Ныр дыккаг хатт Дзæуджыхъæуы ацыд национ чиныджы армукъа-фестиваль «Бакæсæм иумæ». Арæзт æрцыд республикæйы Мыхуыры комитет æмæ рауагъдад «Ир»-ы хъæппæрисæй, программæ «Национально-культурное развитие Северной Осетии»-йы фæлгæтты, горæты рæсугъддæр бынаты, терчы был фæзы, фысымуат «Владикавказ»-ы раз.
Фестивалы архайдтой Хуссар Ирыстоны паддзахадон рауагъдад алыхуызон мидисджын чингуытимæ. Уыдон ма аивадуарзджыты размæ рахастой Бестауты Балайы æмæ Гæззаты Иваны хъæдæрмæгæй арæзт куыстытæ. Цæцæнæй æрбацыдысты чингуыты рауагъдад «Серло», Дагестанæй – «Эпоха», Кæсæгæй – Мария æмæ Виктор Котляровты рауагъдад. Цæгат Ирыстоны паддзахадон рауагъдад «Ир» равæрдта цалдæр алыхуызон тематикон секцийы фæстаг азты уагъд чингуытимæ. Мадзалы архайджытæ се ‘ргом фылдæр здæхтой «Алайнаг библиотекæйы» секцимæ. Уым уыдысты Аланийыл саргъуыды 1100 азы бæрæгбонмæ чингуыты сери фынддæс авторимæ æмæ уыцы темæйыл бирæ æндæр мидисджын æрмæджытæ. Республикæйæ ма дзы архайдтой хи сæрмагонд рауагъдадтæ «Харизма», «Перо и кист», «Национальное достояние», медиакъорд «Терские ведомости» æмæ æндæртæ. Уыдонимæ журналтæ «Мах дуг», «Ногдзау», «Хæххон дымгæ» æмæ «Дарьял»-ы равдыстытæ.
Бæрæгбон амыдта журнал «Ногдзау»-ы сæйраг редактор Сæлбиты Дианæ æмæ, фыццагдæр ныхасы бар радта Мыхуыры комитеты сæрдар Фидараты Юрийæн. Уый зæрдæбын арфæ ракодта уазджытæн, кæй нæ фæзивæг кодтой æмæ дард рæттæй ахæм кадджын мадзалы архайынмæ кæй æрцыдысты, уый тыххæй. «Ацы фæлтæрддзинад райстам дыууæ азы размæ Мæскуыйы. Уæд нæ фæхуыдтой чингуыты армукъа-фестивалмæ æмæ дзы баззадыстæм тынг разыйæ. Сфæнд кодтам ам дæр æй бафæлварын. Фыццаг хаттæй нын ныр дыккаг хатт рауад уæрæхдæр æмæ мидисджындæр. Сæйрагдæр, ахæм хъæугæ мадзалæн бындур æвæрд æрцыд æмæ йæ нæ зæрды ис æрвылаз дæр аразын», – загъта Фидары фырт.
Бæрæгбоны ахадындзинады тыххæй ма радзырдтой Национ политикæйы æмæ æддагон бастдзинæдты министр Бæгъиаты Алан, Дзæуджыхъæуы бынæттон администрацийы сæргълæууæджы хæдивæг Ходы Мæдинæ.
Сæ куысты æмæ дарддæры культурон бастдзинæдты тыххæй радзырдтой Цæцæны чингуыты рауагъдады директор Анзор Матаев, Дагестаны рауагъдады минæвар Хадижа Кулахова, Кæсæг-Балхъарæй Виктор Котляров. Уый радзырдта, кæй рауагътой, уыцы зындгонд чингуыты сери «Кавказ»-ы тыххæй. «Кавказ цымыдис кæны дунейы бирæ адæмты. Уый нымайгæйæ мах рауагътам уæрæх ассортимент. Серимæ бацыдысты Кавказы æппæт нациты царды уаг, архайд, истори, æгъдæуттæ, сæ менталитет… Уый тыххæй спайда кодтам бирæ историон документтæй. Сæ автортæ сты зындгонд политиктæ æмæ историктæ. Кавказыл фыст чингуыты сери мæ бон фидарæй банымайын у нæ рауагъдады стырдæр æнтыстыл».
Мадзалы организатортæ бацæттæ кодтой бæрæгбоны мидисджын программæ. Уазджытæй-иу алкæй раныхасы фæстæ дæр, зæрдæлхæнынæн, скъоладзаутæй исчи бакаст уыцы адæмыхатты фысджытæй искæй фыст æмдзæвгæ уырыссаг æвзагмæ тæлмацæй. Уымæй уæлдай дзы уыд мастер-класстæ фысджытимæ, рауагъдæтты презентацитæ, аивадон æмæ мультипликацион кинонывтæ, музыкалон æмæ театралон номыртæ, ирон сувенирты æмæ къамты равдыст, рагон ирон царды инсценировкæтæ, викторинæтæ зынаргъ призтимæ… Дыууæ кæнæ фылдæр чиныг чи балхæдтаид, уыдонæн лæвæрд цыд лоторейон билеттæ сувениртæ рамбулынæн, кæнæ газеттæ æмæ журналтæ рафыссынæн.
Бæрæгбон рауад тынг мидисджын. Ахаста æнæхъæн бон æмæ суанг изæрмæ адæмæй нæ фæцух. Адæм æлхæдтой чингуытæ, лæвар кодтой æндæртæн, рафыссæн дзы уыдис журналтæ æмæ газеттæ дæр. Æмæ та нæ ныфс бацыд: бынтон нæма фесæфт мыхуыры кад. Йæ зæрдæ йыл чи нæ сивта, уыдон нырмæ бирæ сты. Æмæ уый æхсызгон у, разæнгард кæны адæймаджы сфæлдыстадон куыстмæ…
Джусойты Нинæ
Comments are closed, but trackbacks and pingbacks are open.