Нымад бонтӕ ма – ӕмӕ та ӕрбалӕудзӕн ног, 2018-19 ахуыры аз, скъолатӕй райхъуысдзӕн нӕ рӕзгӕ фӕлтӕры хъӕлдзӕг хъӕлӕба. Цхинвалы районы иумиагахуырадон скъолатӕ йыл куыд æмбæлынц, уый тыххӕй адӕмон ахуырады хайады сӕргълӕууӕг Лолоты Барис, афтæ зæгъы, зæгъгæ не скъолаты фылдӕр хай сты ногарӕзт, иннӕтӕ та капиталон цалцӕг ӕрцыдысты раздæр азты. Уымӕ гӕсгӕ цалцӕггӕнӕн куыстытӕ тынг нӕ хъӕуы.
Нӕ республикӕйы ӕндыгъд уавӕр куы уыд, уӕд бахъыгдард Дменисы астӕуккаг скъолайы ӕртыккаг уӕладзыг. Уый ӕмбӕлон уагмӕ ӕркӕныныл ныртӕккӕ кусы районы арӕзтадон-цалцӕггӕнӕн управлени. Ныхас йӕхимӕ айста скъолайы директор Дудайты Земӕ раппӕлыд, цалцӕггӕнӕн куыстыты хайад чи исы, уыцы бынӕттон кусджытӕ Джиголаты Хасан, Мераб æмæ Быценты Славикӕй. Йæ ныхæстæм гæсгæ скъола у ӕртӕуӕладзыгон, фӕлӕ дзы нӕ уыд, алыгъуызон мадзӕлттӕ кӕм уагътаиккам, ахӕм актон зал. Ӕххӕстӕй цалцӕггонд куы ‘рцӕуа, уӕд уым уыдзӕн фӕллойадон уроктӕ уадзӕн кабинет, библиотекӕ ӕмӕ компьютерон кабинет. Скъолайы нӕ уыд спортивон зал дӕр ӕмӕ уыцы фарст дӕр скъуыддзаг ӕрцӕудзӕн рӕхджы. Дудайты чызг бузныг зӕгъы Ахуырады министрадӕн, фӕллойадон уроктӕн сын дзӕвгар кусӕнгӕрзтӕ ӕмӕ ифтонггӕрзтӕ кӕй радтой, уый тыххӕй.
Дарддӕр Лолоты Барис куыд загъта, уымӕ гӕсгӕ цалцӕггӕнӕн куыстытӕ ӕххӕст кӕнынц Сатихъары астӕуккаг скъолайы дӕр. Раздӕр хъармгӕнӕн системӕйы ифтонгад ӕвӕрд уыд хӕрӕндоны ӕмӕ уый ӕвзӕрын кодта тасдзинад. Уавӕр бахынцыдæуыд, ӕмӕ ӕввахс рӕстӕджы уый æвæрд ӕрцӕудзӕн ӕндӕр бынаты. Лыггӕнинаг фарстатӕ ма ис Арцеу, Рустау ӕмӕ Зары хъӕууон скъолаты дӕр. Зары скъолайы бæстыхай рог цалцӕг ӕрцыд сӕхи тыхты руаджы.
Лолойы фырт катайгӕнгӕ дзырдта, ахуыргӕнинӕгты нымæц азӕй азмӕ кӕй къаддӕр кӕны, уый тыххӕй. Уымӕ гӕсгӕ ӕхгӕд ӕрцӕудзысты цалдӕр къласы. Чысыл у сӕ нымӕц, ацы аз фыццаг къласмӕ чи хъуамӕ бацӕуа, уыцы ахуыргӕнинӕгтæн дӕр, ӕдӕппӕт 17. «Ахуырады закъон»-ы раздӕр уыд ахӕм пункт, кӕцымӕ гӕсгӕ, цæмæй ахуыргӕнинаг кӕм цӕры, уыцы скъолайы ахуыр кӕна. Хъыгагӕн, уыцы пункт ист ӕрцыд ӕмӕ уый мӕгуырауӕрдӕм ӕндавы хъӕууон скъолатыл. Цӕвиттон, тынг хорз ахуыргӕнӕгыл нымад у Тъбеты скъолайы райдиан кълӕсты ахуыргæнæг Хъуылымбегты Евразия, фӕлӕ уӕддӕр ныййарджытӕ сӕ сабиты кӕнынц горӕтмæ.
Скъолатӕ кадртӕй сты ифтонг, ахуыргӕнджыты 98 проценты рацыдысты аттестаци ӕмӕ уый фӕстиуӕгӕн ноджы фӕбӕрзонддӕр сӕ квалификаци. Скъоладзауӕн ӕнӕ-мӕнгхъӕуӕг сты ахуыргӕнӕн чингуытӕ дӕр ӕмӕ уыдонӕй дӕр ӕххӕстӕй ифтонг ӕрцӕудзысты ӕввахс рӕстӕджы. Алы скъолайы дӕр ис хӕрӕндон ӕмӕ уымӕ гӕсгӕ ахуыргӕнинӕгтӕ нӕ фӕтыхсынц сихор бакӕныныл. Кӕй зӕгъын ӕй хъӕуы, хӕрӕндæттæ алцӕмӕй ифтонг нӕма сты ӕмӕ уымӕ гӕсгӕ ахызтысты, афтӕхуыйнӕг дыккаг аходӕнмӕ. Æххæст сихорӕй ма пайда кӕнынц ӕрмӕстдӕр, фӕ-даргъдӕргонд боны сахаттӕ цы скъолаты ис, уыдон ӕмӕ сывӕллӕтты рӕвдауӕндӕттӕ.
Хуыбиаты Никъала
Comments are closed, but trackbacks and pingbacks are open.