– Тасы æнкъарæнтæ дæр мæм куыд нæ уыд, фæлæ нæм фыццаг цы рынчынтæ æрбакодтой, уыдон тыхстдзинадмæ кæсгæйæ ма мæхи мæт кæм кодтон, – ахæм ныхӕстӕй райдыдта нӕ фембӕлд Республикон рынчындоны эндокринологон хайады хистæр медицинон хо Гæбæраты Людмилæимӕ.
Людмилæ райгуырд Знауыры районы Принеуы хъæуы. Фыццаг ам банкъардта йӕ адæм æмæ фыдыбæстæмæ уарзты æхцон æнкъарæнтæ. Йæ мад Назирӕт æмæ фыд Ростик кæд сæ куысты фæрцы сæ цыппар кæстæры ницы цух уагътой, уæддæр Людмилæйæн скъоламæ цæуынафон куы æрцыд, уæд æй ахуырмæ барвыстой Цхинвалы скъола-интернатмæ. Ахуыргæнджытæ уайтагъд фæхатыдысты, сабийæн йæ ныййарджытæ хорз хъомылдзинад кæй радтой, уый. Людмилæ йæ уроктæ ахуыр кӕныны уӕлдай уарзта сыгъдæг æмæ рæсугъддзинад, хорз ахастытӕ йын уыд йе ‘мкъласонтимæ æмæ йæ уыдон дæр уарзтой сӕхи хойау. Кæд уæдæй бирæ рæстæг рацыд, уæддæр сæ абон дæр æрымысы.
Людмилӕйы, скъолайы ахуыр кæнгæйæ, алы предмет дæр цымыдис кодта, фæлæ стырдæр хъусдард здæхта æмæ йæ йæхимæ тынгдæр æлвæста биологи. Æвæццæгæн, гъе уæд дæр йæ хъуыдыйы уыд медицинон кусæг суæвын. Йæ ахуыргæнджытимæ йын цахæм ахаст уыдис, уый тыххæй йæ куы афарстон, уæд, раст цыма стыр цины хабар фехъуыста, уыйау ныррухс йæ цæсгом. Кæй кой скодта, уыдонæй иу уыд Остъаты Светланæ. Куыд загъта, уымæ гæсгæ Светланæ фыццаг Людмилæйæн йæхицæн уыд ахуыргæнæг, стæй та – йæ лæппуйæн.
Людмилæ 1993 азы каст фæцис Цхинвалы медицинон училище. Кæд фæнд кодта училищейы фæстæ уайтагъд куыстмæ бацæуын, уæддæр ын уæды уæззау уавæртæ фадат нæ лӕвӕрдтой æмæ йæ бонтæ æрвыста рæстæджы домæнтæм гæсгæ, цард уæды рæстæджы цардæй. Йæ дæсныйад та дзы рох нæ уыд. Нæ уыд ахæм бон, æмæ йӕ къухмӕ ма райстаид медицинон чингуытæ, училищейы цы фæфыста, уыдон, æмæ сæ ма бакастаид.
Уæдмæ йын фæзынд куыст дæр. Кусын райдыдта Республикон рынчындоны сывæллæты хайады. Уым кусгæйæ, ахæм хатдзæг сарæзта йӕхицӕн, зæгъгæ, цæмæй сывæллæтты хайады кусай, уый тыххæй æрмæст хорз зонындзинæдтæ нæ хъæуы, фæлæ ма адæймагæн хъуамæ уа фидар зæрдæ.
– Мæнæн, – зæгъы Людмилæ, зын уыд хæрз чысыл сабиты тыхстдзинадмæ кæсын æмæ рацыдтæн терапийы хайадмæ. Иу рæстæджы мæм рынчындоны разамынд бахатыд, цæмæй кусын райдыдтаин эндокринологон хайады, медицинон хотæ дзы кæй нæ фаг кодта, уый тыххæй. Бæргæ, мæхи фæндонӕй нæ ацыдаин, фæлæ мæм рынчындоны разамынд кæй бахатыд, уый тыххæй мæ бон «нæ» зæгъын нæ бацис.
Китайаг коронавирус æрхæццæ Хуссар Ирыстонмæ дæр. Нæ рынчындоны рынчынтæ кодтой бонæй бон фылдæр. Конд æрцыдис «Сырх зонæ». Кæй йæм бакæной, чи дзы кусдзæнис, уыцы фарст куы скъуыддзаг кодтой, уæд дохтыртæ æмæ медицинон хотæй фыццаг чи сразы, уыдонæй иу уыд Людмилæ. Людмилæ цалдæр мæйы цъус зынтæ нæ бавзæрста, фæлæ абон дæр йæ уыцы къахдзæфыл фæсмон нæ кæны. Рынчынтыл дзургæйæ та банысан кодта, зæгъгæ, низ Хуссар Ирыстоны куы сытынг, уыцы бонты уыйбæрц рынчытæ ластой рынчындонмæ, æмæ йæм афтæ каст, цымæ кæмдæр уыд цалдæр стыр срæмыгъды. Алкæмæн дæр сæ йæ уавæр уыд уæззау, алкæмæ дæр сæ хъуыд бацæуын æмæ рæстæгыл баххуыс кæнын. Уыцы хæс «Сырх зонæ»-йы уæнгтæ се ‘ппæт дæр æххæст кæнынц цæсгомджынæй, æнæ сæхи сайгæйæ. Людмилӕ сæ хорз ахасты тыххæй ракодта, æппынæдзух кæимæ уыд, уыцы медиицинон кусджыты кой: Цхуырбаты Ирмæ, Пухаты Аринæ æмæ бирæ æндæртæ.
Людмилæ ма банысан кодта, зæгъгæ, кæд низ фæсаст, цасдæрбæрцæй алæууыд фæстæмæ, уæддæр нырма адæмæн хæссы стыр тасдзинад æмæ фæдзæхсы, цæмæй адæм æххæст кæной, специалисты амындтытæ æмæ домæнтæ.
ГÆЗЗАТЫ Иван
Comments are closed, but trackbacks and pingbacks are open.