РХИ-йы Хицауады Сæрдар Пухаты Эрикы сæрдариуæгадæй уагъд æрцыд Хицауады рабадт. Боны фæткмæ цы бирæ фарстатæ хаст æрцыдысты, уыдон, сæйраджыдæр, хаудысты æххæсткæнынадон кондад, бюджетон хыгъддæттынад, инвестицион фадæттæ æмæ æнæниздзинад хъахъхъæныны организаци хуыздæр кæнынмæ.
Финансты министр Хæбæлаты Азæ рабадты хайадисджыты размæ уынаффæ кæнынмæ рахаста «Бюджетон арæзты æмæ бюджетон процессы тыххæй» РХИ-йы Закъонмæ ивындзинæдтæ бахæссыны тыххæй» закъоны проект. Ивындзинæдтæ здæхт сты паддзахадон фæрæзтæ хардз кæныны æргомдзинады проблемæ скъуыддзаг кæнынмæ.
Йæ ныхæстæм гæсгæ министрады фæлгæтты ныридæгæн кусы специалистты къорд, кæцы финансон контроль æххæст кæны, фæрæзтæ паддзахадон организациты куыд хардз цæуынц, ууыл. Æмæ, зæгъгæ, закъоны ивындзинæдтæ бæлвырд кæнынц контролы методтæ æмæ объектты дæр, ома нæ куыстæн арæзт цæуы барадон базæ. «Закъоны проекты иунæг нысан у, – банысан кодта Хæбæлаты Азæ, – æхсæнтведомствæйон хыгъддæттынады процесс уæрæсейаг бюджетон кодексмæ гæсгæ рацаразын, цæмæй æппæт æмвæзадты дæр, уæлдайдæр та райдиан хыгъддæттынады, бухгалтерон документаци аразыны ма æруагъдæуа рæдыдтытæ».
Хицауады Сæрдар ам бафиппайдта, зæгъгæ, къухдариуæггæнджытæ бынæтты хъуамæ æнгом архайд кæной бухгалтертимæ. Æмæ, зæгъгæ, бухгалтерон хыгъддæттынады гуымир цухдзинæдтæ куы разына, уæд къухдариуæггæнджытæ, гæнæн ис баййафой æфхæрд, суанг сæ куыстæй ссæрибар кæныны онг. Уымæн æмæ уыдон персоналон бæрндзинад хæссынц организацийы архайды æппæт здæхтыты тыххæй, уыцы нымæцы финансон документаци аразыны тыххæй дæр.
«Инвестицион архайды тыххæй» закъоны проекты фæдыл та йæ хъуыдытæ загъта экономикон рæзты министр Кокойты Геннади. Уый куыд банысан кодта, афтæмæй закъоны ног редакци фадат ратдзæн инвестицион къабазы ног, бæрзонддæр æмвæзадмæ ракæнынæн. Йæ ныхæстæм гæсгæ закъон хъахъхъæны инвестицион архайд республикæйы æмæ иумæйагæй сисгæйæ, здæхт у капиталтæ республикæмæ æрбакæнынмæ, республикæйы инвестицион климат рæзын кæнынмæ.
Хицауады уæнгтæ хорзыл банымадтой льготон кредиткæнынадæн ахъаз кæныны фонд саразын дæр. Уый арæзт цæудзæн паддзахадон бюджетон фæрæзтæй. Фидар æрцыд йе сконд дæр. Йæ æххæстгæнæг директорæй та сæвзæрстой экономикон рæзты министрады социалон-экономикон планкæнынад æмæ прогноз кæныны управленийы хистæр Бибылты Ноннæйы. Кокойты Геннадийы ныхæстæм гæсгæ уымæн мызд фыст нæ цæудзæн, æххæстгæнæг директоры хæстæ йыл æвæрд æрцы-дысты, куыд министрады профилон специалист, афтæ.
Хицауады уæнгтæ ма хорзыл банымадтой «Æххæсткæнынадон кондады тыххæй 2008 азы райсгæ РХИ-йы закъонмæ ивындзинæдтæ бахæссыны тыххæй» закъоны проект æмæ «Тæрхондонон приставты тыххæй 2010 азы 2 июны райсгæ Республикæ Хуссар Ирыстоны Закъон. Æруынаффæ сыл кæнынмæ сæ бавдыста юстицийы министр Лалыты Залинæ.
Министр куыд банысан кодта, афтæмæй ивындзинæдтæ ахъаз кæнынц куысты электронон методтæм рахизынæн æмæ здæхт сты æрвылбонон практикон архайды рæстæджы тæрхондонон приставты архайдтытæ бæстон кæнынмæ.
«Цæмæй æххæстæй ифтонг цæуой æмбæстæгты бартæ æмæ гъæдджынæй æххæст цæуой тæрхондоны уынаффæтæ, уый тыххæй приставтæ æмбæстæгтимæ æмархайды рæстæджы хъуамæ пайда кæной видео æмæ фотонывтæй», – бамбарын кодта Лалыты чызг.
Хицауады рабадты ма йæ хайадисджытæ æруынаффæ кодтой æмæ райстой æнæниздзинад хъахъхъæныны къабазмæ хауæг къорд закъоны проекты, афтæ ма разамынады системæйы оптимизацимæ æмæ хицæн паддзахадон бюджетон уагдæтты организацимæ здæхт чи сты, ахæмтæ.
Рабадты æркастысты организацион фарстмæ дæр. йæ бынатæй ист æрцыд Цхинвалы районы администрацийы сæргълæууæджы хæдивæг Дудайты Иртох, æндæр куыстмæ йæ кæй акодтой, уымæ гæсгæ. Уый тыххæй рабадты фехъусын кодта Цхинвалы районы администрацийы сæргълæууæджы хæстæ æххæстгæнæг Бибылты Валери.
Бестауты Валя
Comments are closed, but trackbacks and pingbacks are open.