Бюджетон ивындзинæдтæ, кадртæ цæттæ кæнын

Республикæ Хуссар Ирыстоны Хицауады Сæрдар Пухаты Эрик ауагъта Хицауады рабадт, цыран æруынаффæ кодтой УФ-йы æмæ Хуссар Ирыстоны ‘хсæн социалон-экономикон æмгуыстады фæдыл Æхсæнхицауадон къамисы рабадтмæ хауæг фарстатыл.

РХИ-йы финансты министр Хæбæлаты Азæ уынаффæ кæнынмæ рахаста «2019 азы Республикæ Хуссар Ирыстоны паддзахадон бюджеты тыххæй» РХИ-йы закъонмæ ивындзинæдтæ бахæссыны тыххæй, кæцытæ баст сты Æхсæнхицауадон къамисы æмсæрдæртты уынаффæ дзы равдисыны æнæмæнгхъæуындзинад паддзахадон æмæ муниципалон службæгæнджытæн сæ куыстмыздтæ фæфылдæр кæныны, мидхъуыддæгты органты кусджыты материалон æмæ æхцайон ифтонгад æмæ Информацион-координацион центры Уæрæсейы фæрæзтæй æмфинанскæнынады фæдыл.

Хицауады уæнгтæ æмхъæлæсæй сразы сты «Республикæ Хуссар Ирыстоны кадрты резерв цæттæ кæнын æмæ ногæй бацæттæ кæныны тыххæй (2019-2022 азтæ)» Паддзахадон комплексон нысанон программæмæ бахæсгæ ивындзинæдтыл.

Хицауады Аппараты къухдариуæггæнæг Гаглойты Олег куыд банысан кодта, афтæмæй бавдыст ивындзинæдтæ фадат дæттынц программæйы хайадисджыты сахуыр кæныны фæдыл финанстæ рахицæн кæнынимæ баст мадзæлттæ гъæдджындæрæй æххæст кæнынæн.

Уымæй уæлдай ма, рабадты уынаффæ кодтой зæрæдты æмæ инвалидты панисионат «Аудындзинад» -ы ном «Медико-социалон центр»-мæ раивыныл.

РХИ-йы æнæниздзинад хъахъхъæнын æмæ социалон рæзты министр Тотчиты Георгийы ныхæстæм гæсгæ пансионат «Аудын-дзинад»-ы пациенттæ ног агъуыстмæ æрвыст æрцыдысты, цыран сын цæрынæн ис хæрзвадат уавæртæ. Ног медико-социалон центры офи-циалон байгом уыдзæн апрелы фæстаг къуырийы.

Уый ма куыд банысан кодта, афтæмæй уагдонæн йæ ном раивыны фæстæ зæрæдтæ æмæ инва-лидтæн социалон лæггæтты гуырахст фæуæрæхдæр уыдзæн.

Хицауады уæнгтæ ма æруынаффæ кодтой хъæууон хæдзарадæн зианхæссæг морæхуыз джыбыйы ныхмæ тохы фæдыл.

Рабадты рæстæджы Пухаты Эрик горæт Цхинвалы администрацийы къухдариуæгады хъусдард аздæхта, арæзтады рæстæджы цы брæттæ æрæмбырд вæййынц, уыдон ласыны фарсты фæтк æрæвæрыны æнæмæнгхъæуындзинадмæ.

«Курæг дæн горæты мидхъуыддæгты органтæ, столицæйы администраци, афтæ ма телеуынынадæй дæр, цæмæй рейдтæ аразой æмæ æвдисой, йæ фæстæ брæттæ чи не ‘фснайы, уыдоны, уыцы нымæцы арæзтадон брæттæ дæр», – банысан кодта Хицауады Сæрдар.