16-æм июлы Цхинвалы районы Залдайы хъæуы фыдгæнджыты æрцахсыны фæдыл оперативон мадзæлттæ райсыны фæстиуæгæн уæззау цæфтæ фесты дыууæ милицийы кусæджы.
Цхинвалы районы милицийы мидхъуыддæгты управленийы фæдагуырды æмæ фадыгон инспектортæ ацыдысты Залдайы хъæумæ, сæ службæйон хæстæ æххæст кæнынмæ. Ахæм кусæгон азылд территорийыл милицийы кусджытæ фæкæнынц регулярон æгъдауæй алы хъæуы дæр. Уый размæ бон дæр кодтой профилактикон куыст уыцы хъæуы цæрджытимæ æмæ ма сын æнæсгæрст баззадысты цалдæр хæдзары æмæ дыккаг бон хъуамæ адарддæр кодтаиккой сæ куыст. Райсомæй бацыдысты 73-аздзыд бынæттон цæрæг Гæбæраты Барисы хæдзары кæртмæ æмæ сæ фыдгæнджытæ æнæнхъæлæджы фехстой автомат «Калашникова»-йæ. Милицийы кусджытæ дыууæйæ уæззау цæфтæ фесты, фæлæ ма фæцарæхстысты фæстæмæ фехсын. Нырма бæстон бæрæг нæу, фæлæ фыдгæнджытæй иу – Гæбæраты Сæрмæт дæр фæцæф ис. Иннæ фыдгæнæг Къæбысты Андрей баззадис æвыдæй. Дыууæ фыдгæнæгæн дæр, хъыгагæн, бантыстис бамбæхсын.
Милицийы кусджытæ Пухаты Сослан æмæ Гатыгкоты Захар уæззау цæфтимæ бахаудтой рынчындонмæ. Дохтыртæ сын æнæхъæн бон кодтой операцитæ, фæлæ сæ уавæр нырма дæр у мæгуырау, уымæн æмæ сыл сæмбæлд цалдæргай нæмгуытæ.
Ацы æбуалгъ цауы æрцыды фæстæ республикæйы æппæт тыхон структурæтæ дæр райдыдтой агурын фыдгæнджыты. Залдайы хъæуы алфæмбылай æмæ ма хъæдты дæр зилынц милицийы кусджытæ, кæцытæн æххуыс кæнынц Паддзахадон хъахъхъæнынады, прокуратурæ, Ӕдасдзинады министрады æмæ æндæр тыхон структурæты кусджытæ. Фыдгæнджыты фæд ссарыны тыххæй милицийы Сæрмагонд нысаниуæджы къорды æрмахуыр куыйтæ дæр хайад райстой фæдагурæн мадзæлтты, фæлæ нырма ницы фæстиуджытæ ис.Оперативон-агурæн мадзæлттæ уагъд цæуынц æнæрлæугæйæ.
Хъæуы цæрджытæ куыд зæгъынц, афтæмæй никуы ничи федта фыдгæнджыты, нæдæр хатгæ ракодтой, уыцы хæдзары æнæзонгæ уазджытæ ис, уый. Милицийы кусджытæ бæрæг кæнынц цæрджыты ныхæсты рæстдзинад. Бæрæг куыд у, афтæмæй фыдгæнджытæ æппынæдзух уыцы хæдзары нæ цардысты. Хъæды сын уыдис хиарæзт ныккæнд æмæ-иу куы фæтарстысты, уæд-иу уырдæм ацыдысты сæхи бааууон кæнынмæ.
Гæбæраты Сæрмæт ахст уыд къæрных кæныны тыххæй æмæ йын Цхинвалы тæрхондон рахаста иу аз æмæ æрдæг ахæстоны фæбадыны тæрхон. Ныр иу азæй фылдæр æмбæхсы милицийæ.
Къæбысты Андрей фылдæр фыдракæндтæ сарæзта, – дыууæ хатты йын уыд къæрных кæныны цаутæ, дыууæ хатты бастыгъта не мбæстæгты, иу хатт та адавта адæймаджы æмæ йæ стæй куы ахстой, уæд милицийы кусджытæм ныхмæ фæлæууыдис æхсæнгарзимæ. 2018 азы йын бантыст алидзын милицийы рæстæгмæ дарæн изоляторæй æмæ уæдæй нырмæ æмбæхсы.
Ныр та сæ фыдракæндтæм бафтдзæнис ноджы дыууæ статьяйы, – æнæзакъонæй æхсæнгарз дарын æмæ милицийы кусджыты амарынмæ бахъавын.
ДЖИОТЫ Александр
Comments are closed, but trackbacks and pingbacks are open.