Аивфæлыст назбæлас ацы аз Цхинвалы Театралон фæзуаты цытджын æгъдауæй байгом 25-æм декабры æмæ йæхимæ хоны Ног азы къæсæрыл нæ горæты, республикæйы цæрджыты.
Декабры фæстаг бонты ахæм митуард никуыуал уыд æмæ йыл адæм стырæй-чысылæй иууылдæр цин кæнынц. Сæйраг назбæласы алыварс бирæ мит кæй уыд, стæй ма йыл миты тъыфылтæ æнæвгъауæй кæй уарыдысты, уымæй æнахуыр хъæлдзæг æнкъарæнтæ æвзæрыдысты адæймагмæ, раст цыма аргъæутты дунейы бахаудтæ, афтæ.
Назбæлас ацы аз дæр хъæдæй ласт нæу, у пластмассæй æмæ йе сфæлындзыныл та бакуыстой паддзахадон унитарон куыстуат «Ир-дизайн»-ы кусджытæ.
Назбæлас байгом кæныны тыххæй ныр дæр бацæттæгонд æрцыдысты хъæлдзæг номыртæ. Ардæм æрбацыдысты нæ республикæйы æмбæстæгтæ, скъолаты æмæ сывæллæтты рæвдауæндæтты хъомылгæнинæгтæ сæ ахуыргæнджытæ æмæ ныййарджытимæ. Театралон фæзуаты Митын дада æмæ Митын чызг сабитимæ кафыдысты назбæласы алыварс, зарыдысты бæрæгбонон зарджытæ, кастысты æмдзæвгæтæ. Сывæллæттæн Митын дада байуæрста ногазон лæвæрттæ æмæ сæ фæдзæхста, цæмæй хъусой сæ ныййарджытæм æмæ хорз ахуыр кæной.
Республикæ Хуссар Ирыстоны Президент Гаглойты Алан дæр республикæйы разамынады æндæр бæрнон адæймæгтимæ фæуазæг Театралон фæзуатмæ, цæмæй сын уыдонæн æмæ æппæт республикæйы цæрджытæн дæр раарфæ кодтаид.
«Зынаргъ сывæллæттæ æмæ республикæйы æмбæстæгтæ, абон мах нысан кæнæм ногазон бæрæгбон æмæ хъуамæ иумæ ссудзæм нæ рæсугъд назбæласы цырæгътæ. Не ‘ппæт дæр æнæрхъæцæй æнхъæлмæ кæсæм ног 2024 азы æрбалæудмæ æмæ уын зæрдиаг арфæ кæнын æрбалæугæ ног азы цытæн. Фæнды мæ, цæмæй бæрæгбоныл сæмбæлат æнæниз æмæ амондджынæй уæ бинонтимæ иумæ. Цыдæриддæр фæндтæ æмæ уæм хорз хъуыдытæ ис, уыдон уын иууылдæр сæххæст уæнт!»
Ногазон арфæты фæстæ Митын дада æмæ Митын чызг сывæллæттæ æмæ уазджытимæ ссыгътой сæйраг назбæласы цырæгътæ æмæ йыл сæмбæлдысты цины хъæртимæ. Бæрæгбон адарддæр хъæлдзæг концерт æмæ инсценировкæтæй.
Нæ уацх.
