Тыхон структурæты кусджытæ рæстæгæй-рæстæгмæ сæ арæхстдзинад февдисынц полигонты æхсæнгарзæй æхсынæй æмæ ма æндæр специалон дзаумæттæй архайынæй. Фæлæ ма сæм ис специалон нысанæн машинæтæ дæр æмæ уыдоны дæр ракæнынц куы полигонмæ, куы та маршмæ дард бынæттæм.
Милицийы сæрмагонд нысаниуæджы къорды дæр та радон хатт ауагътой ахæм ахуыртæ сæ спецмашинæты шофыртæн. 11 бронетранспортеры БТР-80 райсомæй араст сты маршы ахæм маршрутыл Дзау-Цхинвал-Джер-Дзау-Цхинвал. Семæ ма уыдысты спец-къорды медицинон службæйы кусджытæ дæр, цæмæй сын бахъуыды рæстæджы тагъд медицинон æххуыс бакæной. Уымæй уæлдай ма рæнхъон кусджытæн амонынц, фыццаг медицинон æххуыс куыд хъæуы бакæнын, уыдæттæ дæр. Тыхон структырæйы кусæгæн ахæм зонындзинæдтæ райсын æнæмæнг хъуыддаг у, уымæн æмæ æдзух дæ фарсмæ дохтыр нæ уыдзæнис, æмæ бахъуыды рæстæджы та алы минут дæр зынаргъ вæййы.
Ахæм марштæ тынг ахъаз сты шофыр-механиктæн, уæлдайдæр та нырма цъус рæстæг чи кусы æмæ фæлтæрддзинад кæмæ нæй, ахæмтæн. Амонынц сын колоннæйы цæуыны фæткойтæ, дистанци куыд хъахъхъæнын хъæуы машинæты ‘хсæн, рацийæ куыд ныхас кæнын хъæуы сæ кæрæдзиимæ, уыдæттæ. Уымæй уæлдай ма сын бакастысты машинæ скъæрыны арæхстдзинадмæ экстремалон уавæрты, – къуылдымтæм сыскъæрын, адагты сæрты ахизын, уынгæг бынæтты бронетранспортер æрзилын. Имитаци ма сарæзтой, ома, БТР-80 ныххаудта адагы æмæ йæ лебедкайæ, кæнæ æндæр машинæйы æххуысæй сæппæрстой. Кæнæ та, зæгъæм, искæцы машинæ фехæлдис, уæд æй куыд хъуамæ аласой дарддæр æндæр машинæйыл бабæтгæйæ. Стæй ма хæххон уавæрты техникæ æндæргъуызон фæкусы, æндæр домæнтæ вæййы шофыртæм, рыгæй, кæнæ талынджы ницы фæзыны, æмæ шофыртæ ам дæр хъуамæ равдисой сæ арæхстдзинад.
Иумийагæй сисгæйæ маршы хайадисджытæ иттæг хорз сæххæст кодтой сæ разылæууæг хæстæ.
ОМОН-ы дæлхæйтты ‘хсæн ма ноджы ауагътой турнир мини-футболæй дæр. Хайад дзы райстой оперативон æмæ моторизацигонд ротæтæ цыппар командæйæ. Кæрæдзиимæ ахъазгæйæ æмбырд кодтой очкотæ æмæ дзы уæлахиздзауæй рахызт 2-æм оперативон ротæ, кæцытæ ныр цалдæр азы дæргъы фыццаг бынат никæмæн дæттынц. Дыккаг бынатыл ацыд 1-æм оперативон ротæ æмæ æртыккаг бынат та бацахста моторизацигонд ротæ.
ДЖИОТЫ Алыксандр
Comments are closed, but trackbacks and pingbacks are open.