Бибылты Анатоли хайад райста мемориал байгом кæныны церемонийы

Республикæ Хуссар Ирыстоны Президент Бибылты Анатоли хайад райста мемориал байгом кæныны церемонийы, кæцы арæзт æрцыд, Цæгат Ирыстоны мидхъуыддæгты органты кусджытæй йе службæйон хæс æххæст кæныны рæстæджы чи фæмард, уыдоны ном арынæн .

Мемориал байгом кæныны цытджын церемонийы ма хайад райстой РЦИ-Аланийы Сæргълæууæг Битарты Вячеслав, цæгатирыстойнаг парламенты спикер Алексей Мачнев, Цæгат Кавказы мидхъуыддæгты министр Михаил Скоков, Хуссар Ирыстоны мидхъуыддæгты министр Наниты Игорь, хъахъхъæнынад æмæ æдасдзинады фæдыл УФ-йы Федерацийы Советы комитеты уæнг Франц Клинцевич æмæ æндæр официалон адæймæгтæ.

Хуссар Ирыстоны Президент йæ раныхасы куыд банысан кодта, афтæмæй ахæм мадзæлтты фæрцы патриотизмы æн-къарæнтыл хъомыл цæуы æвзонг фæлтæр, адæмæн æмæ райгуырæн бæстæйæн лæггад кæныны ахсджиагдзинад æмбаргæйæ.

«Ацы мемориал байгом кæнын у РЦИ-Аланийы мидхъуыддæгты органты кусджыты мысынæн. Æз афтæ нымайын æмæ ахæм мадзæлттæ сты ахсджиаг, уымæн æмæ уыдоны фæрцы мах æвзонг фæлтæры хъомыл кæнæм патриотизмы æнкъарæнтыл, Райгуырæн зæхмæ уарзондзинадыл, сæйраджыдæр та, цæмæй уыдон æмбарой, цы у полицийы рæнхъыты службæ кæнын, адæмы æмæ Уæрæсейы паддзахады хæрзиуæгæн службæ кæнын», – загъта Бибылты Анатоли.

Битарты Вячеслав йæ рады банысан кодта, мемориал æрмæст фæмардуæвæг хъайтарты мысынæн кæй нæ уыдзæн, фæлæ сын мыггагмæ сæнусон кæндзæн се сгуыхтдзинад, кæцыйы арæзтой райгуырæн республикæйы сабырады, амонды æмæ фæрныгады сæраппонд.

«Ардæм æнæмæнгдæр цæудзысты мидхъуыддæгты органты фæмардуæвджыты кусджыты æмзæххонтæ. Уыдон сæ цард нывонд кæнгæйæ, бахъахъхъæдтой Ирыстоны, æппæт Уæрæсейы абоны бон æмæ фидæн. Полицийы службæ кæнын  зын кæй  у, уый зонынц, мидхъуыддæгты органтæм кусынмæ цы æвзонг лæппутæ æрбацæуынц, уыдон иууылдæр. Чи фæмард, уыдонæн мах абон ноджы зæгъдзыстæм: «Бузныг службæйы тыххæй», се ‘ввахс хиуæттæн зæгъæм мæсæллæйы ныхæстæ, уыдоны сгуыхтдзинад æнустæм баззайдзæн Ирыстоны адæмы зæрдæты»,  – банысан кодта Битары фырт.

Мемориалы реконструкцийы хайад райстой Цæгат Ирыстоны хуыздæр архитектортæ æмæ скульптортæ, стеллæйæн йæ бæрзæнд у 5 метрæй фылдæр, кæцы у мидхъуыддæгты органты кусджыты сгуыхтдзинæдты кады æмæ бузныджы символ, кæцытæ сæ цард снывонд кодтой се ‘мбæстæгты сабырад æмæ æдасдзинады сæраппонд. Ам ис æхсæз тырысайы, гъæдджын бронзæйæ арæзт барельефтæ, кæцыты зыны уæрæсейаг полицийы æртæсæдæазон истори – йæ сырæзтæй фæстæмæ абоны боны онг. Зонгуытыл- лæуд бронзæйон фигурæтæ æвдисынц Фыдыбæстæйæн лæггад кæнын æмæ традицитæ дарддæр кæнын.

Композицийы иууыл сæйрагдæр элемент ссис мысæн арт, кæцыйы ссыгъдæуыд Æнусон артæй.

Комплексы галиу хайы сарæзтой гранитæй арæзт постамент, кæцыйыл фыст сты Цæгат Ирыстоны барадхъахъхъæнæг органты кусджытæй 204 фæмардуæвæджы нæмттæ æмæ мыггæгтæ.

Мемориал байгом кæныны церемонийы рæстæджы ма æвæрд æрцыд  капсулæ ныстуанимæ, кæцы 25 азы фæстæ, Цæгат Ирыстон фашистон оккупацийæ ссæрибар кæныны бон куы нысан кæна, уæд æй бакæсдзысты милицийы фидæны кусджытæ.