Хицауады Сæрдар Пухаты Эрикы къухдариуæгадæй уагъд æрцыд рабадт, цыран æруынаффæ кодтой 2019 азы фыццаг æмбисы паддзахадон бюджет æмæ 2018 азы республикæйы Пенсион фонды æххæст кæныны фæдыл.
Финансты министр Хæбæлаты Азæйы докладмæ гæсгæ, æхсæз мæйы дæргъы пад-дзахадон бюджет æххæст кæныны фæдыл æфтиаг уыд 3473452,03 мин сомы, хæрдзты фæдыл – 3575824,36 мин сомы. Хæрдзтæ фæфылдæр сты æфтиагон хайæ 102372,33 мин сомы. Хъалонон фиддонтæ æххæст æрцыдысты 43,6 процентæй, æнæхъалононтæ та – 42 процентæй.
Республикæйы Пенсион фонды къухдариуæггæнæг Тасойты Азæ банысан кодта, зæгъгæ, фонды æфтиæгтæ иууыл иумæ сты 327372,0 мин сомы, кассон бацыдтытæ – 361901,5 мин сомы.
Дыууæ закъоны проект ист æрцыдысты æмхъæлæсæй.
«Æнæмæнгхъæуæг пенсион фæдзæхстады системæйы индивидуалон (персонификацион), хыгъды тыххæй». Закъоны проектыл лæмбынæг æруынаффæ кæныны фæстæ йæ Хицауады уæнгтæ йæ хорзыл банымадтой. Уым нысан æрцыд пенсион фадыджы æппæт операцитæ автоматизацигонд системæмæ ракæнын.
«Закъон райсын æмæнгхъæуæг у алы регистрацигонд адæймаджы тыххæй бæлвырдгæнæнты хыгъд аразын æмæ йæ пенсион бартæй закъондæттынадмæ гæсгæ реализаци кæнын», – банысан кодта Тасойты Азæ.
Рабадты рæстæджы сфидар кодтой газæй пайда кæныны æмæ газифтонгады лæггæдтæй сифтонг кæныны фæткойтæ, афтæ ма паддзахадон арæзтадон цæстдард æххæст кæныны тыххæй уагæвæрд, кæцы бæрæг кæндзæн цæстдарæн мадзæлттæ æххæст кыныны рæстæджы басгæрсты фæтк.
Паддзахадон ветеринарон æмæ фитосанитарон службæ «Югоссельхознадзор»-ы кусджыты штатон нымæцæй арæзт æрцыд паддзахадон бюджетон уагдон «Цхинвалы районы цæрæгойты низтимæ тох кæныны станц».
«Югоссельхознадзор»-ы къухдариуæггæнæг Мæргъиты Алан куыд банысан кодта, афтæмæй Паддзахадон унитарон куыстуат саразыны æнæмæнгхъæуындзинад уыд республикæйы территорийыл ветеринарийы фадыджы цы закъондæттынад архайы, уыцы домæнтæм паддзахадон уагдоны архайд æркæнын».
Рабадты рæстæджы æххæст æрцыд кадртæ нысан кæнын. Фæдзæхстады арæнгонд бæрндзинады æхсæнад «Алани»-йы генералон директоры бынатмæ нысан æрцыд Тедеты Рудольф Отары фырт.
Хицауады аппараты къухдариуæггæнæг Гаглойты Олег куыд банысан кодта, афтæмæй арæнгонд бæрндзинады æхсæнад «Алани»-йы къухдариуæггæнæджы вакантон бынатмæ конкурсы хайад райстой авд адæймаджы. Уыдонимæ ныхас кæныны рæстæджы къамис равзæрста Тедеты Рудольфы кандидатурæ, кæцыйæн фæдзæхстады фадыджы ис стыр фæлтæрддзинад.
«Уый хорз зонгæ у спецификæимæ, уымæн æмæ бирæ азты дæргъы куыста ацы фадыджы Уæрæсейы территорийыл, уыцы нымæцы – къухдариуæггæнæгæй», – загъта Гаглойы фырт æмæ зæрдыл æрлæууын кодта, 2006 азы паддзахадон фæдзæхстадон компани «Алани» арæзт кæй æрцыд арæнгонд бæрндзинады æхсæнадмæ паддзахады сæдæ процентон хайдадистимæ.
«Хъыгагæн, уæд процесс кæронмæ æххæст не ‘рцыд. Фарон генералон прокуратурæ уагъта егъау куыст, цæмæй компанийы архайд закъонон бынатмæ æрцæуа», – загъта Гаглойты Олег.
Пухаты Эрик банысан кодта, цæрджыты кæй хъæуы фæдзæхстадон лæггæдтæ æмæ ныфс бавæрдта, Тедеты Рудольф йæ разылæууæг хæстыл кæй фæтых уыдзæн.
Рабадты рæстæджы ма æрныхас кодтой электроэнерги æмæ газæй пайда кæныны фиддонтæ бафидыны тыххæй. Сæудæджерад, транспорт æмæ энергетикæйы фæдыл комитеты сæрдар Санахъоты Батрадз банысан кодта, зæгъгæ, æмбырдтæ сты 65 проценты. Фиддонтæ чи нæ бафыста, уыдон нымæцы æрмæст республикæйы цæрджытæ не сты, фæлæ ма паддзахадон организацитæ дæр.
Хицауады Сæрдар банысан кодта, зæгъгæ, нал хъæуы хæстæ æруадзын, æнæуый дæр Хуссар Ирыстонæн электроэнерги æмæ газы иумæйаг хæс у фондз сæдæ милуан сомы онг.
Пухаты Эрик организацитæ-хæсджынты къухдариуæггæнджытæй æрдомдта тагъд рæстæджы сæ фиддонтæ бафидын æмæ сæ Хицауадмæ æрбавдисын.
РХИ-йы Хицауады
пресс-службæ
Comments are closed, but trackbacks and pingbacks are open.