Бибылты Анатоли хайад райста мемориалон комплекс байгом кæныны

РХИ-йы Президент Бибылты Анатоли хайад райста сноггонд æфсæддон-мемориалон комплекс «Барбашово поле»-йы цытджын æгъдауæй байгом кæныны церемонийы. Мемориалон комплекс ис Цæгат Ирыстон-Аланийы Джызæлы хъæумæ æввахс, Дзæуджыхъæумæ бацæуæнты тугкалæн тохты бынаты, кæцытæй райдыдта Цæгат Кавказы Сырх Æфсады контрабырст.

Номхуындæй, ам 1942 азы  9-æм ноябры сарæзта йæ æнæмæлгæ сгуыхтдзинад æвзонг салдат Петр Барбашов, йæ буарæй знаджы дзоты амбразурæ сæхгæнгæйæ æмæ афтæмæй мæлæтæй бахъахъхъæдта дæсгай æмбæлтты цард. Советон Цæдисы Хъайтары стыр цырт æмæ Кавказы сæрыл тохты сæдæгай фæмардуæвæг салдатты æфсымæрон ингæн бирæ азты дæргъы сты мысæн, хъынцъымы æмæ советон салдаты сгуыхтдзинадæн кувæн бынат.

Æрæмбырдуæвджыты раз ныхас кæнгæйæ, хуссарирыстойнаг паддзахады сæргълæууæг банысан кодта, зæгъгæ, 9-æм май æрмæст бæрæгбон нæу, уый у хъайтарон советон адæмы хъайтарон бæрæгбон.

«Æмæ Советон Цæдисы, Уæрæсейы Федерацийы, Республикæ Хуссар Ирыстоны, æндæр бæстæты æмæ паддзахадты чи райгуырд, уыцы адæмæй алкæйы хæс дæр у, фæлтæрæй фæлтæрмæ уыцы традицитæ дæттын, кæцыты нын  ныууагътой нæ фыдæлтæ. Уадз, рæзгæ фæлтæр зоной, советон адæм цы стыр аргъ бафыстой, цæмæй абон мах цæрæм сабыр цардæй», – загъта уый.

Цæгат Ирыстоны цæрджытæн ацы нысаниуæгджын цауы тыххæй раарфæ кодта Цæгат Кавказы федералон зылды Уæрæсейы Федерацийы Президенты æххæстбарджын минæвар Олег Белавенцев. «Абон, Уæлахизы боны бæрæгбоны размæ, ацы тугæйахуырст зæххыл гом арвы бын байгом  диссаджы музей. Уый нæ сывæллæтты, нæ сывæллæтты сывæллæтты зæрдыл æнустæм лæууын кæндзæн уыцы стыр аргъы тыххæй, кæцы бафыстой советон адæм йæ сæрибардзинад, хæдбардзинад, нæ абоны æмæ фидæны тыххæй. Ацы быдыр ссис фæстаг зæххы гæппæл, кæцыйæн  цы фæнды аргъæй дæр нæ уыд знагæн радтæн. Кæстæр сержант Петр Барбашов, ацы зæхх  хъахъхъæнгæйæ, нæ бавгъау кодта, иууыл зынаргъдæр ын цы уыд, уый – йæ цард, цæмæй йе ‘мбæлттимæ сæххæст кодтаид ахсджиаг хæстон хæс æмæ Александр Матросовы размæ сарæзта ахæм сгуыхтдзинад, кæцы йын сæнусон кодта йæ ном», – банысан кодта уый.

Цæгат Ирыстон-Аланийы Сæргълæууæг Битарты Вячеслав ноджыдæр зæрдыл æрлæууын кодта Стыр Фыдыбæстæйон хæсты фæдыл мысынад бахъахъхъæныны ахсджиагдзинады тыххæй: «Уадз, макуы ферох  уæд адæмæй мемориалмæ  фæндаг. Абоны бон æвдисæн у, нæ амонды тыххæй сæ цард нывондæн чи æрхастой, уыдон адæмæй рох кæй никуы уыдзысты, уымæн».

Уæ зæрдыл уын лæууын кæнæм, иу азы размæ Советон Цæдисы Хъайтар Петр Барбашовы æнæмæлгæ сгуыхтдзинады мысæн мемориалон комплексы кæй байгом Сырх Æфсады Хæстоны мемориал, кæцыйыл сыгъзæрин дамгъæтæй фыст æрцыдысты,  ацы бæрзæнды сæ сæртæ нывондæн чи æрхастой, уыцы 312 хæстонты нæмттæ. Дзæуджыхъæуы хъахъхъæнджытæй æфсымæрон ингæны ныгæд чи æрцыд æмæ кæй нæмттæ ферох сты, уыдон зындгонд æрцыдысты агурæг къорд «Долг и честь»-ы дæргъвæтин æмæ æвæллайгæ куысты руаджы.

РХИ-йы Президенты

официалон сайт