Бирæпрофилон колледжы бацæттæ кæндзысты 17 механизаторы. Цæмæй нырыккон трактортæ, комбайнтæ æмæ машинæтыл скъæрын сахуыр уой.
«Уыдон мæй æмæ æрдæг ахуыр кæндзысты курсыты, уый фæстæ сын лæвæрд æрцæудзæн сертификат, цæмæй сæ бон уа официалонæй кусын. Нырыккон техникæ иууылдæр у компьютеризацигонд. Комбайн цы алыгъуызон хъæууон хæдзарадон функцитæ æххæст кæны, уыдон се ‘ппæт дæр зонын хъæуы. Афтæ ма фæндагон арæзтадты цы сæрмагонд техникæйæ пайда цæуы, уыдон дæр. Тракторист-машинисттæ цы курсытæм байхъусдзысты, уым сын лæмбынæг бафæрсдзысты теори, уый фæстæ практикон æгъдауæй бафидар кæндзысты сæ зонындзинæдтæ æмæ æдæрсгæйæ кусдзысты», – радзырдта нын Бирæпрофилон колледжы ахуырады хайады методист Джиголаты Мадинæ.
Механизатортæн курсытæ уадзы Хъæууон хæдзарады фадыджы инженер-механизатор – Козаты Мурат. Курсыты чи ахуыр кæны, уыдонæй спецтехникæйыл чи кусы, ахæмтæ дæр ис, фæлæ сæ фæнды кæронмæ базонын æппæт сусæгдзинæдтæ. Бынтон æвзонг лæппутæ та сты республикæйы алы районтæй.
Колледжы механизацийы курсытæй дарддæр ноджы ис æндæр дæсныйæдтæ райсæн дæр. Уыдонæй бирæтæ абон приоритетон сты нæ æрыгон республикæйæн. Цы арæзтæдтæ нæм цæуы Инвестицион программæйы фæлгæтты, уым хъæуы квалификациджын специалисттæ.
Специалистты номхыгъды сты: хæринагаразæг, кондитер, слесарь, электрик, токарь, хæдтулгæтæ цалцæггæнæн, хуыйæг, æхсæнадон хæлцы продукцийы технолог æмæ æнд. Ивгъуыд азы ма колледжы байгом ноджыдæр нымæцон информациты дæсныйады факультет дæр.
2016 азы колледжæн арæзт æрцыд йæхи сæрмагонд æрмадзтæ. Раздæр та студенттæ кондадон практикæйы цыдысты республикæйы арæзтадон объектты. Хайад-иу райстой Цæгат Ирыстоны кондитерты, слесарты æмæ хуыйджыты конкурсты. Фæлæ ныр ам цы алыгъуызон дæсныйæдты æрмадзтæ ис, уыдоны практикæ рацæуынæн ис æппæт уавæртæ дæр.
Колледжы ахуырады хайады методист Джиголаты Мадинæ ма куыд зæгъы, афтæмæй æрвылаз дæр бирæпрофилон колледжмæ ахуыр кæнынмæ æрбацæуы 90-100 студенты. Ахуыры процессы йæ зонындзинæдтæ æвзæр кæмæн вæййынц æмæ бирæ цухтæ кæмæн ис, уыдон æрвыст æрцæуынц колледжæй. Иууыл фылдæр студенттæ вæййы хæриангаразæг æмæ кафелæвæрджыты хайады. Иууыл къаддæр та – аграрон хайады.
Колледжы къухдариуæгад архайы ууыл, цæмæй сæ ахуыргæнæндонмæ бацæуынмæ æрыгон фæлтæр тынгдæр тырной. Уый нысанæн æрвылаз колледжы вæййы «Гом дуæртты бон». Фæхонынц горæты скъолаты ахуыргæнинæгты, афтæ ма республикæйы районты æрыгон фæсивæды дæр. Базонгæ сæ кæнынц дæсныйæдтимæ, саразынц сын экскурситæ куыд æрмадзтæм, афтæ ахуырадон корпусмæ дæр.
Алы аз бирæпрофилон колледжы рауагъдонтæ ныффыссынц дипломон куыстытæ æмæ сæ зонындзинæдтæ та фидар кæнынц фæлварæнтæй. Июлы æмбисы райдыдтой абитуриенттæй гæххæттытæ исын. Исæн къамис кусдзæн суанг августы мæймæ. Вæййы афтæ дæр, студент иу аз райсы иу дæсныйад, дыккаг аз та – æндæр. Колледж ифтонг у æмдзæрæндонæй дæр. Боны иу хай студенттæн вæййы ахуыр, иннæ хай та – практикæ. Ифтонг цæуынц хъарм сихорæй. Дæсныйад райсыны фæстæ студенттæ æнцонæй ссарынц куыст, уымæн æмæ ам цы дæсныйæдтæн райсæн ис, уыдон се ‘ппæт дæр сты, ныртæккæ нæ республикæйы зæрдиагæй чи хъæуы, ахæмтæ.
Уазæгты Марфа
