2010 азы Цхинвалы цы хъæууонхæдзарадон техникум уыд, уый базæйыл байгом бирæпрофилон колледж. Уый уыд дуджы домæн, уымæн æмæ дæсгай азты хæсты фæстиуæгæн пырх æмæ сыгъд æрцыд сæдæгай хъæутæ. Ныппырхгонд инфраструктурæ, хæдзæрттæ сæндидзын кæнын, ногæй хъæууон хæдзарадмæ хъус æрдарынæн хъуыд квалификациджын специалисттæ. Бынаты квалификациджын кадртæ цæттæ кæнынæн хорз ахъаз уыд колледж.
Зæгъын хъæуы уый æмæ колледжы хорз уавæртæ арæзт æрцыд, æрæмбырд кодтой, йæ дæсныйад хорз чи зоны, ахæм ахуыргæнджытæ æмæ ацы ахуырадон уагдон, æцæгæйдæр, ссис æвзонг фæлтæры ‘хсæн популярон. Колледжы рауагъдонтæй абон бирæтæ кусынц республикæйы арæзтцæуæг объектты.
Колледжы абон ис 12 хайады, цыран цæттæ кæнынц ахæм дæсныйадтыл, куыд, зæгъæм, хæринагаразæг, кондитер, слесарь, электрик, токарь, автомобилтæ цалцæг кæныны мастер, хуыйæджы, æхсæнадон хæлцады технологтæ, экономикæ æмæ бухгалтеры хыгъд, агроном, фæндагон арæзтад. Æххæстæй ифтонг у кадртæй.
Колледжæн цалынынмæ сæхи æрмадзтæ арæзт нæ уыд, уæдмæ-иу студенттæ кондадон практикæйы цыдысты республикæйы объектты. Хатт-иу сæ бахъуыд Цæгат Ирыстонмæ ацæуыны сæр дæр.
2016 азы колледжæн арæзт æрцыдысты æрмадзтæ. Уыдон иууылдæр ифтонг æрцыдысты нырыккон хъæуæг ифтонгæдтæй.
Колледжы ахуыргæнджыты коллектив афæдз иу хатт ауадзы «Гом дуæртты бон». Уырдæм хуынд æрцæуынц горæты æмæ ра-йонты иумæйагахуырадон скъолаты ахуыргæнинæгтæ. Базонгæ сæ кæнынц ахуыры процессимæ. Саразынц сын экскурситæ æрмадзтæм. Хæринагаразæджы æмæ кондитерон хайады студенттæ скæнынц æмæ фынгыл равæрынц алыгъуызон хæринæгтæ. Иннæ æрмадзты рауагъдон студенттæ дæр практикон æгъдауæй равдисынц, колледжы ахуыргæнгæйæ сын сæ ахуыргæнджытæ цы бацамыдтой, уыдон. Афтæмæй алы хайады студенттæ дæр фæагитаци кæнынц скъолайы ахуыргæнинæгты, цæмæй равзарой, сæ зæрдæмæ æввахсдæр дæсныйад кæцы у, уый. Ардæм цы ахуыргæнинæгтæ æрбацæуынц, уыдонæй уый фæстæ бирæтæ свæййынц колледжы студенттæ. Вæййы афтæ дæр æмæ уыдон нырма фæвæййынц иу факультет, уый фæстæ та равзарынц æндæр дæсныйад æмæ та уый дæр сахуыр кæнынц.
Бирæпрофилон колледжы кæд 12 хайады ис, уæддæр абитуриенттæ иууыл тынгдæр равзарынц хæринагаразæг, электромонтажгæнæг æмæ кафелгæнæджы дæсныйадтæ. Къаддæр студенттæ цæуы агрономы дæсныйад кæм ис райсæн, уыцы хайадмæ. Ивгъуыд аз ма колледжы æрбакондæуыд, нымæцон информациты мастерты кæм цæттæ кæнынц, ахæм хайад. Уым дæр бирæ студенттæ нæ уыд, фæлæ ацы аз æнхъæлмæ кæсынц æмæ сæ ныфс ис фылдæр студенттæ сæм кæй æрбацæудзæнис, уымæн æмæ ныры дуджы ацы професси у хъæуæг æмæ дзы нæ республикæйы та нæй фаг специалисттæ.
Колледжы арæзт æрцыд æппæт уавæртæ дæр ахуыр кæнынæн. Ис дзы æмдзæрæндон, цыран, сæ бон у цæрын, дæрддзæф районтæй сæм цы студенттæ цæуы, уыдонæн. Ифтонг цæуынц хъарм сихор æмæ стипендийæ дæр. Ахуыры æмгъуыд хицæн æмæ хицæн хайадты у алыгъуызон. Зæгъæм экономикæ æмæ бухгалтеры хыгъды факультеты 9 классы бындурыл у 2 аз æмæ 10 мæйы, 11 классы бындурыл та 1 аз æмæ 10 мæйы. Фæлæ цæмæй æхсæнадон хæлцады техник-технологы дæсныйад райсай, уый тыххæй та 9 классы бындурыл ахуыр кæнын хъæуы 3 аз æмæ 10 мæйы, 11 классы бындурыл та 2 аз æмæ 10 мæй.
Ацы аз бирæпрофилон колледжмæ исæн къамис йæ куыст райдайдзæнис 1-æм июлы æмæ 25-æм августмæ исдзæн абитуриентты гæххæттытæ мæнæ ахæм адресыл, Герцены уынг №1. Фæдзурæн та сæм уыдзæн ахæм телефонтæй 8-929-804-20-50, 8-929-805-48-31. Фæлварæнтæ лæвæрд цæудзысты абитуриентимæ ныхас кæныны бындурыл.
Уазæгты Марфа
Comments are closed, but trackbacks and pingbacks are open.