8-æм октябры Хуссар Ирыстоны Паддзахадон университеты къухдариуæгады хъæппæрисæй ацы ахуырдон уагдоны студенттæ бацæттæ кодтой мадзал, Стыр Фыдыбæстæйон хæсты фæуæлахизыл 75 азы æмæ ХИПУ-йы сырæзтыл та 88 азы кæй сæххæст, уый цытæн.
Мадзал райдыдта ХИПУ-йы бæстыхайы раз чысыл концертон программæйæ, кæцыйы сæххæст кодтой студенттæ. Ам зæлыдысты хæстон патриотикон зарджытæ, кафыдысты æмæ сæ хъæлдзæгдзинадæй æхцондзинад хастой сæ алыварсуæвджытæн. Æрыгон чызджытæ æмæ лæппутæ бынтон рæсугъд фидыдтой рагон хæстон дарæсы æмæ зæронд æхсæнгæрзтимæ. Уый фæстæ сарæзтой автоалыгъд горæт Цхинвалы сæйраг уынгты ирон æмæ хæстон тырысатимæ. Æдасдзинад бахъахъхъæныны тыххæй колоннæйы разæй цыд Фæндагон змæлды æдасдзинады инспекцийы автомашинæ. Автоалыгъды сæйраг хайадисджытæ уыдысты раритетон хæстон мотоцикл «Урал М-72» æмæ дыууæ зæронд автомашинæйы, кæцытæ арæзт æрцыдысты ивгъуыд æнусы 40-æм азты. Ацы æфсæддон техникæ среставраци кодтой бынæттон цæрджытæ æмæ ныр сæ бакастæй дæр зæрдæ райы æмæ дисы æфтауы бирæты.
Автоколоннæ æрлæууыд Кады Аллеяйы цур, цæмæй дидинтæ сæвæрой Æнусон арты раз. Ардæм сæм æбамбал сты бæстæйы Президент Бибылты Анатоли æмæ ма Хуссар Ирыстоны Уæрæсейы Федерацийы минæварады кусджытæ, Россотрудничествойы сæргълæууæг Сергей Скворцов æмæ æндæртæ. Ам дарддæр арæзт æрцыдис хъазт, сæххæст кодтой музыкалон инструменттыл цæгъдгæйæ алыгъуызон зарджытæ. Президент тынг хорзыл банымадта ахæм мадзал æмæ стыр бузныджы ныхæстæ загъта организатортæн.
«Стыр Уæлахизы бон æрмæст 9-æм майимæ баст нæу, фæлæ ма хъуамæ кæддæриддæр нæ зæрдыл дарæм æмæ кад кæнæм уыцы хъайтартæн, кæцытæ сæ тугæй махæн балхæдтой рухс фидæн. Ирон адæм дæр стыр хайбавæрд бахастой фашистты скуынæг кæныны хъуыддагмæ æмæ нæм ацы бæрæгбон дæр уымæн æввахс у, уымæн ыл цин кæнæм, уымæн ын дæттæм ахæм стыр нысаниуæг. Мæн фæнды, цæмæй нæ фæсивæд макуы рох кæной уыцы хæсты хъайтарты, макуы макæй гæды ныхæстыл баууæндой, фæлæ дарддæр кæной, цы рæсугъд традицитæ нæм баззадис, уыдоны. Абоны бон тынг бирæ ис дезининформаци, Стыр Фыдыбæстæйон хæсты фæстиуджытæ фæсивæдæн æмбарын кæнынц зыгъуыммæ. Фæлæ мах хъуамæ æдзухдæр архайæм, цæмæй рæзгæ фæлтæр зонгæ кæной æцæг историимæ, сæ фыдæлты сгуыхтдзинæдтимæ. Æрмæтдæр еуæд ныллæудзысты царды раст фæндагыл, уыдзысты æцæг патриоттæ æмæ уарздзысты сæ Райгуырæн бæстæ», – банысан кодта Бибылты Анатоли.
Приезидент ма арфæйы ныхæстæ загъта лектортæ æмæ студенттæн ХИПУ-йы сырæзтыл 88 азы кæй сæххæст, уый фæдыл æмæ банысан кодта, Хуссар Ирыстоны историйы ацы уæлдæр ахуыргæнæндонæн кæй ис сæрмагонд бынат, кæй дзы хъомыл кæнынц нæ фидæнаразджыты.
ХИПУ-йы ректор Тедеты Вадим йæхирдыгæй загъта бузныджы ныхæстæ æмæ ма фехъусын кодта, зæгъæгæ, æрмæст ацы мадзалыл нæ æрлæудзæнис университет, фæлæ ма дарддæр дæр кæй ауадздзысты ахæм æнгæс мадзæлттæ.
«Ацы азы кæрон ма университеты цытджын æгъдауæй гом æрцæудзæнис ХИПУ-йы этнографион музей. Уадз æмæ нæ кæстæр фæлтæртæ фылдæр зоной сæ фыдæлты истори æмæ сын мах та уыцы зонындзинæдтæ парахатæй дæтдзыстæм», – загъта университеты ректор.
Кæронбæттæны æрæмбырдуæвджытæ Президентимæ систой къамтæ.
ДЖИОТЫ Александр
Comments are closed, but trackbacks and pingbacks are open.