Дыццæджы Мидхъуыддæгты министры хæстæ æххæстгæнæг Пухаты Мераб ауагъта æрвылкъуырион оперативон рабадт ведомствойы къухдариуæггæнæг скондимæ. Хайад дзы райстой министры хæдивджытæ, мидхъуыддæгты горæты æмæ районты управлениты хистæртæ, службæты æмæ дæлхæйтты къухдариуæггæнджытæ.
Рабадты рæстæджы бæлвырд æрцыдысты ведомствойы фыццаградон хæстæ, оперативон-службæйон архайд куыд хъуамæ цæуа дарддæр æмæ ма цахæм мадзæлттæ хъæуы райсын коронавирусы низы ныхмæ, æппæт уыдæттæ. Пухаты Мераб медикон-санитарон хайады кусджытæн бахæс кодта, цæмæй æппынæдзух сæ хъус дарой ведомствойы кусджытæм, дезинфекцигæнæн донгъæдтæй сæ ифтонг кæной æмæ контроль кæной зæрдæхсайгæ рынчынты.
«Ныридæгæн нæ ведомствæйы рæнхъон сконды дæр рабæрæг ис коронавирусæй рынчынтæ æмæ райсын хъæуы æппæт мадзæлттæ дæр, цæмæй æгæр тынг ма апарахат уа низ æмæ нæ куыст ма фæцуда, цы хæстæ ныл ис æвæрд, уыдон сæххæст кæнын нæ бон уа. Кæд искæцы кусæгæн коронавирусы симптомтæ ис, кæнæ йæ бинонтæй исчи фæрынчын ис, уæд куыстмæ мауал хъуамæ рацæуа, фæлæ фæдзура медикон-санитарон хайадмæ, æмæ йын уыдон куыд зæгъой, афтæ бакæна. Ацы æндыгъд уавæры нæ бацархайын хъæуы, цæмæй сабырад æмæ æхсæнадон фæтк хъахъхъæд æрцæуой», – банысан кодта ведомстойы сæргълæууæг.
Рæстæгмæдарæн изоляторы дæр эпидемийы фæстиуæгæн æххæст цæуынц санитарон домæнтæ, – æрвылбон дæр дезинфекци кæнынц камерæтæ æмæ æндæр кусæгон бынæттæ, æмæ ма куыд кусджытæн, афтæ ахст адæмæн дæр барынц сæ тæвд. Искæмæ дзы кæд симптомтæ вæййы, уæд ын бакæнынц æмбæлон æххуыс æмæ райсынц æппæт мадзæлттæ дæр, цæмæй йын мауал уа контакт иннæтимæ. уымæй уæлдай ма милицийы кусджытæ сæ службæйон хæстæ æххæст кæнгæйæ пайда кæнынц маскæтæ æмæ æндæр индивидуалон хъахъхъæнæн дзаумæттæй, гæнæн уæвгæйæ сæхи хизынц адæмимæ контакттæй.
Мидхъуыддæгты министрады сæргълæууæг ма бахæс кодта милицийы фæдагуырды хайады кусджытæн, цæмæй ноджы бæстондæрæй ауадзой оперативон-сгарæн куыстытæ раздæры æрцæугæ фыдракæндты фæдыл.
ДЖИОТЫ Александр
Comments are closed, but trackbacks and pingbacks are open.