14 февралы Гæззаты Вадимы номыл Милицийы сæрмагонд нысаниуæджы къорды сырæзтыл 27 аз кæй сæххæст, уый фæдыл уагъд æрцыд кадджын мадзал. Ардæм фæуазæг сты бæстæйы Президент Бибылты Анатоли, Хицауады Сæрдар Пухаты Эрик, Мидхъуыддæгты министрады къухдариуæгад Наниты Игоры сæргълæудæй, хицауады уæнгтæ, депутаттæ æмæ æндæр бæрнон кусджытæ.
Наниты Игорь йæ раныхасы зæрдиаг арфæ ракодта ОМОН-ы кусджытæн æмæ банысан кодта, зæгъгæ, уый стыр хайбавæрд бахаста Ирыстоны сабырдзинад æмæ хæдбардзинад бахъахъхъæнынмæ. «Милицийы сæрмагонд нысаниуæджы къорд тох кодта куыд æддагон знæгтимæ, афтæ мидæггагон криминалон элементтимæ дæр. Уый уыд нæ рес-публикæйы иунæг тыхон структурæ уæды рæстæджы, кæцыйы бон уыдис аккаг ныхкъуырд раттын фыдгæнджытæн. Фæлæ, хъыгагæн, сæ службæйон хæстæ æххæстгæнгæйæ æмæ райгуырæн бæстæ гуырдзиаг агрессортæй хъахъхъæнгæйæ, 36 адæймаджы фæхъуыдысты йæ рæнхъытæй. Уыдоны рухс нæмттæ рох никуы уыдзысты нæ адæмæй», – банысан кодта Наниты Игорь.
Бибылты Анатоли дæр раарфæ кодта ОМОН-ы кусджытæн æмæ уый дæр банысан кодта сæ профессионализм æмæ патриотизм. «Сымах тыхст рæстæджы алыхатт дæр уыдыстут æппæты разæй æмæ сæйраг уæз æнцадис сымахыл. Уæ хъæбатырдзинад, уæ тох фыдгæнджыты ныхмæ паддзахады къухда-риуæгадæй рох никуы уыдзысты. Мæ зæрдæ уын зæгъы æнæниздзинад æмæ æнтыстытæ уæ царды дæр æмæ уæ куысты дæр», – загъта Президент.
Сæ арæхстдзинад æмæ иузæрдион лæггады тыххæй цалдæр кусæджы бæстæйы Президент Бибылты Анатоли схорзæхджын кодта хицауадон хорзæхтæй.
Се службæйон хæстæ иттæг хорз кæй æххæст кæнынц, уый фæдыл Наниты Игорь дæр цалдæр кусæджы схорзæхджын кодта ведомствæйон хорзæхтæй.
Бибылты Анатоли ма ОМОН-æн балæвар кодта дæс ног автомашинæйы. Уыдон стыр ахъаз фæуыдзысты сæ æрвылбонон куысты, уымæн æмæ техникæйы æмбис ис æдзæллаг уавæры æмæ сæ хъæуы баивын.
Кадджын церемонийы фæуыны фæстæ Мидхъуыддæгты министрады къухдариуæгад æмæ Къорды кусджытæ веноктæ æмæ дидинджытæ сæвæрдтой ОМОН-ы фæмардуæвæг кусджыты цыртыты раз Тъбеты хъæуы æмæ ТЭК-ы.
Джиоты Александр
Comments are closed, but trackbacks and pingbacks are open.