14 ацӕргӕ иунӕг адӕймӕгтӕм ӕмӕ сӕм зылдысты санитарон ӕгъдауӕй. Ахӕм ӕххуыс ӕнкъардтой Цхинвалы горӕты ӕрвылбон дӕр, Цхинвал, Ленингор ӕмӕ Знауыры районты хъӕутӕм та цыдысты къуыри иу хатт. Уыдонӕн ӕххуыс кодтой хӕлцадон продукттӕ ӕлхӕнын ӕмӕ сӕм сӕ фӕхӕццӕ кӕныны, афтӕ ма фыццаг рады ӕнӕмӕнгхъӕуӕг ӕндӕр товартӕй ифтонг кӕнын, сӕ хатӕнтӕ сын ӕфснайын ӕмӕ сӕм дон ӕрбахӕссыны хъуыддаджы. Сӕ куырдиатмӕ гӕсгӕ сын Комитеты кусджытӕ ӕххуыс кодтой ӕнӕниздзинад хъахъхъӕныны уагдӕттӕм сӕ фӕхӕццӕ кӕныны.
Бынӕттон хицауады ӕнгом бастдзинады руаджы Комитеты экономикон ӕдасдзинады хайады кусджытӕ 12 бинонтӕн сӕ фарс балӕууыдысты административон ӕгъдауӕй. Ахӕм адӕймӕгтӕн алыгъуызон аххосӕгтӕм гӕсгӕ сӕ бон нӕ уыд документтӕ бацӕттӕ кӕнын кӕнӕ та социалон ӕххуыстӕ райсын. Ацы азы фыццаг ӕмбисы 10 адӕймаджы бахатыдысты Комитетмӕ ӕмӕ сын бакодтой ортопедион ӕххуыс: цыппар адӕймаджы райстой инвалидон къӕлӕтджынтӕ, цыппар адӕймагӕн та баххуыс кодтой протезтӕ аразыны, ӕртӕ адӕймаджы та банкъардтой ӕндӕр ӕххуыстӕ. Афтӕ ма ӕндӕр ӕмӕ ӕндӕр ӕххуыс бакодтой Зӕрӕдты хӕдзар «Ныфс»-ӕн ӕмӕ афтӕ дарддӕр. Банысангонд рӕстӕджы Комитеты ӕмархайды фӕстиуӕгӕн пациенттӕн ӕнӕаргъӕвгӕ медицинон ӕххуыс бакӕныны тыххӕй Цхинвалӕй Тбилисы (Гуры) медицинон уагдӕттӕм ацы азы фыццаг ӕмбисы фӕхӕццӕ чындӕуыд 60 пациенты. Организаци сӕ фарс ралӕууы бынӕттон ӕмӕ регионалон бастдзинады фӕрӕзтӕн,цӕмӕй хуыздӕр ахъаз кӕна йӕ мандат ӕмӕ архайды. Зӕгъӕм, 9-10 апрелы Комитет Хуссар Ирыстоны хицауады ӕххуысы фӕрцы ауагъта дыууӕ информацион сессийы ӕдасдзинады тыхты тыххӕй. Боны фӕткы уыд цалдӕр фарстайы, уыцы нымӕцы Ӕхсӕнадӕмон гуманитарон барад, Сырх Дзуары Ӕхсӕнадӕмон Комитеты архайд Хуссар Ирыстоны ӕмӕ ӕндӕртӕ. Хуссар Ирыстоны паддзахадон университет та сын рахицæн кодта бынат ахӕм информацион сесси ауадзынӕн.
ХУЫБИАТЫ Никъала
Comments are closed, but trackbacks and pingbacks are open.