Æрæджы, республикон соматикон рынчындоны сæргълæууæг Кокойты Маирбег радио ИрFM-ы æрдзырдта рынчындоны проблемæтæ æмæ сæ куысты ногæй цы фæзынд, уый фæдыл.
Куыд загъта, афтæмæй ныртæккæ рынчындоны уазал доны проблемæ скъуыддзаг æрцыд, палатæтæм дон цæуы æнæкъуылымпыйæ. Цæмæй хъарм доны проблемæ дæр скъуыддзаг æрцæуа, уый тыххæй та хъæуы æгасæй 200- 250 метры дæрддзæгæн хæтæлтæ раивын, æмæ йæ ныфс ис, тагъд рæстæджы уыцы фарст дæр скъуыддзаг кæй æрцæудзæн.
Не ‘мбæстæгтæй бирæты цымыдис кæны рынчындоны Магнитон резонансон томографи (МРТ) ис, æви нæ, уыцы фарст. Уый фæдыл Кокойты Маирбег радзырдта: «Рынчындоны нæй МРТ, ис нæм æрмæстдæр компютерон томографи (КТ), ис нæм ацы аппаратыл сæрмагонд бацæттæгонд специалисттæ æмæ томографи кусы æнæкъуылымпыйæ. Ныридæгæн уал скодтам 150 компютерон басгæрсты, уыцы нымæцы фæндагон транспортон цауты бахауæг æмбæстæгтæн. Томографийы бæлвырдгæнæнтæм гæсгæ, бирæты бахъуыд бынаты операцитæ скæнын, бирæтæ та æрвыст æрцыдысты республикæйæн æддæмæ. Компютерон томографи арæзт цæуы риуы гуыдырæн, уыргтæ æмæ хуылфы дзаумæттæн».
Маирбеджы ныхæстæм гæсгæ КТ аразæн ис планмæ гæсгæ, ома, пациентæн йæхи фæндонмæ гæсгæ, фæлæ уый организмæн у уæлдай фыдæбон. Томографи æнæхъуаджы цæмæй арæзт ма ‘рцæуа æмæ организм ма бавзара уæлдай лазерон тынты, уæлдай æндæвдад, уый тыххæй уал хъæуы æндæр медицинон басгæрстытæ саразын.
Ацы азы райдианы рынчындоны баконд æрцыдысты ног терапевтон хайадтæ. Ныртæккæ кусы эндокринологон хайад. Ис ма дзы сæкæрнизæй рынчынты скъола, цыран рынчынтæ райсынц сæ низы тыххæй бæлвырддæр зонæнтæ, бацамонынц сын, цы домдæуы низимæ тохгæнгæйæ, уыдæттæ. Алы рынчын дæр, афæдзы дæргъы дыууæ хатты æрвыст æрцæуы сæрмагондæй бæлвырддæр басгæрстытæм. Ногарæзт операцион корпусы та кусы, ног медицинон домæнтæн дзуапп чи дæтты, ахæм аппарат – лапараскоп. Кæд раздæр иу операцийыл хардз цыд сахаты бæрц, уæд ныр та бахъæуы цыппор минутмæ æввахс. Афтæ рынчыны æнæниздзинад дæр тагъддæр сæндидзы æмæ дыккаг бон афыст æрцæуы.
Рынчындоны хъахъхъæд цæуынц хатæнты уæлдæфы сыгъдæгдзинады нормæтæ дæр, æвæрд дзы сты, кондиционертæ.
Сывæллæтты медицинон центр æмæ гуырæн хæдзар инфекцион рынчындоны агъуыстмæ хæрзæввахс кæй сты уый тæссаг у, æви нæ, уый фæдыл Кокойты Маирбег загъта: “Куыд зонæм, афтæмæй ам Советтон дуджы фыццаг арæзт æрцыд инфекцион рынчындон, хос дзы кодтой карз инфекцион низтæн. Уый фæстæ та арæзт æрцыд соматикон рынчындон. Советтон дуджы карзæй хъахъхъæд цыдысты æппæт санитарон нормæтæ, уымæ гæсгæ нæ уыд тæссаг инфекцион низтæ парахат кæнынæй. Кæд æмæ ныр дæр хъахъхъæд цæуой æппæт домгæ санитарон нормæтæ, уæд æппындæр не ‘взæры тæссагдзинад. Ныртæккæ инфекцион рынчындоны уæвынад кæны инфекцион микробтæ куынæггæнæн сæрмагонд канализацион системæ дæр. Фæстаг рæстæджы цалдæр хатты фæтынгдæр сты инфекцион низтæ, фæлæ рынчындоны медкусджыты гъæдджын куысты руаджы, уыдон афоныл куынæг æрцыдысты.”
Соматикон рынчындоны сæргълæууæг ма куыд загъта, афтæмæй скъуыддзаг æрцыдысты анестезиологийы фæдыл уæвæг проблемæтæ. Наркоз аразыны аппараттæ сты гъæдджын, æмæ кæд раздæр тыхстдзинæдтæ æййæфтой ацы хъуыддаджы, уæд ныр та ацы фарст скъуыдзаг æрцыд. Реанимацион блокы раздæр нæ фаг кодтой туаггуыры мигæнæнтæ, фæлæ сæм ныр та ис фаг баллонтæ.
Ныртæккæ дунейы медицинæйы фадыджы пайда кæнынц ахæм амалæй, куыд – коронарографи. Уый у ахæм амал, кæцыйы руаджы ис сбæлвырдгæнæн адæймаджы дадзинты сыгъдæгдзинад æмæ у æнæмæнгхъæугæ туджы æлхъывдад нормалон кæныны хъуыддаджы. Дадзинтæ сыгъдæг куынæ вæййынц, уæд туджы куыст слæмæгъ вæййы æмæ фæзыныц алыгъуызон гипертоникон æмæ зæрдæйы низтæ, куыд инфаркт. Ныр соматикон рынчындоны дæр пайда кæнынц коронарографийы амалæй. Цæмæй рынчынæн æрцæуа хос, уый тыххæй хъуамæ æрбацæуа афоныл æмæ сараза æмбæлон медицинон басгæрст.
«Республикон соматикон рынчындоны арæзт æрцыд æмæ ма ноджы дæр цæуы бирæ ахæм медицинон фадæттæ, кæцыты тыххæй раздæр не ‘мбæстæгтæ æрвыст цыдысты республикæйæн æддæмæ, æмæ нырта сты ам, нæхимæ, фæлæ сæ хъыгагæн, нырма алчи нæ зоны. Уый тыххæй та арæхдæр хъусын кæнын хъæуы массон информацийы фæрæзты. Табуафси, æрбацæут нæм уе ‘нæниздзинады фæдыл басгæрстытæм», – загъта Кокойты Маирбег.
Æрмæг бацæттæ кодта Хуыгаты Миленæ
Comments are closed, but trackbacks and pingbacks are open.