Зынаргъ газеткæсджытæ, мæ уацы уæ базонгæ кæндзынæн диссаджы хорз адæймаг, Республикæ Хуссар Ирыстоны Гарзджын тыхты æмæ хæстон архайдтыты ветеранты республикон æхсæнадон организацийы советы сæрдар (запасы УФ-йы Гарзджын тыхты булкъон) Тедеты Валери Константины фырты цардвæндаг æмæ сгуыхтдзинæдтимæ, афтæ ма нæ организаци цы хæрзаудæн куыст кæны, уыимæ дæр. Украинæйы уагъдцæуæг сæрмагонд æфсæддон операцийы хæстонтæн баххуыс кæныны нысанæн Тедейы фырт йæ алыварс æрбамбырд кодта æрмæст йæ дæлбар республикон ветеранты организацийы уæнгты нæ, фæлæ ма ацæргæ кары æмхъуыдыгæнджыты дæр.
Валери æнтыстджынæй каст фæцис инженерон æмæ бастдзинады æфсæдты фæдыл Донецкы уæлдæр æфсæддон-политикон ахуыргæнæндон. Йæ царды фæндæгтыл уый фидар къахдзæфтæй фæцыд чысыл æмæ стыр хъуыддæгтæ аразгæйæ. Рæнхъон матросæй (службæ кодта Севастополы), прапорщикæй схызт Уæрæсейы Федерацийы Гарзджын тыхты булкъоны онг, ныфсджынæй йæхи къахвæндæгтыл цæугæйæ, æфсæддон ныхдурты æмæ зындзинæдты сæрты хизгæйæ. Афтæ ма алыхатт дæр йæ зæрдыл дардта æмæ абоны онг дæр дары Райгуырæн бæстæйы раз йе ‘мбæстагон хæсы, йæ радтæг адæммæ, хæлæрттæм уарзондзинады ахаст.
Валери Константины фырт у бирæнымæц конфликтты хæстон архайдтыты, уыцы нымæцы Хæххон Къарабах æмæ Хуссар Ирыстоны хæстыты хайадисæг. Хорзæхджын æрцыд Советон Цæдисы, Уæрæсейы Федерацийы æмæ Республикæ Хуссар Ирыстоны бирæнымæц паддзахадон хорзæхтæй – ордентæ «Красная звезда» æмæ «За веру в Отечество», майдан «За боевые заслуги», æмæ бирæ æндæртæй.
Тедейы фырты алыварс лæууынц æфсæддон ардбахæрды домæнтыл æнувыд æмбæлттæ, куыд зæгъæм: Уалыты Гайоз, Табуты Дяноз, Козаты Мурат, Туаты Серафим, Битеты Юри, Джиголаты Виктор, Хуриты Владимир (Мурик), Тедеты Æхсар, Къацты Ахмæт, Дзæгъиаты Вадик, Санахъоты Витали, Коцты Павел, Гæбæраты Азæ, Тасойты Леонид, Болататы Руслан (Пушкин), Тедеты Витали, Тедеты Тимур, Æлборты Жаннæ, Плиты Христофор, Хуриты Мадинæ, Галуанты Инал, Плиты Беллæ, Дриаты Мзия, Зозырты Георги, Гæбæраты Алан, Гобозты Рутен, Къæбулты Алан, Гæбæраты Феликс (ацы уацы автор) æмæ бирæ æндæртæ.
Тедеты Валерийæн æмæ махæн не ‘ппæтæн дæр стыр æххуыс кæнынц: Юстицийы министр Гаглойты Олег, Президенты Администрацийы къухдариуæггæнæг Джиоты Алан, Хицауады сæрдар Джуссойты Константин, æхгæд акционерон æхсæнад «Мегафон – Южная Осетия»-йы генералон директор Николай Фирсов, йæ хæдивæг Бежанты Заринæ, Цапайты Алексей (Ирон сæн), мидæггагон политикæйы фæдыл Президенты управленийы хистæр Уанеты Мурат, Тыбылты Демури, Тедеты Залихан æмæ бирæ æндæртæ.
2022 азы 24-æм февралы нацизмы ныхмæ сæрмагонд æфсæддон операци куы райдыдта, уæд Ирыстойнаг хæстонтæ дæр æрбангом стæм уæрæсейаг æфсадæн баххуыс кæныны сæраппонд.
Нæ ветеранты организаци арæзт æрцыд зынтæй, фæлæ абон мах æххуыс кæнæм хæстон архайдтыты ветерантæн, фæмардуæвæг хæстонты бинонтæн, рынчынтæн, сывæллæттæн æмæ инвалидтæн. Службæйон кабинет нын кæй нæ уыд (абоны онг дæр нын нæй), уымæ гæсгæ нын Валери йæхи сæрмагонд хæдзары рахицæн кодта иу хатæн. Йæ организаторон курдиæтты фæрцы Тедейы фыртæн йæ бон ссис не ‘рбангом кæнын, цæмæй нæ лæппутæй йе ‘фсæддон хæс чи æххæст кæны, уыдон зоной, сæ фæстæ фидар мæсыгау кæй лæууынц Уæрæсе æмæ Хуссар Ирыстоны æппæт æмбæстæгтæ дæр.
2023 азы 21-æм майы Уæрæсейы Федерацийы Хъазахъхъæгты цæдисы федерацийы сæйраг управленийы хистæр, инæлар-лейтенант Щербин Виталий Барисы фырты бардзырдмæ гæсгæ, булкъон Тедеты Валери Константины фырт хорзæхджын æрцыд «За Донбасс»-ы орденæй Уæрæсе æмæ уæрæсейаг хъазахъхъæгты раз йæ лæггæдты тыххæй. Валерийæн хорзæх радта Виталий Щербины фыццаг хæдивæг, инæлар-майор Беппиты Инал.
Уый размæ йын уыд хæслæвæрд хæстонтæн гуманитарон æххуыс æрæмбырд кæнын æмæ йæ сæрмагонд æфсæддон операцийы зонæмæ аласыны тыххæй. Ацы бонты Тедейы фырт æмæ æхсæнадон организацийы уæнгты иу хай æнтыстджынæй сæххæст кодтой ацы ахсджиаг хæс.
Тедейы фырт куыд зæгъы, афтæмæй ацы хорзæх æрмæст йæхи нæу, фæлæ ма у æхсæнадон организацийы æппæт коллективы хорзæх дæр.
Валери Константины фырт!
Айс нын нæ арфæтæ, бантысæд дын ноджы фылдæр саразын, нæ зæрдæ дын зæгъы æнæниздзинад æмæ зæрдæрухс цард. Нæ хъуыддаг у раст æмæ фæуæлахиз уыдзыстæм!
ГÆБÆРАТЫ Феликс,
РХИ-йы Гарзджын тыхты æмæ хæстон
архайдтыты ветеранты республикон æхсæнадон
организацийы советы сæрдары фыццаг хæдивæг
