Цæгат Ирыстоны фæбæрæг сты уæгъдибар хъæбысхæстæй Уæрæсейы сгуыхт тренертæ Зæгъойты Рамазан æмæ Наниты Олегы мысæн командон турниры уæлахиздзаутæ æмæ призертæ. Ерыстæ уагъд æрцыдысты Беслæны.
Сыгъзæрин майдантæ рамбылдтой Таймæзты æфсымæрты клубы атлеттæ. Уыдон рамбылдтой Рахизфарсы районы æмбырдгонд командæйы. Андиаты Сосланы номыл спортивон скъолайы æвзонг минæвæрттæ та бацахстой æртыккаг бынат. Уæлахиздзаутæ æмæ призертæ хорзæхджын æрцыдысты грамотæтæ, майдантæ æмæ æхцайы призтæй.
ХЪАВЫ РЕВАНШ РАЙСЫНМÆ
Уæззау уæзы категорийы архайæг боксер Гасситы Мурат фехъусын кодта, зæгъгæ, йæ фæнды реванш-тох ауадзын шведаг Отто Валлинимæ.
«Цæмæн фембылды дæн Валлинæн? Уый уыд мæнæй тыхджындæр æмæ цырддæр. Хъæуы кусын æмæ алцыдæр ногæй райдайын. Æз уыдтæн хорз цæттæ, фæлæ мæ ныхмæлæууæг ноджы хуыздæр цæттæ уыд. Уый мын фадат нæ радта æппæт мæ потенциал равдисынæн. Тактикæ? Уым уыд план В, С æмæ А дæр. Хъыгагæн, æртæ иумæ не скуыстой. Уый та нысан кæны, хъæуы фылдæр плæнттæ тохмæ бацæттæ кæныны тыххæй. Фæнды мæ иу хатт ма йемæ фембæлын. Куыддæр мын уавæр фæзына, афтæ дзы спайда кæндзынæн. Æмæ уæд фæбæрæг уыдзæн алцыдæр», – фехъусын кодта Гасситы Мурат.
ХУРИТЫ Батрадз
