Хъæууон хæдзарады министрады специалисттæ кусынц, цæмæй нæ республикæйы арендатортæ цы тауинаг фæтауынц, уый дзуапп дæтта нормæтæн. Уый тыххæй та тауын хъæуы бынæттон тауинаг. Уæрæсейы Федерацийæ цы тауинæгтæ æрласæм, уыдонæн сæ 50% æлхæд цæуы æндæр паддзахадты æмæ уый зынаргъ вæййы, ацæуы сыл бирæ æхцайы фæрæзтæ, стæй хатт фæмæнг вæййынц.
Цæмæй нæхимæ ацы хъуыддаг райтынг уа æмæ арендатор дæр æмæ хъæууон цæрæг дæр тауинагмæ ма æнхъæлмæ кæсой, уый тыххæй хъæууонхæдзарадон зонæдты кандидат Уалыты Виктор афтæ радзырдта: «Хъуамæ нæхимæ арæзт æрцæуой селекцион тауинагкуыстгæнæг центртæ, цæмæй хорз мыггæгты тауинæгтæ цæттæ цæуой нæхимæ, Хуссар Ирыстон у хъæууонхæдзарадон регион. Зæххы гъæд нæм иттæг хæрзтæй нæу, фæлæ хорз климатон уавæртæ тынг хорз ахъаз кæнынц зайæгойтæн сæ тыллæгæрзад. Не ‘рдзон миниуджыты æууæлтæ нын хорз зонынц æндæр бæстæты специалисттæ æмæ нын стыр æхсызгонæй æлхæниккой нæ продукци».
Специалист ма нын куыд радзырдта, афтæмæй нæ горæты адæмæн сæ фылдæр хъæутæй фæлыгъдысты, зонынц кусын дæр, фæлæ техникæ кæй нæй, уымæ гæсгæ зивæг кæнынц хъæууонхæдзарадон куыстытæм.
«Мах иртасæн куыстыты руаджы раджы бафиппайдтам уый? æмæ Хуссар Ирыстоны зайæгойты тауинæгтæн сæ сæвзæрындзинад кæй у 15% æмæ сæ энергион рæзт та – 30 % фылдæр, Уæрæсейы регионты цы тауинæгтæ райсынц, уыдоны бæрæггæнæнтæм абаргæйæ. Ахæм зонæнтæ райстам садзинаг талабæлæстæ æмæ къутæр зайæгойтæн дæр, кæцытæн сæ уидæгтæ сты 30% фылдæр Уæрæсейы зайæгойтæм абаргæйæ. Уæдæ нæхи зæххыты ахæм стыр фæрæзтæй пайда кæнын хъæуы æви нæ? Уæрæсе йæхæдæг дæр фылдæр талатæ æндæр бæстæты æлхæны – Серби, Болгари æмæ æндæр рæтты. Цæмæннæ ис гæнæн æмæ талатæ бынæттон мыггæгтæй хъомыл кæнæм бынæтты», – дзырдта специалист.
Ахуыргонды хъуыдымæ гæсгæ ахæм куыст хъуамæ организаци æрцæуа тауинæгтæн дæр. Уый тыххæй та, зæгъгæ, хъæуы тауинагисæн æмæ цæттæгæнæн пункттæ аразын. Æнæмæнг хъуыддаг у машинæ æмæ тракторон станцтæ саразын алы районты дæр. Афтæ уыд советон рæстæджы æмæ уый тынг арæзта хъæууон цæрæджы къух. Специалист ма куыд амоны, афтæмæй цыдæриддæр раззагон паддзахадтæ ис – Англи, Норвеги, Швецари, Германи æмæ Китайы хъæууон хæдзарады тынг пайда кæнынц математикон æгъдауæй арæзт модултæй. Ахæм куыстытæ, дам, махмæ дæр ис саразæн.
«Бирæ амæлттыл ис æрдзурæн, цæмæй нæ агросæудæджерадон комплекс йæ къахыл слæууа, фæлæ уал райдайын хъæуы, абон нæ къухты цы æфты, уыдонæй, цæмæй Хуссар Ирыстоны цард азæй-азмæ хуыздæрæй-хуыздæр кæна», – зæгъы Уалыйы фырт.
УАЗÆГТЫ Марфа
Comments are closed, but trackbacks and pingbacks are open.