ДÆ ЦÆСТ АХÆСС ДУНЕЙЫЛ

ДЫУУÆ ПРЕЗИДЕНТЫ ФЕМБÆЛД

УФ-йы Президент фембæлд Сербийы президент Александр Вучичимæ. Уыдон æруынаффæ кодтой ахсджиаг фарстытыл. Вучич банысан кодта, зæгъгæ, стыр аргъ кæны Уæрæсеимæ æмгуыстадæн æмæ йæ ныфс ис дыууæ бæстæйы ‘хсæн æмгуыстад ноджы кæй фæарфдæр уыдзæн, уымæй. «Стыр бузныг, зынаргъ хæлар, цытджын президент, махимæ иумæ Сербийы территориалон æнæхъæндзинад кæй хъахъхъæныс, уый тыххæй», – загъта Александр Вучич.

СФИДАР КОДТА АРХАЙДЫ ЗДÆХТЫТÆ

УФ-йы Хицауады Сæрдар Дмитрий Медведев сфидар кодта Уæрæсейы Федерацийы Хицауады архайды сæйраг здæхтытæ 2024 азы онг. Ацы документ у сæйраг Уæрæсейы стратегион планкæнынады æмæ бæрæг кæны зонадон-технологон æмæ социалон-экономикон рæзты къабæзты нысæнттæ æмæ сæйраг хæстæ.

РАЗВÆДСГАРДЖЫТЫ АХУЫРТÆ

Казахстаны райдыдтой ОДКБ-йы развæдсгарджыты ахуыртæ «Поиск-2018». Хайад сæ исынц развæдсгарджыты службæтæ æмæ ОДКБ-йы бæстæты дæлхæйттæ, уыцы нымæцы Сомихстоны, Белоруси, Казахстан, Хъыргъызтан, Уæрæсе æмæ Таджикистаны спецслужбæты æртæ мин æфсæддон службæгæнæгæй фылдæр. Маневрты хайадисджыты æмархайды рæстæджы бакуыст æрцæу-дзысты ОДКБ-йы оперативон фердæхты Коллективон тыхты сифтонг кæныны интересты развæдсгæрст сорганизаци кæныны фарстытæ.

ЙÆ ТЫХЫ БАЦÆУДЗÆН ЗАКЪОН

“Республикæ Абхазы паддзахадон æвзаджы тыххæй» закъон среализаци кæныны фæдыл программæ йæ тыхы бацæудзæн 2019 азы”, – фехъусын кодта Абхазы паддзахадон университеты абхазаг æвзаджы кафедрæйы сæргълæууæг Батал Хагуш. «Алыгъуызон аххосæгтæм гæсгæ, цæрджыты иу хай æвзæр зоны мадæлон æвзаг. Цæмæй ацы уавæр рараст кæнæм, уый тыххæй нæ разы æрæвæрдтам мадæлон æвзаг сахуыр кæныны хæс. Мах хъуамæ исæм фæлварæнтæ мадæлон æвзагæй уыцы адæймæгтæй, кæцыты фæнды республикæйы иу кæнæ иннæ бынаты бакусын, цæмæй сбæрæг кæнæм мадæлон æвзаг зонынц æви нæ, уый», – банысан кодта Хагуш. «Фыццаг къæпхæн  фыссын æмæ кæсын сахуыр кæнын, дыккаг – чиновник хъуамæ дзуапп радта йæ архайдимæ баст æппæт фарстытæн, æртыккаг –  профессионалон. Мадæлон æвзагыл хъуамæ дзурой куыд цæрджытæ, афтæ къухдариуæгад дæр. Паддзахадæн уæвæн нæй æнæ паддзахадон æвзагæй, уымæ гæсгæ алчидæр хъуамæ зона мадæлон æвзаг, абхазаг æвзаг хъуамæ хъуыса алы ран дæр», – загъта уый. Уымæй дарддæр ма куыст цæудзæн абхазаг æвзагæй официалонæй хъуыддагдард æмæ паддзахадон органты документты æрзылды спайда кæныныл.

НОБЕЛЫ ПРЕМИЙЫ ТЫХХÆЙ

2018 азы медицинæйы фæдыл Нобелы преми лæвæрд æрцыд америкæйаг Джеймс Эллисон æмæ япойнаг Тасуку Хондзейæн, кæцытæ æрымысыдысты ракы иммунотерапийы ног метод. Лазерон физикæйы къабазы та Нобелы преми лæвæрд æрцыд америкæйаг инженер, физик Артур Ашкинæн æмæ францаг æмæ америкæйаг физик Жерар Муруйæн, афтæ ма канадæйаг ахуыргонд Донна Стрикландæн. Альфред Нобелы фæдзæхсты ис æрмæстдæр фондз здæхты: физикæ, хими, физиологи кæнæ медицинæ, литературæ, афтæ ма æппæт дунейы сабырдзинад сфидар кæныны фæдыл æмархайды тыххæй. 5-æм октябры Ослойы фехъусын кæндзысты Нобелы премийы дунеон лауреаты ном.

АИВТА ЙÆ БАЛЦ

АИШ-ы хъахъхъæнынады министр Джеймс Мэттис аивта йæ балц Китаймæ, кæцы плангонд уыд октябры мæймæ. Мэттис хъуамæ æруынаффæ кодтаид Китайы официалон адæймæгтимæ æдасдзинады фарстытыл, фæлæ ныр бæрæг нæу фембæлд кæд уыдзæн, уый, уымæн æмæ Пекин æмæ Вашингтоны ‘хсæн ахастыты рæзы æндыгъддзинад. Сентябры Иугонд Штаттæ таможнæйон фиддонтæ фæфылдæр кодтой китайаг товартæй бирæтыл. Ивгъуыд къуыри АИШ-ы президент Дональд Трамп фехъусын кодта, зæгъгæ, гæнæн ис æмæ Китайы сæрдар Си Цзиньпинимæ йæ хæлардзинадæн кæрон æрцыд.

СХУЫДТА ЙÆ ПРОВОКАЦИ

Цалдæр боны размæ сербæгтæ цы цæрæн пунктты цæрынц, уырдæм Косовойы спецназы полици кæй бацыд, уый у провокаци, кæцы зæдхт у сербæгты фæтæрсын кæнын æмæ Сербийыл бандавынмæ, – фехъусын кодтой УФ-йы фæсарæйнаг хъуыддæгты министрады. Ведомствойы нымайынц, зæгъгæ, Косовойы хицауады уагахаст гæнæн ис æркодтаид ног тугкалдмæ æмæ схæццæ кодтаид Балканы регион иумиагæй.

БАЗАР КÆНДЗЫСТЫ НАЦИОН ВАЛЮТÆЙÆ

Венесуэлæйы президент Николас Мадуро фехъусын кодта, зæгъгæ, национ криптовалютæйæ базар кæндзысты дунеон  æхсæз фæзуаты. Каракасы ныфс ис, зæгъгæ, инвестортæ райдайдзысты петройæ пайда кæнын æмæ уый баххуыс кæндзæн бæстæйы экономикæйæн. Петро æууæнкджын кæй у, уый бауырнын кæныны тыххæй Мадуро арæх зæрдыл æрлæууын кæны, зæгъгæ, ацы криптовалютæ ифтонг у Венесуэлæйы конкретон æрдзон ресурстæй, зæгъæм, нефты фондз миллиард баррелæй, кæцытæ сты Атапириры хъæуы районы.

РЕФЕРЕНДУМ НЫМАД НЕ ‘РЦЫД

Македонийы ном  Цæгат Македонимæ аивыны тыххæй референдум нымад не ‘рцыд æрмæстдæр дзы æвзарджыты 37% йедтæмæ хайад кæй нæ райстой, уый тыххæй.

ФÆАХХОСДЖЫН КОДТА НЫГУЫЛÆНЫ

Македонийы Уæрæсейы минæвар Сергей Баздникин куыд хъусын кæны, уымæ гæсгæ Евроцæдисы бæстæтæуæнгтæ æмæ Иугонд Штатты минæвæрттæ Македонийы ном аивыны референдумы размæ æрбацыдысты бæстæмæ æмæ фæлвæрдтой Македонийы паддзахады мидæггагон хъуыддæгтæм къух бакæнынмæ. Сентябры мæйы дæр Вашингтоны æмæ Брюсселы чиновниктæ цыдысты Скопьемæ æмæ македониаг æмбæстæгтæм хатыдысты референдумы æвæрццагæй схъæлæс кæныны тыххæй.

Информацион агентадты хъусынгæнинæгтæм гæсгæ