Ногазон мадзæлттæ

УЫДЗÆН ПРЕЗИДЕНТОН НАЗБÆЛАС

Æрвылазон президентон назбæлас уагъд æрцæудзæн Сывæллæтты сфæлдыстады галуаны 3-æм январы 12 сахатыл æппæт санитрон нормæтæ хъахъхъæнгæйæ. Коронавирусы пандемийы аххосæй ацы аз Сывæллæтты сфæлдыстадон галуан йæхимæ райсдзæн бæрæг къаддæр сывæллæтты, ома, æрмæстдæр 100 сывæллоны.

Уæлæмхас ахуырадон уагдоны ныртæккæ кæронмæ фæуд кæнынц цæттæгæнæн мадзæлттæ. Бахуыдтой Митын Чызджы уæлæдарæс, аразынц Малефисентайы лыстæг лæдзæг. Ногазон бæрæгбонон мадзалмæ бахуыдтой ног уæлæдарæс, æмбæлон уагмæ æркодтой, ивгъуыд аз кæмæй пайда кодтой, уыцы уæлæдарæсы дæр. Сцæттæ кодтой ирон орнаменттимæ Митын Чызджы уæлæдарæс.

Кæд-иу иннæ азты бæрæгбонмæ бацæттæ кæныны мадзæлттæ райдыдтой декабры райдианы, уæд ныр коронавирусы пандеми бахаста йæхи ивындзинæдтæ. Ныр, галуаны æвзонг кусджытæ бакуыстой улæфтбонты дæр, цæмæй æппæт дæр æмбæлонæй бацæттæ кодтаиккой ногазон мадзалмæ. Уæлæмхас ахуырадон уагдоны директор Джиоты Арянæйы ныхæстæм гæсгæ, галуаны къухдариуæгады рекомендацимæ гæсгæ хистæр кары кусджытæ куыстмæ нæ цæуынц се ‘нæниздзинад ба-хъахъхъæныны нысанæн.

 Ногазон бæрæгбонон программæ дæр иннæ азтæм абаргæйæ, уагъд цæудзæн къаддæр рæстæджы. Музыкалон номыртæн æвдыст æрцæудзæн æрмæстдæр се ‘мбис. Раздæрау æнæаивгæйæ баззадысты Митын Дада æмæ Митын Чызджы хайадистæй номыртæ. Удæгас фондзметрон назбæласы сфæлындзынæн бахъæуы цалдæр боны. Назбæласыл æрмæст гриляндæтæ æрцауындзынц 50 метрæй фылдæр. Иу уыйбæрц та æрцауындзынц йæ алыварс царыл.

3-æм январы назбæласы алыварс æрзилын  æмæ хъæлдзæг рæстæг арвитын сæ бон суыдзæн Сывæл-лæтты сфæлдыстады галуаны 100 активондæр  ахуырдзауæн, алыгъуызон конкурсты уæлахиздзаутæн. Уагдоны курдиатжын коллективы фæрцы сывæллæттæн фадат уыдзæн аргъæутты алæмæттаг дунейы аныгъуылынæн æмæ бæрæгбонон зæрдæйы равг банкъарынæн. Ногазон Назбæлас уагъд цæудзæн æрмæстдæр иу бон.

СФÆЛЫНДЗЫДТОЙ КЪÆЛИДОРТÆ

     Коронавирусы пандеми йæхи ивындзинæдтæ бахаста алы фадыгмæ дæр, уыцы нымæцы ахуырадон къабазмæ дæр. Иннæ азтимæ абаргæйæ, скъолаты рæстæгмæ æмбæлонæй уагъд нал цæуы ахуыры процесс æмæ алыгъуызон бæрæгбонон мадзæлттæ. Фæлæ уымæ нæ кæсгæйæ, нæ горæты 6-æм астæуккаг скъолайы райдиан кълæсты ахуыргæнинæгтæ равдыстой сæ аивадон курдиат æмæ сæхи къухтæй сарæзтой ногазон назбæлас æмæ æндæр цымыдисон дзаумæттæ. Æрвылбон дæр сывæл-лæттæ скъоламæ хастой, сæхи къухтæй кæй сарæзтой, ахæм ногазон дзаумæттæ, уыцы нымæцы хъæбæр гæх-хæтæй арæзт чысыл хæдзæрттæ, кæцытæ æмбæрзт уыдысты митæй, пенапластæй арæзт Митын Дада. Сывæллæттæн къæлидортæ сфæлындзынæн баххуыс кодта райдиан кълæсты ахуыргæнæг Гугкаты Залинæ. Уымæн йæ диссаджы куыстытæ срæсугъд кодтой къæлидоры къултæ. Афтæ ма сфæлындзыдтой рудзгуыты дæр, æвгтыл бандæгътой гæххæттæй слыггонд Митын Чызджы æмæ Митын Дадайы, миты тъыфылтæ æмæ æндæр хъазæнтæ.

Сывæллæттæн баххуыс кодтой куыд сæ ахуыргæн-джытæ, афтæ сæ ныййарджытæ дæр. Алкæцы куысты дæр скъоладзаутæ бавæрдтой сæ уды хъармдзинад, цæмæй ногазон бæрæгбон уа аивдæр æмæ хъæлдзæгдæр.

Нæ уацх.