Централон æвзарæн къамис активон куыст кæны

Ныртæккæ нæ республикæйы политикон царды ахсджиаг бынат ис æвдæм сæвзæрст Парламентмæ депутатты æвзæрстытæм цæттæгæнæн куыстæн. Æвзæрстытæ, куыд зонæм, афтæмæй уагъд цæудзысты мажоритарон – пропорционалон системæмæ гæсгæ: 17 депутаты æвзæрст æрцæудзысты партион номхыгъдтæм гæсгæ æмæ 17 та иумандатон æвзарæн округтæй.

Парламентон æвзæрстыты агъоммæ Республикæ Хуссар Ирыстоны Централон æвзарæн къамис дарддæр кусы партитæ æмæ иумандатон æвзарæн округтæй йæхи чи размæ кæны, уыдон документтæ исыныл. Абоны онг уал æвзарæн къамисмæ йæ докуметтæ бавдыста иу политикон парти «Иугонд Ирыстон» æмæ аст кандидаты та иумандатон æвзарæн округтæй. Закъонмæ гæсгæ, документтæ бавдисынæй авд боны æмгъуыдмæ Централон æвзарæн къамис хъуамæ æркæса уыдонмæ. 

Централон æвзарæн къамисы сæрдар Плиты Беллæ нын куыд загъта, афтæмæй ныртæккæ куыст цæуы документты æххæст пакет исыныл.

«Документтæ бæрæг кæныны рæстæджы мах хатæм алкæцы уагдонмæ дæр, кæцытæ   хъæуынц уыцы документтæ бæлвырд кæныны рæстæджы. Уыцы хъуыддаг хауы иумандатонтæм дæр. Уый фæстæ сын бар лæвæрд цæуы сæрмагонд хыгъд бакæнынæн, æмæ дарддæр та – къухфыстытæ æмбырд кæнынæн. Кæй зæгъын æй хъæуы, уыцы куыст дарддæр дæр цæудзæн».

Хуссар Ирыстоны Парламентмæ депутатты æвзæрстыты тыххæй закъонмæ гæсгæ, ныртæккæ парламенты цы политикон партитæ ис, уыдоны нæ хъæуы къухфыстытæ æмбырд кæнын.

«Ацы закъондæттынадон нормæмæ нæ хауынц æнæпарламентон партитæ. Уыдон сæ документты пакетимæ иумæ хъуамæ æрæмбырд кæной фæйнæ 1500 къухфысты. Æмæ æрмæстдæр документтæм æркæсын æмæ къухфыстытæ сбæрæг кæныны фæстæ, партитæ регистраци цæуынц Централон æвзарæн къамисы. Уый фæстæ сын бар ис агитацион куыст райдайынæн. Ацы закъондæттынадон нормæтæ хауынц иумандатон æвзарæн округтæй чи цæуы, уыдонмæ дæр. Уыдон сæ æвзарæн округты æвзарджыты нымæцæй 10 проценты хъуамæ æрæмбырд кæной къухфыстытæ», – банысан кодта Плиты Беллæ.

Уый ма куыд загъта, афтæмæй Централон æвзарæн къамис сфидар кодта æвзарæн фадгуыты схемæ æмæ дарддæр хъуамæ саразой 17 æвзарæн къамисы. Политикон партитæ æмæ æвзарджыты инициативон къордтæ 12 апрелмæ хъуамæ бахæссой сæ кандидатурæтæ, цæмæй хаст æрцæуой округон æвзарæн къамисы скондмæ.

Централон æвзарæн къамисы сæргълæууæг ма йæ хъус æрдардта хи хъæппæрисæй раразмæгонд кандидатты цы документты пакет æрæмбырд кæнын хъæуы, уымæ дæр. Уый куыд радзырдта, уымæ гæсгæ уыцы хъуыддаджы вазыгджынæй ницы ис – хъæуы сæ депутаттæм æвзæрстыты закъонмæ гæсгæ æрæмбырд кæнын сæ документтæ. Уыцы закъон мыхуыр æрцыд информацион фæрæзты.

«Документты æппæт хъæуæг формæтæ хъуамæ æххæст æрцæуой –  уырдæм хауынц куыд йæ исад, афтæ йæ æфтиæгтæ дæр. Мæнмæ гæсгæ æцæг зæрдæйæ чи цæуы парламентмæ кусынмæ, йæ адæмæн лæггад кæнынмæ, уымæн ацы документтæ æрæмбырд кæныны хъуыддаджы цæлхдуртæ ма хъуамæ уа», – загъта æвзарæн къамисы сæрдар.

Æвзарæн къамис, политикон партитæ æмæ иумандатон æвзарæн зылдтæй кандидаттæй документтæ исдзæн 24 апрелмæ. Æхсæзæм сæвзæрст Парламенты цы партитæ нæ архайы, уыдон æмæ иумандатон æвзарæн зылдтæй  кандидаттæн  ис  рæстæг 4 маймæ, цæмæй къухфыстытæ æмæ хъæуæг документтæ æрæмбырд кæной.  

Централон æвзарæн къамисы кусджытæ канд документтæ райсыныл нæ кусынц, фæлæ ма хъуамæ райсой кандидаттæй куырдиæттæ, цыран кандидат фидар кæны парламентон æвзæрстыты хайад райсынмæ йæ цæттæдзинад.

Нæ уацх.