Цæмæй быдыртæ æфсæст уой донæй

Хъæууон фæллойгæнæгæн царды нуазыны дон куыд ахсджиаг у, афтæ йын у донхæры дон дæр. Донхæры дон хъæздыг тыллæг æркæныны сæйрагдæр уавæртæй иу кæй у, æдзухдæр кæй пайда кæнынц нæ, уый зæрдыл даргæйæ, паддзахадон унитарон куыстуат «Мелиораци»-йы разамынад (йæ хистæр  Хуыгаты Вадим) архайы, цæмæй æххæст цæуой хъæууон цæрджыты домæнтæ. Ныртæккæ  ацы куыстуаты кусджытæ пайда кæнынц кусы-нæн бæзгæ бонтæй æмæ архайынц сæ разылæууæг куыстытæ ахицæн кæныныл. Уыдон та, сæйраджыдæр сты къанаутæ рагацау ссыгъдæг æмæ сцалцæг кæнын. Хуыгайы фырт куыд банысан кодта, уымæ гæсгæ хорз бакуыстой Сацхнетæй суанг Присы хъæуы онг къанау æрбæстон кæныныл. Баззад ма сын хæрзцъус куыстытæ бакæнын, фæлæ сæ митуард бакъуылымпы кодта, куыддæр та хорз бонтæ ракæна, афтæ уыцы куыстытæ дæр ахицæн кæндзысты. Уый фæстæ æрæвналдзысты Къохаты хъæуы къанау сцалцæг кæнынмæ. Раст у, цæр-джытæй иуæй-иутæ къанаумæ хæстæг сарæзтой мæнгагъуыстытæ æмæ сæ хъыг дарынц, фæлæ ныфс бавæрдтой, кæй сæ сисдзысты, уымæй.  Техникæйы хъуагдзинад кæй æййафы «Мелиораци»-йы коллектив, уый тыххæй сын иу экскаватор рæстæгмæ авæрдта Цхинвалы районы сæргълæууæг Мамытаты Вахтанг æмæ йыл кусы Уазæгты Эдик.

  Леуахийæ Знауыры районы ‘рдæм цы къанау цæуы, уый фарон донхæры сезоны размæ Ачабеты хъæуы цур тынг бахъыгдард æмæ йæ æвæстиатæй хъуыд цалцæг кæнын. Йæ саразынæн сын нæ Хицауад рахицæн кодта 2 милуан сомы æмæ цыбыр рæстæгмæ арæзтадон-цалцæггæнæн куыстыты фæстиуæгæн къанауы дон рацыд рæстæгыл. Хъыгагæн, ахæм авари ацы къанауы хаххыл æрцыд ныр та Куртайы хъæуы сæрмæ æмæ бахъæудзæн уый дæр æвæстиатæй аиуварс кæнын.

 Уымæй дарддæр ма «Мелиораци»-йæн ивгъуыд аз баныхæстæ уыд Гуырдзыстоны се нгæс куыстуатимæ. Уыдон домдтой, цæмæй сын фæхай кодтаиккой, Арцеуы хъæуыл цы донхæры дон цæуы, уымæй, æрмæст æй хъуыд сыгъдæг кæнын. Сæхи рады уыдон та дон дæттаиккой Ленингоры районы Цъинагар æмæ Орчъосаны хъæутæм æмæ сæ дзырд нæ фæмæнг кодтой – донæй рауагътой Цъинагары хъæуы цæрджытæн. Махæрдыгæй ацы куыстытæ бакæнынæн хъæуы 5 милуан сомы æмæ уал сын Хицауад радих кодта 2 милуан сомы æмæ Арцеуы хъæуы къанауы арæзтадон-цалцæггæнæн куыстытæм бавналдзысты рæхджы.                                                             

Хуыбиаты Никъала