Дæ цæст ахæсс дунейыл

РААРФÆ  КОДТОЙ  ПУТИНÆН

Дунеон бæстæтæ – Узбекистан, Таджикистан, Хъыргъызтан, Азербайджан, Казахстан, Белоруси, Серби, Сомихстон, Израиль æмæ æндæр бæстæты сæргъ-лæуджытæ раарфæ кодтой УФ-йы Президент Владимир Путинæн йæ гуырæн боны сæраппонд.

 

КЪУХТÆ  ÆРФЫСТОЙ  КОНТРАКТЫЛ

УФ-йы Президент Владимир Путин æмæ Индийы премьер-министр Нарендра Моди къухтæ æрфыстой контрактыл уæрæсейаг зенитон-ракетон комплекстæ С-400 «Триумф»-тæ сын уæй кæныны тыххæй. Контракты аргъ у 5 миллиард долларæй фылдæр, уыдонæй 15 проценты Нью-Дели бафиддзæн авансæй, иннæ хай та фыст цæудзæн, комплекстæ куыд ласт цæуой, уымæ гæсгæ. Индийаг фарс нымайы, зæгъгæ, С-400 æфсæддон радгæсы слæудзысты 24 мæйы фæстæ. Инди зенитон ракетон комплекстæ балхæныны тыххæй уынаффæ райста АИШ-ы æртхъирæнтæ ницæмæ æрдаргæйæ. Ныр цасдæр рæстæджы дæргъы Вашингтон экономикон санкцитæй æртхъирæн кæны, уæрæсейаг хæцæнгарз чи æлхæны, уыцы бæстæтæм.

 

РАХАСТОЙ ЙЫН КАРЗ ТÆРХОН

Хуссар Кореяйы экс-президент Ли Мен Бакæн тæрхондон рахаста 15 азы ахæстоны фæбадыны тæрхон коррупцийы тыххæй. Сеулы централон тæрхондон æй аххосджыныл банымадта 24,6 миллиард воны (21,7 милуан доллары) ныппаплой кæныны, гæртæмттæ райсыны æмæ æндæр фыдракæндтæ саразыны. Фæдагурæн органты бæрæггæнæнтæм гæсгæ, уыдон арæзт æрцыдысты 2008-2013 азты, йæ президентон æмгъуыды рæстæджы. Тæрхондоны уынаффæмæ гæсгæ паддзахады раздæры сæргълæууæг ивар хъуамæ бафида 13 миллиард воны (11,5 милуан доллары). Ли Мен Бакы фæстæ та Хуссар Кореяйы президент уыд Пак Кын Хе. Уымæн дæр тæрхондон рахаста ахæстоны фæ-бадыны тæрхон. 2016 азы йын расидтысты импичмент. 2018 азы апрелы мæйы Пак Кын Хейæн фæсаууонмæ рахастой 24 азы ахæстоны фæбадыны æмæ 18 миллиард воны (17,5 милуан доллары) ивар бафидыны тæрхон паддзахады сусæг-дзинæдтæ адæмыл кæй ахæлиу кодта, уый тыххæй. Июлы мæйы уымæн радтой ноджы аст азы паддзахадон фæрæзтæ ныппаплой кæныны æмæ æвзæрстыты хи схæццæ кæныны тыххæй.

 

НАЛ ПАЙДА КÆНДЗÆН КРЕДИТТÆЙ

Турк дарддæр нал кæны Дунеон валютон фонды кредиттæй пайда кæныны фæнд, – уый тыххæй фехъусын кодта бæстæйы президент Реджеп Тайип Эрдоган. «Мах сæхгæдтам Дунеон валютон фонды кредитты фарс, цæмæй йæ макуыуал бакæнæм», – загъта уый. Туркаг лидер ацы хъусынгæнинаг сарæзта, фæстаг рæстæджы Вашингтонимæ йæ ахастытæ куы февзæрдæр сты, уæд, уыцы нымæцы америкæйаг пастор Эндрю Брансоны тыххæй дæр, кæцыйы туркаг хицауад баурæдтой 2016 азы.

 

«СЕВЕРНЫЙ ПОТОК-2»-ЙЫ ТЫХХÆЙ

Германы дæтты нау-хæтæлтæвæрæг гермайнаг фадыджы æрæвнæлдта газуадзæн «Северный поток-2»-йы куыс-тытæм. Графикмæ гæсгæ, Германы территориалон дæтты æппæт куыстытæ дæр æххæст æрцæудзысты азы кæронмæ.

 

ÆРУЫНАФФÆ КОДТОЙ ЭКОНОМИКОН ÆМГУЫСТАДЫЛ

УФ-йы экономикон рæзты министр Максим Орешкин Киотойы фембæлд Японы премьер-министр Синдзо Абэимæ. Уыдон æруынаффæ кодтой экономикæйы фадыджы уæрæсейаг-япойнаг æмгуыстады фарстытыл. Киотойы йæ куыст райдыдта æхсæнадон зонад æмæ технологиты æрвылазон дунеон форум. Ацы мадзал ныр 15-æм хатт æрæмбырд кодта дунейы 150 бæстæйы 1,5 мин ахуыргонды, амали-уæггæнæджы, политикон æмæ æхсæнадон архайæгæй фылдæр. Мæскуы æмæ Токио уадзынц консультацитæ Курилты хуссар хайы фондз здæхты фæдыл иумиаг  хæдзарадон архайды фарстыты тыххæй. Ацы фадгуыты æмгуыстад æрнывыл кæнын дыууæ бæстæйы нымайынц сабырадон бадзырдыл къухтæ æрфыссыны фæндагыл ахсджиаг къахдзæфыл. Уыимæ Мæскуы æмæ Токиойы куыд нысан кæнынц, афтæмæй уыдон не сты иу хъуыдыйыл хæст иумиаг проекттæ куыд хъуамæ æххæст цæуой, уый фæдыл.

 

 

ПОМПЕО ÆМÆ КИМ ЧЕН ЫНЫ ФЕМБÆЛД

АИШ-ы паддзахадон секретарь Майк Помпео фехъусын кодта, зæгъгæ, Цæгат Кореяйы денуклеаризацийы фæдыл къахдзæфты тыххæй бадзырдта ацы бæстæйы сæргълæууæг Ким Чен Ынимæ. Ацы процессмæ йæ хъус дардзысты Иугонд Штаттæ. Цæгат Кореямæ йæ балцы фæстæ Помпео æрцыд Хуссар Кореямæ æмæ ауагъта 4-минутон баныхæстæ Мун Чжэ Инимæ. Фембæлды рæстæджы йын радзырдта Ким Чен Ынимæ къухы батфгæ бадзырдты тыххæй. Майк Помпеойы балцы сæйраг нысан уыд АИШ-Цæгат Кореяйы дыккаг саммитмæ бацæттæ кæнын. Дональд Трамп фехъусын кодта, зæгъгæ, æввахс рæстæджы фембæлдзæн Ким Чен Ынимæ.

АЦЫД ОТСТАВКÆЙЫ

Интерполы президент Мэн Хуньвэй, кæцы фесæфт, Китаймæ куы ацыд, уый фæстæ, организацимæ æрбарвыста куырдиат, цыран фехъусын кодта, зæгъгæ, æвæстиатæй цæуы отставкæйы. Интерполы президенты хæстæ рæстæгмæ æххæстгæнæгæй урæд æрцыд Ким Йонг Ян. Организацийы ног къухдариуæггæнæджы æвзæрстытæ уагъд æрцæудзысты ноябры мæйы Дубайы.

ФÆУÆЛАХИЗ «СОГЛАСИЕ»

Латвийы парламентон æвзæрстыты фæуæлахиз парти «Согласие». Ацы партийы уæнгтæ сты Латвийы уырыссаг æвзаг бахъахъхъæныны æвварс. «Согласие» æрæмбырд кодта æппæт хъæлæсты 19,80 проценты. Уый йын сифтонг кæндзæн парламенты раздæрау 24 бынаты.

Информацион агентадты хъусынгæнинæгтæм гæсгæ