Нӕ республикӕйы кувӕндӕттӕй бирӕ азты дӕргъы ӕркаст кӕмӕ нал уыд, уыдоны территоритӕ дарддӕр дӕр ӕфснайд цӕуынц Президент Гаглойты Аланы хъӕппӕрисӕй. Мидхъуыддӕгты министрад ныр та йӕхимӕ райста Дзауы районы Къобеты хъӕуы Мыкалгабыры кувӕндон бафснайыны хӕс.
Къобеты Мыкалгабыры кувӕндонмӕ бирӕ адӕм фӕцӕуы кувинӕгтимӕ, фӕкӕнынц ӕм ны-вонд кусӕрттӕгтӕ дӕр. Кӕд ӕмӕ сӕ фылдӕр сӕ фӕстӕ бафснайынц, уӕддӕр дзы бирӕ азты дӕргъы ӕрӕмбырд алыгъуызон бырон. Стӕй ма йӕ алыварс дӕр схъӕд скъутӕр ис ӕмӕ дзы хӕмпӕлтӕй ӕдӕрсгӕ ацӕуӕн нал уыд. Уымӕ гӕсгӕ йӕ хъуыд ӕфснайын – куыд кувӕндоны бӕстыхайӕн йӕхи, афтӕ йӕ алфӕмблай дӕр.
Милицийы кусджытӕ райсомӕй ссыдысты бынатмӕ ӕмӕ ӕрӕвнӕлдтой ӕфснайынмӕ. Райдыдтой уал къахвӕндӕгтӕ къутӕртӕй ӕмӕ хӕмпӕлтӕй сыгъдӕг кӕнынмӕ. Стӕй ма дзы бирӕ бӕлӕстӕ афӕлдӕхтысты ӕмӕ уыдоны дӕр асыгъдӕг кодтой. Халамӕрзӕнтӕй ныххафтой кувӕндоны алыварс, бӕстыхайы мидӕг дӕр ныссыгъдӕг кодтой.
Къобеты Мыкалгабыры бӕстыхай нымад у уникалон фыдӕлтыккон арӕзтадыл – хӕссынц ӕй X-XI азтӕм. Азтӕ куыд цыдысты, афтӕ пырх кодта кувӕндоны бӕстыхай ӕмӕ ӕдас нал уыд адӕмӕн. Уымӕ гӕсгӕ XIX ӕнусы зӕронд кувӕндоны дуртӕй сарӕзтой ног кувӕндон, кӕцы рауад бирӕ къаннӕгдӕр. Ис дзы егъау зал, ныгуылӕн фарс та дзы ис дыууӕуӕладзыгон дзӕнгӕрӕгдзӕгъдӕн. Нӕ фыдӕлтӕ Мыкалгабыры бардуаджы бастой бӕркад, фӕрныгадимӕ, ӕмӕ йӕ бынмӕ абоны бон дӕр кувынмӕ цӕуынц, цӕмӕй сыл сӕ апарахат кӕна. Кувынц ӕм Къобеты, Кърозы, Къусджыты ӕмӕ ма ӕндӕр хуссарирыстойнаг хъӕуты цæрджытæ. Цӕгат Ирыстоны дӕр тынг бирӕ адӕм нысан кӕнынц Мыкалгабыры бӕрӕгбон.
ДЖИОТЫ Алыксандр
