Зиуы тых егъау у. Ирон адӕммӕ дӕр ацы раппӕлинаг хъуыддаг ӕрбынат кодта рагӕй ӕмӕ йын ис стыр ахадындзинад. Зиутӕ та раджы рӕстӕджы арӕхдӕр кодтой ӕххуысхъуаг, ӕвӕгӕсӕг ӕмӕ рынчын адӕймӕгтӕ ӕмӕ бинонтӕн. Афӕдзы дӕргъы иу куыст ӕййӕфта иннӕйы ӕмӕ сӕ рӕстӕгыл хъуыд ӕххӕст кӕнын. Зӕгъӕм, уалдзӕджы фылдӕр ӕххуыс кодтой цӕхӕрадӕттæ къахын, алыгъуызон хъӕууонхӕдзарадон культурӕтӕ тауын, сӕрд та уыдонмӕ ӕмбӕлон ӕгъдауӕй базилынмæ. Фӕлӕ сӕрдыгон иууыл ахсджиагдӕр куыст уыд хосгӕрдӕн, нæ йын уыд аргъæвæн ӕмӕ-иу ӕйттмардзӕ цӕвӕджджынтӕ балӕууыдысты сӕ уӕлхъус. Къаддӕр нӕ уыдысты фӕззыгон ӕмӕ зымӕгон аудинӕгтӕ дӕр ӕмӕ уыцы афон дӕр зиутӕ кодтой. Зиумӕ, ӕххуыс кӕнынмӕ цыдысты куыд къордгӕйттӕй, афтӕ хицӕн адӕймӕгтӕ дӕр, куыд хистӕр кары адæм, афтӕ кӕстӕртӕ ӕмӕ фӕсивӕд дӕр. Ӕнӕ уӕлдай ныхасӕй, хъӕлдзӕг ӕмӕ хорз зӕрдӕйы уагимӕ ӕххӕст кодтой сӕ куыст.
Кӕй зӕгъын ӕй хъӕуы, зиутӕ канд хицӕн бинонтӕн нӕ кодтой. Зиутӕ ныббиноныг сты куыстуӕттӕ, уагдӕттӕ, организациты дæр. Сӕ нысан та уыд ӕмӕ абон дӕр у сӕ алыварс территори фӕткмӕ ӕркӕнын ӕмӕ йæм базилын, сыгъдæгдзинадыл аудын. Мӕнӕ ацы къамы кӕй уынут, уыдон сты Цхинвалы хъӕдгуысты комбинаты кусджытӕ. Уӕд нырма ацы куыстуат чысыл уыд, бирӕ нӕ уыд йӕ кусджыты нымӕц дӕр, фӕлӕ 1927 азы октябры мӕйы сылгоймагӕй нӕлгоймаджы онг активон хайад райстой зиуы.
Ахæм стыр нысаниуӕг уыд зиуæн раздӕры азты ӕмӕ ныр дӕр нӕ адӕмы ‘хсӕн.
ХУЫБИАТЫ Никъала
Comments are closed, but trackbacks and pingbacks are open.