УÆРÆСЕМÆ ÆВИ – НÆХИ УНИВЕРСИТЕТМÆ

Фарон нæ республикæйы скъолаты сыгъзæрин майдантæ райстой 18 ахуыргæнинаджы. Ацы аз сæ нымæц фæкъаддæр, сты  10 медалисты.

«Россотрудничество»-йы фæрцы Уæрæсейы Федерацийы ахуырадон уагдæттæм чи цæуы, уыдон фæлварæнтæ радтой цалдæр мæйы размæ. Уыдонæн сæ зонындзинæдтæн канд фæлварæнтæм гæсгæ нæ аргъ кодтой, фæлæ фылдæр фадæттæ  радтой олимпиадæты уæлахиздзаутæн, стæй ахуыры процессы рæстæджы ЕГЭ-йы тесттæ чи хуыздæр æххæст кодта, уыцы ахуырдзаутæн. Раздæр-иу рауагъдонтæ «Россотрудничество»-мæ æрмæстдæр бавдыстой до-кументтæ æмæ нысæнтты табель. Фæлæ, кæй зæгъын æй хъæуы, æрмæст нысæнттæм гæсгæ зын у ахуыргæнинаджы зонындзинæдтæ сбæлвырд кæнын. Уый тыххæй райстæуыд уынаффæ, цæмæй сывæллæтты зонындзинæдтæ бæлвырд цæуой алыгъуызон тесттæй.

Ахуырад æмæ зонады министрады пресс-службæ куыд хъусын кæны, уымæ гæсгæ фæстаг азты рауагъдонтæй Уæрæсейы Федерацийы уæлдæр ахуыргæнæндæттæм чи ацæуы, уыдон вæййынц хорз цæттæ.

Ивгъуыд аз рауагъдонтæ фæлварæнтæ лæвæрдтой канд Мидхъуыддæгты æмæ Хъахъхъæнынады министрадты нæ, фæлæ ма Уæрæсейы финансон академимæ æмæ лингвистикæйы фæдыл уæлдæр ахуыргæнæндæттæм дæр. Нæ рауагъдонтæй цалдæрæй та ацыдысты Цæгат Ирыстон-Аланийы Аграрон æмæ Хæххон металлургион институттæм. Ацы аз дæр та хонæнтæ уыдзæн ацы институттæм. Уый тыххæй абитуриентты нæ хъæуы Цæгат Ирыстонмæ ацæуыны сæр, фæлварæнтæ ратдзысты нæхи ахуырады министрады.

Ацы аз квотæты нымæц фæкъаддæр, уымæн æмæ аивгъуыйгæ азты абитуриенттæй иуæй-иутæ куырдиæттæ уыцы-иу рæстæг балæвæрдтой цалдæр ахуыргæнæндонмæ. Кæй зæгъын æй хъæуы, студент æрвыст цыд æрмæстдæр иу ахуыргæнæндонмæ æмæ иннæ бынатæй та ныцыуал пайда уыд. Фарон цалдæр абитуриенты сæхи хъæппæрисæй, æнæ фæлварæнтæ ратгæйæ, бахаудысты Мæскуыйы паддзахадон университеты экономикон хайадмæ. Хъыгагæн, вæййы ахæм цаутæ дæр, Уæрæсейы уæлдæр ахуыргæнæндæттæм чи бацæуы, уы-дон ныууадзынц сæ ахуыр, кæннод та сæ æвзæр уагахасты тыххæй рацух кæнынц, æмæ æрыздæхынц фæстæмæ Хуссар Ирыстонмæ. Фæстæмæ цы студенттæ æрыздæхынц, уыдонимæ уагъд фæцæуы беседæтæ, фылдæр хатт сæхи аххос кæй вæййы, уый тыххæй.

Куыд зонæм, афтæмæй Уæрæсейы уæлдæр ахуыргæнæндæттæм ацæуыны фадат алкæмæн нæй. Бирæтæ ахуырмæ бацæуынц нæхи университетмæ, кæнæ та – Цхинвалы бирæпрофилон колледжмæ. Фæстаг рæстæджы уым чи ахуыр кæны, уыдон цайдагъ кæнынц ахæм популярон професситыл, куыд автомеханик, згъæрыл кусæг, хуыйæг, хæринагаразæг æмæ æндæр дæсныйæдтыл. Ныртæккæ нæ горæты ис æрмæстдæр иу автосервис, цыран цалцæг цæуынц фæсарæйнаг машинæтæ. Шофыртæн сæ фылдæр сæ фæсарæйнаг маркæйы машинæтæ аразынмæ фæкæнынц Цæгатмæ. Ныр нæхимæ дæр колледжы фæзынд, уыцы дæсныйадыл кæм ахуыр кæндзысты, ахæм факультет.

Ныййарджыты фылдæр хатт фæнды, цæмæй сæ сывæллон уа юрист кæнæ экономист. Афтæмæй не ‘хсæнад байдзаг, ацы профессийы дипломтæ кæмæ ис, уыдонæй. Хъуагдзинад та æййафæм бирæ професситæй. Уы-цы нымæцы, хъæууон хæдзарады чи хъæуы, ахæмтæй. Бирæпрофилон колледжы рауагъдон, кæннод хими, биологи, математикæ, ирон æвзаг æмæ историйы ахуыргæнæг тагъддæр ссардзæн куыст, престижон университеты рауагъдонимæ абаргæйæ.

Уазæгты Марфа